കൊച്ചി: രാജ്യത്ത് ഡെങ്കിപ്പനി പ്രതിരോധ രംഗത്ത് നിർണായക വഴിത്തിരിവായി പ്രമുഖ ബയോഫാർമസ്യൂട്ടിക്കൽ കമ്പനിയായ ടകെഡയുടെ (Takeda) ‘ക്യുഡെങ്ക’ (Qdenga – TAK-003) വാക്സിന് വിപണനാനുമതി ലഭിച്ചു. ഡ്രഗ് കൺട്രോളർ ജനറൽ ഓഫ് ഇന്ത്യയാണ് (DCGI) വാക്സിന് രാജ്യത്ത് അനുമതി നൽകിയത്. ഇന്ത്യയിൽ ഔദ്യോഗികമായി അംഗീകാരം ലഭിക്കുന്ന ആദ്യ ഡെങ്കിപ്പനി വാക്സിനാണിത്.
4 മുതൽ 60 വയസ്സുവരെയുള്ളവർക്ക് നൽകാവുന്ന ഈ വാക്സിൻ, മുൻപ് ഡെങ്കിപ്പനി ബാധിച്ചിട്ടുണ്ടോയെന്ന് പ്രത്യേകം പരിശോധിക്കാതെ തന്നെ സ്വീകരിക്കാൻ സാധിക്കും. ഡെങ്കിപ്പനിക്ക് കാരണമാകുന്ന നാല് പ്രധാന വൈറസ് സെറോടൈപ്പുകൾക്കെതിരെയും പൂർണ്ണ സംരക്ഷണം നൽകുന്ന രീതിയിലാണ് ക്യുഡെങ്ക വികസിപ്പിച്ചിരിക്കുന്നത്. 28,000-ത്തിലധികം പേരെ ഉൾപ്പെടുത്തി നടത്തിയ ആഗോള ക്ലിനിക്കൽ പഠനങ്ങളുടെയും ഇന്ത്യൻ ഫേസ്-3 പരീക്ഷണത്തിന്റെയും വിജയകരമായ കണ്ടെത്തലുകളുടെ അടിസ്ഥാനത്തിലാണ് വിപണനാനുമതി.
മൂന്ന് മാസത്തെ ഇടവേളയിൽ നൽകുന്ന രണ്ട് ഡോസുകളായാണ് വാക്സിനേഷൻ പൂർത്തിയാക്കേണ്ടത്. ലോകാരോഗ്യ സംഘടനയുടെ (WHO) ശുപാർശ പട്ടികയിലുള്ള ഈ വാക്സിൻ നിലവിൽ ഇന്ത്യ ഉൾപ്പെടെ 43 രാജ്യങ്ങളിൽ അംഗീകരിക്കപ്പെട്ടിട്ടുണ്ട്. ആഗോളതലത്തിൽ ഇതിനോടകം 3.2 കോടിയിലധികം ഡോസുകൾ വിതരണം ചെയ്തിട്ടുണ്ടെന്ന് ടകെഡ അധികൃതർ അറിയിച്ചു.
കഴിഞ്ഞ രണ്ട് പതിറ്റാണ്ടിനിടെ രാജ്യത്ത് ഡെങ്കിപ്പനി കേസുകൾ 11 മടങ്ങാണ് വർദ്ധിച്ചത്. ആഗോളതലത്തിലുള്ള ഡെങ്കി ബാധയുടെ മൂന്നിലൊന്നും ഇന്ത്യയിലാണ് രേഖപ്പെടുത്തുന്നത്. 2025-ൽ മാത്രം രാജ്യത്ത് 1.13 ലക്ഷത്തിലധികം കേസുകൾ റിപ്പോർട്ട് ചെയ്ത പശ്ചാത്തലത്തിലാണ് ഈ വാക്സിന്റെ വരവ് ഏറെ ആശ്വാസകരമാകുന്നത്. ക്യുഡെങ്കയുടെ വരവോടെ രാജ്യത്തെ ഡെങ്കിപ്പനി പ്രതിരോധ പ്രവർത്തനങ്ങൾ കൂടുതൽ ശക്തമാകുമെന്നും, പൊതുജനാരോഗ്യ അധികൃതരുമായി ചേർന്ന് സമതുലിതമായ വിതരണം ഉറപ്പാക്കുമെന്നും ടകെഡ ഇന്റർകോണ്ടിനെന്റൽ മാർക്കറ്റ്സ് ഹെഡ് ഡോ. മഹേന്ദർ നായക് വ്യക്തമാക്കി.
Story Summary:
The Drug Controller General of India (DCGI) has approved Takeda’s Qdenga (TAK-003), making it India’s first dengue vaccine. Suitable for individuals aged 4 to 60 without prior dengue testing, it offers protection against all four dengue serotypes via two doses three months apart.
