കിയാമ: ഓസ്ട്രേലിയയിലെ ഒരു പൊതുഗ്രന്ഥശാലയിൽ നിന്ന് ഏകദേശം 150 വർഷം മുമ്പ് വായനയ്ക്കായി എടുത്ത പുസ്തകം ഒടുവിൽ ലൈബ്രറിയിലേക്ക് തിരിച്ചെത്തി. 1858-ൽ പ്രസിദ്ധീകരിച്ച ‘Antiquities of Athens’ എന്ന പുസ്തകമാണ് ന്യൂ സൗത്ത് വെയിൽസിലെ തീരദേശ പട്ടണമായ കിയാമയിലെ ലൈബ്രറിയിലേക്ക് കഴിഞ്ഞയാഴ്ച തിരികെ ലഭിച്ചത് (Australian Library book Returned After 150 Years). വീടിന്റെ നവീകരണ പ്രവർത്തനങ്ങൾക്കിടെ അടച്ചുപൂട്ടിയ അടുപ്പിനുള്ളിൽ ഇഷ്ടികകൊണ്ട് മറച്ച നിലയിലുള്ള ഒരു പഴയ തേയിലപ്പെട്ടിയിൽ നിന്നാണ് പുസ്തകം കണ്ടെത്തിയത്. തുടർന്ന് വീട്ടുടമ ഇത് കിയാമ ലൈബ്രറിയിൽ എത്തിച്ച് കൈമാറുകയായിരുന്നു. 1872-ൽ ലൈബ്രറി പ്രവർത്തനം ആരംഭിച്ച കാലത്തെ നിയമങ്ങൾ അനുസരിച്ച് പുസ്തകം വൈകി തിരിച്ചുനൽകിയതിനുള്ള പിഴ കണക്കാക്കിയാൽ ഏകദേശം 28,000 ഓസ്ട്രേലിയൻ ഡോളർ, അതായത് നിലവിലെ മൂല്യത്തിൽ ഏകദേശം 19 ലക്ഷം രൂപ, വരുമെന്നാണ് ലൈബ്രറി അധികൃതർ പറയുന്നത്. പുസ്തകത്തിന്റെ കവറിൽ രേഖപ്പെടുത്തിയിരുന്ന ആഴ്ചയിൽ മൂന്ന് പെൻസ് എന്ന പിഴനിരക്കും പണപ്പെരുപ്പവും പരിഗണിച്ചാണ് ഈ കണക്ക് തയ്യാറാക്കിയത്.
ഇത്രയും പഴക്കമുള്ള ഒരു പുസ്തകം തിരിച്ചുകിട്ടുന്നത് ആദ്യമായാണെന്ന് കിയാമ ലൈബ്രറി മാനേജർ മിഷേൽ ഹഡ്സൺ പറഞ്ഞു. സാധാരണയായി 30-ഓ 40-ഓ വർഷം വൈകി തിരിച്ചെത്തുന്ന പുസ്തകങ്ങൾ ലഭിക്കാറുണ്ടെങ്കിലും ഏകദേശം ഒന്നര നൂറ്റാണ്ടിന് ശേഷം ഒരു പുസ്തകം മടങ്ങിയെത്തുന്നത് അപൂർവ സംഭവമാണെന്നും അവർ വ്യക്തമാക്കി.
എന്നാൽ പുസ്തകം ആരാണ് വായനയ്ക്കായി എടുത്തതെന്ന വിവരം കണ്ടെത്താൻ സാധിച്ചിട്ടില്ല. 1870-കളിലെ വായനക്കാരുടെ വിവരങ്ങളും പുസ്തകങ്ങൾ എടുത്ത തീയതികളും രേഖപ്പെടുത്തിയിരുന്ന ലൈബ്രറിയുടെ പഴയ രജിസ്റ്റർ നഷ്ടപ്പെട്ടതാണ് ഇതിന് കാരണം. പുസ്തകത്തിനുള്ളിലും അവസാനമായി വായനയ്ക്കായി എടുത്ത വ്യക്തിയെ തിരിച്ചറിയാൻ സഹായിക്കുന്ന വിവരങ്ങളൊന്നും ഇല്ല.
ലൈബ്രറിയുടെ ആദ്യകാല ചട്ടങ്ങൾ പ്രകാരം, പുസ്തകം തിരിച്ചുനൽകിയും നിലവിലുള്ള കുടിശ്ശിക അടച്ചും മാത്രമേ വീണ്ടും പുസ്തകം എടുക്കാൻ അനുവാദമുണ്ടായിരുന്നുള്ളൂ. ഒരു കുടുംബത്തിലെ കുറഞ്ഞത് ആറ് അംഗങ്ങൾക്ക് വായിക്കാനറിയാമെന്ന് ഉറപ്പുണ്ടെങ്കിൽ മാത്രമാണ് പരമാവധി മൂന്ന് പുസ്തകങ്ങൾ വരെ നൽകിയത്. മദ്യലഹരിയിൽ എത്തുന്നവർക്ക് പുസ്തകങ്ങൾ നൽകില്ലെന്ന വ്യവസ്ഥയും അന്നത്തെ നിയമങ്ങളിലുണ്ടായിരുന്നു.
ചിമ്മിനിക്കു സമീപം ദീർഘകാലം സൂക്ഷിച്ചിരുന്നതിനാൽ പുസ്തകത്തിന് വെള്ളം കയറി കേടുപാടുകൾ സംഭവിച്ചിട്ടുണ്ട്. ലൈബ്രറിയുടെ ആദ്യകാല ശേഖരത്തിലെ ഏകദേശം 1,000 പുസ്തകങ്ങളിൽ 506-ാം നമ്പറായിരുന്ന ഇത്, ലൈബ്രറി ആരംഭിച്ച് ഏതാനും വർഷങ്ങൾക്കുള്ളിൽ തന്നെ നഷ്ടപ്പെട്ടതാകാമെന്നാണ് അധികൃതരുടെ നിഗമനം.
പുസ്തകം ഇനി കിയാമ ലൈബ്രറിയുടെ പ്രാദേശിക ചരിത്രശേഖരത്തിൽ പ്രദർശിപ്പിക്കും. ഇത് വീണ്ടും വായനയ്ക്കായി നൽകില്ലെന്നും, മറ്റൊരു 150 വർഷം കൂടി കാത്തിരിക്കേണ്ട സാഹചര്യം ഉണ്ടാകരുതെന്നും ലൈബ്രറി അധികൃതർ തമാശരൂപേണ പ്രതികരിച്ചു.
Summary: A book borrowed from Australia’s Kiama Library nearly 150 years ago has finally been returned after being discovered inside a sealed fireplace during home renovations. The estimated overdue fine, calculated using the library’s original rules and inflation, would be around Rs 19 lakh, though the original borrower remains unknown.
