കൊച്ചി: ലോക ഹെപ്പറ്റൈറ്റിസ് ദിനത്തോടനുബന്ധിച്ച് ഹെപ്പറ്റൈറ്റിസ് രോഗത്തിനെതിരെ മുൻകരുതൽ ശക്തമാക്കണമെന്ന് ആഹ്വാനം ചെയ്ത് കെയർ ഹെൽത്ത് ഇൻഷുറൻസ് (World Hepatitis Day). ഹെപ്പറ്റൈറ്റിസ് പരിശോധന, പ്രതിരോധ കുത്തിവയ്പ്പ്, കൃത്യസമയത്ത് ചികിത്സ ആരംഭിക്കൽ എന്നിവയ്ക്ക് എല്ലാവരും മുൻഗണന നൽകണമെന്ന് കമ്പനി പുറത്തിറക്കിയ പൊതുമുന്നറിയിപ്പിൽ അഭ്യർഥിച്ചു.
രോഗലക്ഷണങ്ങളില്ലാതെ വർഷങ്ങളോളം ശരീരത്തിൽ നിലനിൽക്കാൻ സാധ്യതയുള്ള രോഗമാണ് ഹെപ്പറ്റൈറ്റിസ്. പലപ്പോഴും കരളിന് ഗുരുതരമായ കേടുപാടുകൾ സംഭവിച്ച ശേഷമാണ് രോഗം തിരിച്ചറിയപ്പെടുന്നത്. അപ്പോഴേക്കും രോഗം സിറോസിസ്, കരൾ പ്രവർത്തന തകരാർ, കരൾ അർബുദം തുടങ്ങിയ ഗുരുതരാവസ്ഥകളിലേക്ക് കടന്നിരിക്കാമെന്ന് മുന്നറിയിപ്പിൽ പറയുന്നു. അതിനാൽ രോഗം നേരത്തേ കണ്ടെത്തുകയും ചികിത്സ ആരംഭിക്കുകയും ചെയ്യുന്നത് ആരോഗ്യസങ്കീർണതകൾ ഒഴിവാക്കാൻ നിർണായകമാണെന്നും കമ്പനി ചൂണ്ടിക്കാട്ടി.
ദേശീയ, അന്തർദേശീയ ആരോഗ്യ റിപ്പോർട്ടുകളും കമ്പനിയുടെ ക്ലെയിം വിവരങ്ങളും പ്രകാരം ഇന്ത്യയിൽ വൈറൽ ഹെപ്പറ്റൈറ്റിസ് ബാധിതരുടെ എണ്ണം ഇപ്പോഴും ആശങ്കാജനകമാണ്. ഏകദേശം 2.9 കോടി പേർ ഹെപ്പറ്റൈറ്റിസ് ബി ബാധിതരും 55 ലക്ഷം പേർ ഹെപ്പറ്റൈറ്റിസ് സി ബാധിതരുമാണ്. ആകെ 3.5 കോടിയോളം പേർ രാജ്യത്ത് വിട്ടുമാറാത്ത വൈറൽ ഹെപ്പറ്റൈറ്റിസുമായി ജീവിക്കുന്നതായും പ്രതിവർഷം ഏകദേശം 1.23 ലക്ഷം മരണങ്ങൾ ഈ രോഗവുമായി ബന്ധപ്പെട്ടുണ്ടാകുന്നതായും കണക്കുകൾ സൂചിപ്പിക്കുന്നു.
കേന്ദ്ര സർക്കാരിന്റെ നാഷണൽ വൈറൽ ഹെപ്പറ്റൈറ്റിസ് കൺട്രോൾ പ്രോഗ്രാമിന്റെ ഭാഗമായി രോഗനിർണയ പരിശോധനകൾ സൗജന്യമായി ലഭ്യമാണെങ്കിലും, രോഗം ഗുരുതരമായാൽ കരൾ മാറ്റിവെക്കൽ ശസ്ത്രക്രിയ ഉൾപ്പെടെയുള്ള ചികിത്സകൾക്ക് വൻ സാമ്പത്തിക ചെലവ് വേണ്ടിവരുമെന്നും കമ്പനി വ്യക്തമാക്കി.
ഹെപ്പറ്റൈറ്റിസ് ബി, സി രോഗസാധ്യത കൂടുതലുള്ളവർ നിർബന്ധമായും പരിശോധന നടത്തണമെന്നും, നവജാത ശിശുക്കൾക്ക് ജനിച്ച് 24 മണിക്കൂറിനുള്ളിൽ ഉൾപ്പെടെ ഹെപ്പറ്റൈറ്റിസ് ബി വാക്സിൻ കൃത്യമായി നൽകണമെന്നും നിർദേശിച്ചു. ഹെപ്പറ്റൈറ്റിസ് സി ഭൂരിഭാഗം കേസുകളിലും ചികിത്സയിലൂടെ ഭേദമാക്കാനും ഹെപ്പറ്റൈറ്റിസ് ബി ഫലപ്രദമായി നിയന്ത്രിക്കാനും കഴിയുന്നതിനാൽ രോഗം സ്ഥിരീകരിച്ചാൽ ചികിത്സ പൂർണമായി തുടരേണ്ടതുണ്ടെന്നും കമ്പനി അറിയിച്ചു.
പ്രമേഹം, അമിതവണ്ണം, ഫാറ്റി ലിവർ തുടങ്ങിയ ആരോഗ്യപ്രശ്നങ്ങളുള്ളവർ ഡോക്ടറുടെ നിർദേശപ്രകാരം കരളിന്റെ ആരോഗ്യം ഇടയ്ക്കിടെ പരിശോധിക്കണമെന്നും നിർദേശമുണ്ട്. രക്തം സ്വീകരിക്കൽ, കുത്തിവയ്പ്പുകൾ, ദന്തചികിത്സ, ടാറ്റൂ എന്നിവ സുരക്ഷിതമായ രീതിയിൽ മാത്രം നടത്തുകയും റേസറുകളും സൂചികളും മറ്റുള്ളവരുമായി പങ്കിടാതിരിക്കുകയും വേണം.
മൺസൂൺ കാലത്ത് കൂടുതലായി റിപ്പോർട്ട് ചെയ്യപ്പെടുന്ന ഹെപ്പറ്റൈറ്റിസ് എ, ഇ രോഗങ്ങളെ പ്രതിരോധിക്കാൻ സുരക്ഷിതമായ ഭക്ഷണവും ശുദ്ധമായ കുടിവെള്ളവും ഉപയോഗിക്കണമെന്നും ആരോഗ്യകരമായ ജീവിതശൈലി പിന്തുടരണമെന്നും അമിതമായ മദ്യപാനം ഒഴിവാക്കണമെന്നും കമ്പനി ഓർമ്മിപ്പിച്ചു.
കരൾ രോഗങ്ങൾക്കുള്ള ചികിത്സയും ശസ്ത്രക്രിയകളും വലിയ സാമ്പത്തിക ബാധ്യത സൃഷ്ടിക്കാനിടയുള്ളതിനാൽ മതിയായ ഹെൽത്ത് ഇൻഷുറൻസ് പരിരക്ഷ ഉറപ്പാക്കുന്നതും അത്യാവശ്യമാണെന്ന് കെയർ ഹെൽത്ത് ഇൻഷുറൻസ് വ്യക്തമാക്കി.
Story Summary:
Care Health Insurance has urged people to prioritize hepatitis screening, vaccination, and early treatment on World Hepatitis Day. The company highlighted the growing burden of viral hepatitis in India and stressed preventive measures and adequate health insurance coverage.
