ന്യൂഡൽഹി: പരിസ്ഥിതി സൗഹൃദ പൊതുഗതാഗത രംഗത്ത് വൻ കുതിച്ചുചാട്ടവുമായി ഇന്ത്യയുടെ ആദ്യ ഹൈഡ്രജൻ ട്രെയിൻ പ്രധാനമന്ത്രി നരേന്ദ്ര മോദി ഫ്ലാഗ് ഓഫ് ചെയ്തു. ചെന്നൈയിലെ ഇന്റഗ്രൽ കോച്ച് ഫാക്ടറി തദ്ദേശീയമായി വികസിപ്പിച്ചെടുത്ത ഈ അത്യാധുനിക ട്രെയിൻ ഹരിയാനയിലെ ജിന്ദ്, സോണിപത് സ്റ്റേഷനുകൾക്കിടയിലാണ് സർവീസ് നടത്തുന്നത്.(India’s First Hydrogen Train, PM Narendra Modi Flags Off India’s First Hydrogen Train On Jind Sonipat Route)
വടക്കൻ റെയിൽവേയുടെ ഡൽഹി ഡിവിഷന് കീഴിലുള്ള 89 കിലോമീറ്റർ ദൈർഘ്യമുള്ള പാതയിലാണ് പുതിയ ട്രെയിൻ ഓടുക.പൈലറ്റ് പ്രോജക്ടിന്റെ ഭാഗമായി തിരഞ്ഞെടുത്ത ഈ റൂട്ടിലെ സർവീസുകൾക്കായി ജിന്തിൽ പ്രത്യേക ഹൈഡ്രജൻ സംഭരണ-ഇന്ധന വിതരണ കേന്ദ്രം സജ്ജമാക്കിയിട്ടുണ്ട്. കംപ്രസ് ചെയ്ത ഹൈഡ്രജൻ വാതകം സൂക്ഷിക്കുന്നതിനും വിതരണം ചെയ്യുന്നതിനുമുള്ള ആവശ്യമായ ലൈസൻസ് പെട്രോളിയം ആൻഡ് എക്സ്പ്ലോസീവ്സ് സേഫ്റ്റി ഓർഗനൈസേഷൻ (PESO) ഇതിനകം അനുവദിച്ചു.
ഈ നേട്ടത്തോടെ ജർമ്മനി, ജപ്പാൻ, ചൈന, അമേരിക്ക എന്നീ രാജ്യങ്ങൾക്ക് പിന്നാലെ ഹൈഡ്രജൻ അധിഷ്ഠിത ട്രെയിൻ സാങ്കേതികവിദ്യ പരീക്ഷിക്കുന്ന ആഗോള ശക്തികളുടെ പട്ടികയിലേക്ക് ഇന്ത്യയും എത്തിച്ചേർന്നു. മണിക്കൂറിൽ പരമാവധി 75 കിലോമീറ്റർ വേഗതയുള്ള ഈ ട്രെയിനിൽ 10 കോച്ചുകളാണുള്ളത്. ഇതിൽ 2,400 കിലോവാട്ട് മൊത്തം ശേഷിയുള്ള രണ്ട് ഡ്രൈവിംഗ് പവർ കാറുകളും (DPCs) 8 പാസഞ്ചർ കോച്ചുകളും ഉൾപ്പെടുന്നു.
യാത്രാവേളയിൽ ജിന്ദ് സിറ്റി, പാണ്ഡു പിണ്ഡാര, ലളിത് ഖേര, ഭംബേവ, ഈശാപൂർ ഖേരി, ബൂട്ടാന, ഖണ്ഡ്രായ്, ഗോഹാന, രാഭ്ര, ലാത്ത്, മോഹാന ഹരിയാന, ബർവാസ്നി എന്നീ 12 സ്റ്റേഷനുകളിൽ ട്രെയിൻ നിർത്തും. ട്രെയിൻ നമ്പർ 74010 (ജിന്ദ് – സോണിപത്): രാവിലെ 07:40-ന് ജിന്തിൽ നിന്ന് പുറപ്പെട്ട് 09:40-ന് സോണിപതിൽ എത്തും.ട്രെയിൻ നമ്പർ 74009 (സോണിപത് – ജിന്ദ്): രാവിലെ 10:40-ന് സോണിപതിൽ നിന്ന് പുറപ്പെട്ട് ഉച്ചയ്ക്ക് 13:00 മണിക്ക് ജിന്തിൽ തിരിച്ചെത്തും.
Story Summary
Prime Minister Narendra Modi flagged off India’s first hydrogen-powered train, developed indigenously by Chennai’s Integral Coach Factory (ICF). Running on the 89-km Jind-Sonipat route in Haryana at a top speed of 75 kmph, this zero-emission 10-car train places India into an elite global club exploring cleaner rail alternative fuels.
