കാസർകോട്: ഇലക്ട്രോണിക് വോട്ടിങ് മെഷീൻ (ഇവിഎം) ഹാക്കിംഗ് സംബന്ധിച്ച ആരോപണങ്ങൾ ഗൗരവതരമാണെന്നും അത് പാർട്ടിക്കുള്ളിലെ ചർച്ചയായി ഒതുക്കാൻ കഴിയില്ലെന്നും കോൺഗ്രസ് എം.പി രാജ്മോഹൻ ഉണ്ണിത്താൻ (Rajmohan Unnithan EVM Hacking Allegations). ആരോപണങ്ങൾ സത്യമാണെങ്കിൽ അത് തിരഞ്ഞെടുപ്പ് അട്ടിമറിക്ക് ശ്രമിച്ചതിന് തുല്യമായ ഗുരുതര ക്രിമിനൽ കുറ്റമാണെന്നും വിഷയത്തിൽ കേന്ദ്ര ആഭ്യന്തര മന്ത്രിക്ക് പരാതി നൽകുമെന്നും അദ്ദേഹം അറിയിച്ചു.
സംഭവത്തിൽ സമഗ്രമായ അന്വേഷണം നടത്തണമെന്ന് ആവശ്യപ്പെട്ട രാജ്മോഹൻ ഉണ്ണിത്താൻ, നിയമത്തിന് മുന്നിൽ എല്ലാവരും തുല്യരാണെന്നും എത്ര ഉന്നത സ്ഥാനത്തുള്ള വ്യക്തിയായാലും കുറ്റക്കാരനാണെങ്കിൽ നിയമനടപടി നേരിടണമെന്നും വ്യക്തമാക്കി. ആരോപണവുമായി ബന്ധപ്പെട്ട വിവരങ്ങൾ പുറത്തുവിട്ടവർ പൊലീസിലോ ബന്ധപ്പെട്ട അന്വേഷണ ഏജൻസികളിലോ ഔദ്യോഗിക പരാതി നൽകണമെന്നും അദ്ദേഹം ആവശ്യപ്പെട്ടു. കാസർകോട് കോൺഗ്രസ് നേതാവ് ബി.എം. ജമാലിനെതിരെ ഉയർന്ന പരാതിയുടെ പശ്ചാത്തലത്തിലാണ് എംപിയുടെ പ്രതികരണം. ഇവിഎം ഹാക്കിംഗ് തടയാൻ പ്രത്യേക സാങ്കേതികവിദ്യയുണ്ടെന്ന് അവകാശപ്പെട്ട് പണം തട്ടിയെന്നാണ് ജമാലിനെതിരായ ആരോപണം. ഉദുമ, കാസർകോട് മണ്ഡലങ്ങളിൽ നിന്നുള്ള ചിലരിൽ നിന്ന് ഈ പേരിൽ പണം കൈപ്പറ്റിയതായും പരാതിയിൽ പറയുന്നു.
സംഭവത്തിൽ ബി.എം. ജമാലിനെതിരെ കർശന നടപടി സ്വീകരിക്കണമെന്ന് ആവശ്യപ്പെട്ട് യുഡിഎഫ് കാസർകോട് ജില്ലാ കമ്മിറ്റി കെപിസിസി പ്രസിഡന്റിനും യുഡിഎഫ് സംസ്ഥാന നേതൃത്വത്തിനും പരാതി നൽകിയിട്ടുണ്ട്. വിഷയത്തിൽ പാർട്ടി നേതൃത്വത്തിന്റെ നടപടിക്കായി കാത്തിരിക്കുകയാണെന്നും, അതേസമയം നിയമപരമായ അന്വേഷണം അനിവാര്യമാണെന്ന നിലപാടും ശക്തമായി ഉയരുകയാണ്. ഇവിഎം ഹാക്കിംഗ് സംബന്ധിച്ച ആരോപണങ്ങൾ ഇതിനകം രാഷ്ട്രീയ ചർച്ചകൾക്ക് വഴിവെച്ച സാഹചര്യത്തിൽ, വിഷയത്തിൽ അന്വേഷണ ഏജൻസികളുടെ ഇടപെടലും പാർട്ടി നേതൃത്വത്തിന്റെ തുടർനടപടികളും നിർണായകമാകും.
Summary: Congress MP Rajmohan Unnithan has demanded a comprehensive investigation into allegations involving EVM hacking claims and said he will approach the Union Home Minister. He asserted that if the allegations are true, they amount to a serious criminal offence and an attempt to manipulate elections.
