ന്യൂഡൽഹി: ക്രൂരമായ ലൈംഗിക അതിക്രമത്തിന് ഇരയാകേണ്ടി വന്ന പതിനഞ്ചുകാരനായ പെൺകുട്ടിയുടെ 28 ആഴ്ച പ്രായമുള്ള ഗർഭം അലസിപ്പിക്കാൻ ഡൽഹി ഹൈക്കോടതിയുടെ ചരിത്രപരമായ ഉത്തരവ് (Delhi High Court minor abortion permission). രാജ്യത്തെ നിയമപ്രകാരം 24 ആഴ്ചയ്ക്ക് ശേഷം ഗർഭഛിദ്രത്തിന് അനുവാദമില്ലെങ്കിലും, പ്രായപൂർത്തിയാകാത്ത പെൺകുട്ടി നേരിടുന്ന കടുത്ത മാനസികാഘാതവും പീഡനവും പ്രത്യേക സാഹചര്യമായി പരിഗണിച്ചാണ് കോടതിയുടെ ഈ അസാധാരണ നടപടി. ഗർഭഛിദ്ര നടപടികൾക്കായി പെൺകുട്ടിയെ ന്യൂഡൽഹിയിലെ എയിംസ് (AIIMS) ആശുപത്രിയിൽ പ്രവേശിപ്പിക്കാം.
ഹൈക്കോടതി വെക്കേഷൻ ബെഞ്ച് ജസ്റ്റിസ് മിനി പുഷ്കർണയുടേതാണ് ജീവകാരുണ്യപരമായ ഈ വിധി. ഗർഭവുമായി മുന്നോട്ട് പോകുന്നത് പെൺകുട്ടിയുടെ തകർന്ന മാനസികാരോഗ്യത്തെ കൂടുതൽ അപകടത്തിലാക്കുമെന്ന എയിംസ് മെഡിക്കൽ ബോർഡിന്റെ ശാസ്ത്രീയ റിപ്പോർട്ട് കൂടി വിലയിരുത്തിയാണ് കോടതി ഈ അനുമതി നൽകിയത്.
ഭരണഘടന ഉറപ്പുനൽകുന്ന ജീവിക്കാനുള്ള അവകാശവും വ്യക്തിസ്വാതന്ത്ര്യവും മുൻനിർത്തിയാണ് കുട്ടിയുടെ പിതാവ് മകളുടെ അവസ്ഥ ചൂണ്ടിക്കാട്ടി കോടതിയെ സമീപിച്ചത്. ഗർഭഛിദ്ര പ്രക്രിയയ്ക്കിടെ ഒരുവേള കുഞ്ഞ് ജീവനോടെ പുറത്തെടുക്കപ്പെടുകയാണെങ്കിൽ, കുട്ടിക്ക് ആവശ്യമായ എല്ലാ മെഡിക്കൽ സഹായങ്ങളും ഇൻകുബേറ്റർ സൗകര്യങ്ങളും എയിംസ് മെഡിക്കൽ സൂപ്രണ്ടും സംസ്ഥാന അധികാരികളും ചേർന്ന് ഉറപ്പാക്കണമെന്ന് കോടതി കർശന നിർദ്ദേശം നൽകിയിട്ടുണ്ട്. ഈ വിവരം ഉടൻ തന്നെ ചൈൽഡ് വെൽഫെയർ കമ്മിറ്റിയെ (CWC) അറിയിക്കണം. പെൺകുട്ടിയുടെയും പിതാവിന്റെയും താല്പര്യപ്രകാരം ആവശ്യെങ്കിൽ നിയമപരമായ നടപടിക്രമങ്ങളിലൂടെ ഈ കുഞ്ഞിനെ ദത്തെടുക്കലിനായി വിട്ടുനൽകാവുന്നതാണെന്നും കോടതി വ്യക്തമാക്കി.
ലൈംഗിക അതിക്രമവുമായി ബന്ധപ്പെട്ട ക്രിമിനൽ കേസിൽ നിർണായക തെളിവായി ഉപയോഗിക്കുന്നതിന് വേണ്ടി ഭ്രൂണത്തിന്റെ ഡിഎൻഎ (DNA) സാമ്പിളുകൾ കൃത്യമായി സൂക്ഷിച്ചുവെക്കാൻ എയിംസ് അധികൃതർക്ക് കോടതി നിർദ്ദേശം നൽകി. പെൺകുട്ടിയുടെ ചികിത്സാ ചെലവുകളും ആശുപത്രിയിലെ താമസച്ചെലവുകളും പൂർണ്ണമായും ഡൽഹി സർക്കാർ വഹിക്കണമെന്നും ഉത്തരവിലുണ്ട്.
Story Summary:
In an exceptional ruling, the Delhi High Court has permitted a 15-year-old sexual assault survivor to terminate her 28-week pregnancy, considering her severe mental trauma. The court ordered AIIMS New Delhi to facilitate the procedure and directed the Delhi government to cover all medical expenses.
