തിരുവനന്തപുരം: ജന്തർ മന്തറിൽ നടന്ന വിദ്യാർഥി സമരവുമായി ബന്ധപ്പെട്ട് ആർഎസ്എസ് സൈദ്ധാന്തികൻ ടി.ജി. മോഹൻദാസ് (T.G. Mohandas) നടത്തിയ വിവാദ പരാമർശത്തിനെതിരെ പ്രതിഷേധവുമായി എഐവൈഎഫ് . വിദ്യാർഥി സമരക്കാരെ അധിക്ഷേപിക്കുകയും വെടിവെച്ച് കൊല്ലണമെന്ന തരത്തിൽ പ്രകോപനപരമായ പരാമർശം നടത്തുകയും ചെയ്ത മോഹൻദാസിനെ അറസ്റ്റ് ചെയ്ത് ജയിലിലടക്കണമെന്ന് എഐവൈഎഫ് ആവശ്യപ്പെട്ടു.
മോഹൻദാസിന്റെ പരാമർശം നാവുപിഴയായി കാണാനാകില്ലെന്നും അത് അങ്ങേയറ്റം അപലപനീയവും മനുഷ്യത്വവിരുദ്ധവുമാണെന്നും എഐവൈഎഫ് സംസ്ഥാന സെക്രട്ടറി ടി.ടി. ജിസ്മോൻ പറഞ്ഞു.
സംഘപരിവാർ സംഘടനകൾക്ക് വിദ്യാർഥി പ്രസ്ഥാനങ്ങളോടുള്ള അസഹിഷ്ണുതയാണ് ഇത്തരം പ്രസ്താവനകളിലൂടെ പുറത്തുവരുന്നതെന്നും ഇത് കലാപത്തിന് ആഹ്വാനം ചെയ്യുന്ന തരത്തിലുള്ളതാണെന്നും അദ്ദേഹം ആരോപിച്ചു. മോഹൻദാസിന്റെ അറസ്റ്റിനായി സംസ്ഥാന വ്യാപകമായി പ്രതിഷേധ പരിപാടികൾ സംഘടിപ്പിക്കുമെന്നും അദ്ദേഹത്തിന്റെ വസതിയിലേക്ക് മാർച്ച് നടത്തുമെന്നും എഐവൈഎഫ് നേതൃത്വം അറിയിച്ചു.
‘പത്രിക’ എന്ന യൂട്യൂബ് ചാനലിന് നൽകിയ അഭിമുഖത്തിലായിരുന്നു ടി.ജി. മോഹൻദാസിന്റെ വിവാദ പരാമർശം. സംഭവത്തിൽ മോഹൻദാസിന്റെ പ്രസ്താവന തള്ളിക്കൊണ്ട് ആർഎസ്എസ് രംഗത്തെത്തി. എന്നാൽ ബിജെപി ഇതുവരെ വിഷയത്തിൽ ഔദ്യോഗിക പ്രതികരണം നടത്തിയിട്ടില്ല.
എഐവൈഎഫ് സംസ്ഥാന സെക്രട്ടറി ടി.ടി. ജിസ്മോൻ നൽകിയ പരാതിയുടെ അടിസ്ഥാനത്തിൽ വിഷയത്തിൽ അന്വേഷണം നടത്താൻ ആഭ്യന്തര മന്ത്രി രമേശ് ചെന്നിത്തല ഉത്തരവിട്ടു. സൈബർ സെൽ ഐജി പി. പ്രകാശിനാണ് അന്വേഷണ ചുമതല നൽകിയിരിക്കുന്നത്.
Story Summary:
AIYF has demanded the arrest of RSS ideologue T.G. Mohandas over his controversial remarks regarding student protesters. The Kerala government has ordered an inquiry into the complaint, while the RSS has distanced itself from the statement.
