ബെംഗളൂരു: സ്വന്തം വകുപ്പിലെ ജീവനക്കാരുടെ പെരുമാറ്റവും യാത്രക്കാരുടെ ദുരിതവും നേരിട്ടറിയാൻ മാസ്ക് ധരിച്ച് രഹസ്യമായി ബസിൽ യാത്ര ചെയ്ത കർണാടക ഗതാഗത മന്ത്രി ബൈരതി സുരേഷിനെ ചില്ലറയില്ലാത്തതിന്റെ പേരിൽ കണ്ടക്ടർ ബസിൽ നിന്ന് ഇറക്കിവിട്ടു. ഒടുവിൽ മന്ത്രിയാണെന്ന് തിരിച്ചറിയാതെ യാത്രക്കാരനോട് മോശമായി പെരുമാറിയ ബെംഗളൂരു മെട്രോപൊളിറ്റൻ ട്രാൻസ്പോർട്ട് കോർപ്പറേഷൻ ഡ്രൈവർ കം കണ്ടക്ടർ ടി.ജി രാമകൃഷ്ണനെ അധികൃതർ സസ്പെൻഡ് ചെയ്തു.(Karnataka Transport Minister Byrathi Suresh, travelling incognito with a face mask)
ജൂലൈ 11-നായിരുന്നു നാടകീയമായ ഈ സംഭവം നടന്നത്. കെംപെഗൗഡ ബസ് സ്റ്റേഷനിൽ നിന്ന് നാഗഷെട്ടിഹള്ളിയിലേക്ക് സർവീസ് നടത്തുന്ന (റൂട്ട് 279E) ബസിലായിരുന്നു സംഭവം. രാത്രി 9.30ഓടെ ഹെബ്ബാളിൽ നിന്ന് ബസിൽ കയറിയ മന്ത്രി ഭൂപസാന്ദ്രയിലേക്കുള്ള 6 രൂപയുടെ ടിക്കറ്റിനായി 100 രൂപയുടെ നോട്ട് നൽകി. എന്നാൽ കൃത്യമായ തുക നൽകണമെന്നും അല്ലെങ്കിൽ ബസിൽ നിന്ന് ഇറങ്ങിപ്പോകണമെന്നും കണ്ടക്ടർ ആവശ്യപ്പെടുകയായിരുന്നു. തന്റെ കൈവശം ചെറിയ നോട്ടുകളില്ലെന്ന് മന്ത്രി വ്യക്തമാക്കിയതോടെ കണ്ടക്ടർ കൂടുതൽ കർക്കശമായി പെരുമാറി.
തുടർന്ന് തർക്കത്തിന് നിൽക്കാതെ മന്ത്രി ബസിൽ നിന്ന് ഇറങ്ങിപ്പോവുകയായിരുന്നു. 2024 മുതൽ ബിഎംടിസി ബസുകളിൽ യുപിഐ പെയ്മെന്റ് സംവിധാനം നിലവിലുണ്ടായിട്ടും, ഡിജിറ്റൽ പണമിടപാട് രീതിയെക്കുറിച്ച് യാത്രക്കാരനായ മന്ത്രിയോട് വിശദീകരിക്കാൻ കണ്ടക്ടർ തയ്യാറായില്ലെന്ന് ബിഎംടിസി ചൂണ്ടിക്കാട്ടി. നിലവിൽ ബിഎംടിസിയുടെ ആകെ ടിക്കറ്റ് വരുമാനത്തിന്റെ 53 ശതമാനവും യുപിഐ വഴി ലഭിക്കുന്ന സാഹചര്യത്തിലാണ് കണ്ടക്ടറുടെ ഭാഗത്തുനിന്നുണ്ടായ ഈ വീഴ്ച. ഔദ്യോഗിക അന്വേഷണത്തിന് വിധേയമായാണ് ജീവനക്കാരനെ ഇപ്പോൾ സസ്പെൻഡ് ചെയ്തിരിക്കുന്നത്.
ഏകദേശം രണ്ട് മണിക്കൂറോളം നീണ്ട പരിശോധനയ്ക്കിടയിൽ മന്ത്രി നഗരത്തിലെ 10-ഓളം ബിഎംടിസി ബസുകളിൽ മാസ്ക് ധരിച്ച് യാത്ര ചെയ്തു. മറ്റൊരു സംഭവത്തിൽ, യാത്രക്കാരൻ കൈ കാണിച്ചിട്ടും നിർത്താതെ പോയ ബസിലെ ഡ്രൈവറെയും കണ്ടക്ടറെയും മന്ത്രി സംഭവസ്ഥലത്തു വച്ചുതന്നെ സസ്പെൻഡ് ചെയ്യാൻ നിർദ്ദേശിച്ചിരുന്നു. കൂടാതെ മീറ്റർ ചാർജിനേക്കാൾ കൂടുതൽ തുക ഈടാക്കാൻ ശ്രമിച്ച ഓട്ടോറിക്ഷാ ഡ്രൈവർക്കെതിരെയും മന്ത്രി ഇടപെട്ടു.
Story Summary
Karnataka Transport Minister Byrathi Suresh, travelling incognito with a face mask, was allegedly asked to deboard a BMTC bus by a driver-cum-conductor over a lack of exact change for a ₹6 ticket. Following the incident on Route 279E, BMTC suspended the staff member, T.G. Ramakrishna, for rude behavior and failing to offer the existing UPI payment option.
