വെസ്റ്റ് ബാങ്ക്: അധിനിവേശ വെസ്റ്റ് ബാങ്കിൽ ഇസ്രയേൽ കുടിയേറ്റക്കാർ രണ്ട് മുസ്ലിം പള്ളികൾക്ക് തീയിട്ടതായും കെട്ടിടങ്ങളിൽ പ്രകോപനപരമായ എഴുത്തുകൾ രേഖപ്പെടുത്തിയതായും പലസ്തീൻ അധികൃതർ ആരോപിച്ചു. പ്രദേശത്ത് നടന്ന സംഘർഷത്തിൽ നാല് പലസ്തീനികളും രണ്ട് ഇസ്രയേൽ പൗരന്മാരും കൊല്ലപ്പെട്ടതിന് പിന്നാലെയാണ് ആക്രമണങ്ങൾ റിപ്പോർട്ട് ചെയ്തത്. (Israeli Settler Attacks West Bank Mosques)
നാബ്ലുസിന് സമീപമുള്ള ഖുസ്റ ഗ്രാമത്തിൽ ഞായറാഴ്ച പുലർച്ചെയാണ് ആക്രമണം നടന്നതെന്ന് പ്രാദേശിക അധികൃതർ അറിയിച്ചു. പുതുതായി നിർമിച്ചിരുന്ന ഒരു പള്ളിക്ക് തീയിട്ടതായും ചുവരുകളിൽ ഹീബ്രു ഭാഷയിൽ പ്രതികാര സന്ദേശങ്ങൾ എഴുതിയതായും ഗ്രാമ കൗൺസിൽ മേധാവി അബ്ദുൽ അസീം വാദി പറഞ്ഞു. കൊല്ലപ്പെട്ട ഇസ്രയേൽ റിസർവ് സൈനികന്റെ പേരുമായി ബന്ധപ്പെട്ട മുദ്രാവാക്യങ്ങളും ചുവരുകളിൽ ഉണ്ടായിരുന്നുവെന്നാണ് ആരോപണം. കഴിഞ്ഞ വെള്ളിയാഴ്ച നാബ്ലുസിന് സമീപമുള്ള താൽ ഗ്രാമത്തിന് സമീപം ഇസ്രയേൽ കുടിയേറ്റക്കാരും പലസ്തീനികളും തമ്മിലുണ്ടായ ഏറ്റുമുട്ടലിലാണ് നാല് പലസ്തീനികളും രണ്ട് ഇസ്രയേൽ സൈനികരും കൊല്ലപ്പെട്ടത്. ഇതിന് പിന്നാലെയാണ് വെസ്റ്റ് ബാങ്കിലെ വിവിധ മേഖലകളിൽ സംഘർഷാവസ്ഥ രൂക്ഷമായത്.
അതേസമയം, ഖുസ്റയിൽ പള്ളിക്ക് നേരെയുണ്ടായ തീപിടിത്തവും ഗ്രാഫിറ്റി എഴുത്തുകളും സംബന്ധിച്ച് അന്വേഷണം ആരംഭിച്ചതായി ഇസ്രയേൽ സൈന്യം അറിയിച്ചു. സംഭവവുമായി ബന്ധപ്പെട്ട തെളിവുകൾ ശേഖരിക്കാൻ പൊലീസ് ഉദ്യോഗസ്ഥരെ നിയോഗിച്ചതായും മതസ്ഥാപനങ്ങൾക്ക് നേരെയുള്ള ആക്രമണങ്ങളെ ശക്തമായി അപലപിക്കുന്നതായും സൈനിക വക്താക്കൾ വ്യക്തമാക്കി. തുൽക്കർമിന് സമീപമുള്ള കൂർ ഗ്രാമത്തിലെ മറ്റൊരു പള്ളിക്കും തീ കൊളുത്താൻ ശ്രമം നടന്നതായി പലസ്തീൻ അധികൃതർ ആരോപിച്ചു. പുലർച്ചെ മൂന്ന് കുടിയേറ്റക്കാർ തീ കൊളുത്താൻ ശ്രമിച്ചെങ്കിലും ആരാധകർ ഇടപെട്ട് തീ പടരുന്നത് തടഞ്ഞതായി ഗ്രാമ കൗൺസിൽ അംഗം ഫരീദ് ജിയൂസി പറഞ്ഞു.
1967ലെ മിഡിൽ ഈസ്റ്റ് യുദ്ധത്തിന് ശേഷം ഇസ്രയേൽ അധീനതയിലായ വെസ്റ്റ് ബാങ്കിലെ ജൂത കുടിയേറ്റ കേന്ദ്രങ്ങളെ ഭൂരിഭാഗം രാജ്യങ്ങളും ഐക്യരാഷ്ട്ര സഭയും അന്താരാഷ്ട്ര നിയമപ്രകാരം നിയമവിരുദ്ധമായി കണക്കാക്കുന്നു. എന്നാൽ ഇസ്രയേൽ ഈ നിലപാട് നിരസിക്കുന്നു. ഗാസ യുദ്ധം ആരംഭിച്ചതിന് ശേഷം വെസ്റ്റ് ബാങ്കിൽ കുടിയേറ്റക്കാരും പലസ്തീനികളും തമ്മിലുള്ള ആക്രമണങ്ങൾ വർധിച്ചതായി ഐക്യരാഷ്ട്ര സഭയും പലസ്തീൻ അധികൃതരും ചൂണ്ടിക്കാട്ടിയിട്ടുണ്ട്. അതേസമയം, സുരക്ഷ ശക്തമാക്കുന്നതിനായി മേഖലയിൽ കൂടുതൽ സൈനികരെ വിന്യസിക്കുമെന്ന് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു പ്രഖ്യാപിച്ചു.
Summary: Israeli settlers have been accused of setting fire to two mosques in the occupied West Bank following deadly clashes between settlers and Palestinians. Israeli authorities said they are investigating the alleged arson attacks, while tensions continue to rise in the region.
