പത്തനംതിട്ട: സംസ്ഥാനത്ത് തുടരുന്ന അപ്രതീക്ഷിതമായ അതിതീവ്ര മഴയിൽ പത്തനംതിട്ടയിലെ റാന്നി ടൗൺ പൂർണ്ണമായും ഒറ്റപ്പെട്ടു. പമ്പാ നദിയിൽ അടിയന്തര സാഹചര്യത്തിൽ ജലനിരപ്പ് അതിവേഗം ഉയർന്നതിനെ തുടർന്നാണ് റാന്നിയിലും പരിസര പ്രദേശങ്ങളിലും രൂക്ഷമായ പ്രളയസ്ഥിതി ഉടലെടുത്തത്.(Kerala Rains, Ranni Isolated As Pamba River Overflows Emergency Rescue Operations Underway)
പമ്പയിലെ അരയാഞ്ഞിലിമണ്ണ് കോസ്വേ പൂർണ്ണമായും മുങ്ങിപ്പോയി. കൂടാതെ, റാന്നി – വടശ്ശേരിക്കര റോഡിൽ വെള്ളം കയറിയതോടെ മേഖലയിലേക്കുള്ള ഗതാഗതം പൂർണ്ണമായും തടസ്സപ്പെട്ടു. ടൗണിലെ നൂറുകണക്കിന് വ്യാപാര സ്ഥാപനങ്ങളിലും താഴ്ന്ന പ്രദേശങ്ങളിലെ വീടുകളിലും മിനിറ്റുകൾക്കുള്ളിൽ വെള്ളം കയറി വലിയ നാശനഷ്ടമാണുണ്ടായത്.
ഡിങ്കി ബോട്ടുകൾ ഉപയോഗിച്ചാണ് വെള്ളപ്പൊക്കത്തിൽ ഒറ്റപ്പെട്ട ആളുകളെ സുരക്ഷിത സ്ഥാനങ്ങളിലേക്ക് മാറ്റുന്നത്. കൂടുതൽ ബോട്ടുകൾ പ്രദേശത്തേക്ക് എത്തിക്കുന്നുണ്ട്. അടിയന്തര മുൻകരുതലിന്റെ ഭാഗമായി റാന്നി മേഖലയിലാകെ വൈദ്യുതി ബന്ധം പൂർണ്ണമായി വിച്ഛേദിച്ചു. വീടുകളുടെയും കെട്ടിടങ്ങളുടെയും മുകൾനിലകളിൽ കുടുങ്ങിക്കിടക്കുന്നവരെ ഫയർഫോഴ്സും പ്രാദേശിക കൂട്ടായ്മകളും ചേർന്ന് പുറത്തെത്തിക്കുകയാണ്. റാന്നി ടൗണിന്റെ പ്രളയസാഹചര്യം വ്യക്തമാക്കുന്ന ആകാശദൃശ്യങ്ങൾ പുറത്തുവന്നിട്ടുണ്ട്. പ്രദേശത്ത് രക്ഷാപ്രവർത്തനങ്ങൾ തുടരുകയാണ്.
Story Summary
Unprecedented heavy rains cause the Pamba River to overflow, completely isolating Ranni town in Pathanamthitta district. Emergency teams, including the fire force using dinghy boats, are rescuing residents stranded in flooded homes and shops.
