മുംബൈയിലെ 110 വർഷം പഴക്കമുള്ള പ്രശസ്തമായ പാർസി ഡയറി ഫാമിന്റെ ലൈസൻസ് ഫുഡ് ആൻഡ് ഡ്രഗ് അഡ്മിനിസ്ട്രേഷൻ (FDA) സസ്പെൻഡ് ചെയ്തു. കർശനമായ ഭക്ഷ്യസുരക്ഷാ മാനദണ്ഡങ്ങൾ പാലിക്കുന്നതിൽ പരാജയപ്പെട്ടതിനെത്തുടർന്നാണ് നടപടി (Parsi Dairy Farm Food Adulteration). ഡയറി ഫാമിനുള്ളിൽ നടത്തിയ പരിശോധനയിൽ വൃത്തിഹീനമായ സാഹചര്യം, പൂപ്പൽ ബാധ, കീടങ്ങളുടെ ശല്യം, കൃത്യമായ എക്സ്പയറി തീയതി രേഖപ്പെടുത്താത്ത ഉൽപ്പന്നങ്ങൾ എന്നിവ കണ്ടെത്തിയതായി അധികൃതർ വ്യക്തമാക്കി.
ജൂലൈ 14 മുതൽ 16 വരെയുള്ള തീയതികളിൽ മഹാരാഷ്ട്രയിലുടനീളം നടത്തിയ ശക്തമായ പരിശോധനയിലാണ് 1.90 കോടി രൂപയിലധികം വിലമതിക്കുന്ന ഭക്ഷ്യവസ്തുക്കൾ പിടിച്ചെടുത്തത്. പാൽ മായം ചേർക്കൽ, നിരോധിക്കപ്പെട്ട ഭക്ഷ്യ ഉൽപ്പന്നങ്ങളുടെ നിർമ്മാണം, വൃത്തിഹീനമായ സാഹചര്യത്തിലുള്ള പാക്കേജിംഗ് എന്നിവയായിരുന്നു റെയ്ഡിന്റെ പ്രധാന ലക്ഷ്യങ്ങൾ. അകോലയിലെ ഒരു ഫാക്ടറിയിൽ നിന്ന് മാത്രം 1.23 കോടി രൂപ വിലമതിക്കുന്ന നിരോധിച്ച ഭക്ഷ്യ ഉൽപ്പന്നങ്ങളാണ് പിടിച്ചെടുത്തത്.
ഗോരേഗാവിലെ പാൽ മായം ചേർക്കൽ കേസിൽ രണ്ട് പേരെ അറസ്റ്റ് ചെയ്യുകയും 822 പാക്കറ്റ് പാൽ നശിപ്പിക്കുകയും ചെയ്തു. കൂടാതെ, മുംബൈ, താനെ, ജൽഗാവ്, പൂനെ, നാസിക് തുടങ്ങി വിവിധ ഇടങ്ങളിൽ നടന്ന റെയ്ഡുകളിൽ വൻതോതിൽ പാൽ, പാൽ ഉൽപ്പന്നങ്ങൾ, സുഗന്ധവ്യഞ്ജനങ്ങൾ, നിരോധിച്ച ഭക്ഷ്യ വസ്തുക്കൾ എന്നിവ പിടിച്ചെടുത്തു. ഈ നടപടികളിലായി 16 പേരെ അറസ്റ്റ് ചെയ്യുകയും 11 എഫ്ഐആറുകൾ രജിസ്റ്റർ ചെയ്യുകയും ചെയ്തിട്ടുണ്ട്.
ഭക്ഷ്യ മായം ചേർക്കൽ സംബന്ധിച്ച പരാതികൾ അറിയിക്കുന്നതിനായി മഹാരാഷ്ട്ര എഫ്ഡിഎ ‘എഐ-ബേസ്ഡ് ഫുഡ് ആൻഡ് ഡ്രഗ് ഗ്രീവൻസ് പോർട്ടൽ’ (https://complaints.mahafda.in) പുറത്തിറക്കി. മറാത്തി, ഹിന്ദി, ഇംഗ്ലീഷ് ഭാഷകളിൽ വോയിസ് ഇൻപുട്ട് വഴി പോലും പൊതുജനങ്ങൾക്ക് ഇപ്പോൾ പരാതികൾ നൽകാം. മായം ചേർത്തതും സുരക്ഷിതമല്ലാത്തതുമായ ഭക്ഷ്യവസ്തുക്കളെക്കുറിച്ച് 1800-222-365 എന്ന ടോൾ ഫ്രീ നമ്പറിലും വിവരം അറിയിക്കാവുന്നതാണ്.
Summary: The Maharashtra FDA has suspended the FSSAI license of the 110-year-old Parsi Dairy Farm in Mumbai due to serious hygiene violations, including mould and pest infestations. This action is part of a massive statewide crackdown that resulted in the seizure of over Rs 1.90 crore worth of substandard and banned food products across 24 raids, alongside the launch of a new AI-based grievance portal for public complaints.
