റിപ്പോർട്ട് : അൻവർ ഷരീഫ്
മലപ്പുറം: കൊണ്ടോട്ടി പുളിക്കൽ വലിയപറമ്പിൽ റോഡിന് നടുവിൽ ഇരിക്കുകയായിരുന്ന പിഞ്ചുകുഞ്ഞിനെ ചീറിപ്പാഞ്ഞു വന്ന വാഹനങ്ങൾക്കിടയിൽ നിന്നും അത്ഭുതകരമായി രക്ഷിച്ച് സ്വകാര്യ ബസ് ജീവനക്കാർ (Malappuram Kondotty Pulikkal baby rescue news). പുളിക്കൽ റൂട്ടിൽ സർവീസ് നടത്തുന്ന ‘സഫാ മർവ’ (Safa Marwa) ബസ്സിലെ ഡ്രൈവർ രാമൻ, കണ്ടക്ടർ നവാസ് എന്നിവരുടെ സമയോചിതമായ ഇടപെടലാണ് ഒരു വൻ ദുരന്തം ഒഴിവാക്കിയത്. ഇന്ന് പകൽ സമയത്തായിരുന്നു നടുക്കുന്ന ഈ സംഭവം ഉണ്ടായത്.
റോഡിന് സമീപമുള്ള വീട്ടിലെ കുട്ടിയാണ് വീട്ടുകാരുടെ കണ്ണ് വെട്ടിച്ച് കളിക്കുന്നതിനിടെ നടുറോഡിലേക്ക് ഇറങ്ങിയത്. ഈ സമയം വലിയപറമ്പ് റോഡിലൂടെ നിരവധി വാഹനങ്ങൾ വേഗതയിൽ കടന്നുപോകുന്നുണ്ടായിരുന്നു. ഇതിനിടയിലാണ് കുഞ്ഞ് റോഡിന് നടുവിൽ ഇരിക്കുന്ന കാഴ്ച സഫാ മർവ ബസ് ഡ്രൈവർ രാമന്റെ ശ്രദ്ധയിൽ പെടുന്നത്. ഒട്ടും സമയം കളയാതെ അദ്ദേഹം ബസ് പെട്ടെന്ന് ബ്രേക്ക് ചെയ്ത് നിർത്തുകയായിരുന്നു.
View this post on Instagram
ബസ് നിന്ന ഉടൻ തന്നെ കണ്ടക്ടർ നവാസ് താഴേക്ക് ഓടിയിറങ്ങി കുട്ടിയെ സുരക്ഷിതമായി കോരിയെടുക്കുകയായിരുന്നു. തുടർന്ന് ബസ് ജീവനക്കാരും യാത്രക്കാരും ചേർന്ന് കുട്ടിയെ ഉടൻ തന്നെ തൊട്ടടുത്തുള്ള വീട്ടിലെത്തിച്ച് രക്ഷിതാക്കളെ ഏൽപ്പിച്ചു. കുഞ്ഞ് റോഡിലിറങ്ങിയ വിവരം വീട്ടുകാർ അറിഞ്ഞിരുന്നതേയില്ല. ബസ് ജീവനക്കാരുടെ ശ്രദ്ധയും അതീവ ജാഗ്രതയും കൊണ്ട് മാത്രം പിഞ്ചുകുഞ്ഞിന്റെ ജീവൻ തിരികെ ലഭിച്ച വാർത്തയറിഞ്ഞ് നാട്ടുകാരും യാത്രക്കാരും ഇരുവർക്കും വലിയ രീതിയിലുള്ള അഭിനന്ദനങ്ങളാണ് അറിയിക്കുന്നത്.
Story Summary: Driver Raman and Conductor Navas of the private bus ‘Safa Marwa’ saved a toddler who wandered onto the middle of a busy road at Valiyaparamba in Pulikkal, Kondotty. The child had slipped out of a nearby house unnoticed by family members. Seeing the baby sitting in the center of the road, the driver immediately slammed the brakes, and the conductor rushed down to rescue the child and return them safely to the family.
