തിരുവനന്തപുരം: മുതിർന്ന കോൺഗ്രസ് നേതാവ് വി.എം. സുധീരനെതിരെ (vm sudheeran) വ്യാജ പോസ്റ്റർ നിർമിച്ച് സമൂഹമാധ്യമങ്ങളിലൂടെ പ്രചരിപ്പിച്ചെന്ന പരാതിയിൽ പൊലീസ് കേസെടുത്തു. സുധീരൻ നേരിട്ട് നൽകിയ പരാതിയുടെ അടിസ്ഥാനത്തിൽ, ‘മുഹമ്മദ് ഖലീൽ’ എന്ന ഫെയ്സ്ബുക്ക് ഐഡി ഉടമയ്ക്കെതിരെ തിരുവനന്തപുരം സിറ്റി സൈബർ ക്രൈം പൊലീസാണ് കേസന്വേഷണം ആരംഭിച്ചിരിക്കുന്നത്.
അതേസമയം, ആഭ്യന്തരമന്ത്രി രമേശ് ചെന്നിത്തലയ്ക്കെതിരെ ഫെയ്സ്ബുക്കിൽ അവഹേളനപരമായ കമന്റിട്ട സംഭവത്തിൽ മറ്റൊരാൾക്കെതിരെയും പൊലീസ് നടപടിയെടുത്തിട്ടുണ്ട്. മണ്ണാറശാല സ്വദേശിയായ അനിൽകുമാറിനെതിരെയാണ് ഹരിപ്പാട് പൊലീസ് കേസെടുത്തത്. ഒരു പ്രമുഖ മാധ്യമത്തിന്റെ ഫെയ്സ്ബുക്ക് പേജിൽ വന്ന വാർത്തയ്ക്ക് താഴെ, നിരവധി ക്രിമിനൽ കേസുകളിൽ പ്രതിയും നിലവിൽ ഒളിവിൽ കഴിയുന്നതുമായ കിഷോർ എന്ന വ്യക്തിക്കൊപ്പം ആഭ്യന്തരമന്ത്രി വേദി പങ്കിടുന്ന ചിത്രം അനിൽകുമാർ പോസ്റ്റ് ചെയ്യുകയായിരുന്നു.
തിരുവനന്തപുരം സൈബർ ഓപ്പറേഷൻസ് വിഭഗം എസ്പി ഈ കമന്റിന്റെ സ്ക്രീൻഷോട്ട് ആലപ്പുഴ ജില്ലാ പൊലീസ് മേധാവിക്ക് കൈമാറിയതിനെ തുടർന്നാണ് ഹരിപ്പാട് പൊലീസ് ഉടൻ തന്നെ നടപടിയെടുത്തത്. ആഭ്യന്തരമന്ത്രിയുടെ വ്യക്തിത്വത്തിന് ഹാനി വരുത്താനും, ഒപ്പം പൊലീസ് സേനയുടെ ഔദ്യോഗിക കർത്തവ്യനിർവഹണത്തെക്കുറിച്ച് പൊതുജനങ്ങളിൽ ബോധപൂർവ്വം തെറ്റിദ്ധാരണ പരത്താനും ഈ കമന്റ് ഇടയാക്കിയെന്നാണ് പൊലീസിന്റെ എഫ്.ഐ.ആറിൽ വ്യക്തമാക്കുന്നത്.
Story Summary: Thiruvananthapuram City Cyber Crime Police have registered a case based on a complaint by Congress leader V.M. Sudheeran over a fake poster circulated on Facebook. In a separate incident, Haripad police booked a Mannarassala native for posting a controversial comment and photo targeting Home Minister Ramesh Chennithala on social media.
