കോറിയ: ഛത്തീസ്ഗഢിലെ കോറിയ ജില്ലയിൽ നിന്ന് പുറത്തുവരുന്ന വാർത്തകൾ ഞെട്ടിക്കുന്നതാണ്. ഭാര്യയെ കെട്ടിയിട്ട് മർദ്ദിക്കുകയും തല മുണ്ഡനം ചെയ്യുകയും മുഖത്ത് കരിയും ഓയിലും പുരട്ടുകയും ചെയ്ത ശേഷം നിർബന്ധപൂർവ്വം മൂത്രം കുടിപ്പിക്കുകയും ചെയ്ത ഭർത്താവിനെതിരെ പോലീസ് കേസെടുത്തു. ഇവരുടെ മക്കളെക്കൊണ്ട് മാതാവിനെ തല്ലിച്ചുവെന്ന ആരോപണവും പുറത്തുവന്നിട്ടുണ്ട്. ( Chhattisgarh Domestic Violence)
15 വർഷമായി ഒരുമിച്ച് ജീവിക്കുന്ന ജിതേന്ദ്ര ഘാസിയയും ഭാര്യ താരയും തമ്മിലുള്ള ദാമ്പത്യപ്രശ്നങ്ങൾ ഏറെക്കാലമായി നിലനിന്നിരുന്നു. കുടുംബപ്രശ്നങ്ങളെ തുടർന്ന് മാറിത്താമസിച്ച ഭാര്യയെ ജൂൺ 14-ന് ഭർത്താവ് കണ്ടെത്തി ഭീഷണിപ്പെടുത്തി പുറത്തേക്ക് വിളിച്ചുവരുത്തുകയായിരുന്നു. തുടർന്ന് ഭാര്യയ്ക്ക് മറ്റ് പുരുഷന്മാരുമായി ബന്ധമുണ്ടെന്ന് ആരോപിച്ചുകൊണ്ട് പ്രതി ക്രൂരമായ മർദ്ദനത്തിന് ഇരയാക്കി. താൻ നിരപരാധിയാണെന്നും ഭർത്താവിന്റെ സംശയരോഗമാണ് എല്ലാ പ്രശ്നങ്ങൾക്കും കാരണമെന്നും ഭാര്യ പോലീസിനോട് വ്യക്തമാക്കി.
അമ്മയെ മർദ്ദിക്കാൻ ഭർത്താവ് മക്കളെ നിർബന്ധിച്ചുവെന്നത് സംഭവത്തിന്റെ ഗൗരവം വർദ്ധിപ്പിക്കുന്നു. കുട്ടികളെക്കൊണ്ട് മാതാവിനെ പലതവണ തല്ലിച്ചുവെന്നും, പ്രതിയുടെ നിർദ്ദേശപ്രകാരം കുട്ടികളിലൊരാൾ അമ്മയെക്കൊണ്ട് മൂത്രം കുടിപ്പിച്ചുവെന്നും യുവതി ആരോപിക്കുന്നു. ഭർത്താവ് പിന്നീട് തന്നെയും ഇത് നിർബന്ധിച്ച് കുടിപ്പിച്ചതായി ഇവർ പറയുന്നു. ആദ്യഘട്ടത്തിൽ ശാരീരിക മർദ്ദനത്തിന് മാത്രമാണ് കേസെടുത്തിരുന്നതെങ്കിലും, സംഭവത്തിന്റെ വീഡിയോ പുറത്തുവന്നതോടെ കൂടുതൽ ശക്തമായ വകുപ്പുകൾ ചേർത്ത് കേസ് പുനർരജിസ്റ്റർ ചെയ്തതായി കോറിയ അഡീഷണൽ സൂപ്രണ്ട് ഓഫ് പോലീസ് സുരേഷ ചൗബേ അറിയിച്ചു. ഭാരതീയ ന്യായ സംഹിതയിലെ വിവിധ വകുപ്പുകൾ പ്രകാരം പ്രതിയെ അറസ്റ്റ് ചെയ്യുകയും കോടതിയിൽ ഹാജരാക്കി റിമാൻഡ് ചെയ്യുകയും ചെയ്യും. വർഷങ്ങളായി നേരിട്ടുകൊണ്ടിരിക്കുന്ന ഗാർഹിക പീഡനത്തിനും സ്ത്രീധന പീഡനത്തിനും നീതി ലഭിക്കണമെന്നാണ് ഇരയുടെ ആവശ്യം.
Summary: In a horrific case of domestic violence from Chhattisgarh’s Koriya district, a woman has alleged that her husband, Jitendra Ghasia, subjected her to brutal torture, including shaving her head, smearing her face with soot, and forcing her to consume urine. The woman claimed that her husband even compelled their children to participate in the humiliation by forcing them to slap her.
