മൊഗാദിഷു: യു.എസ് അധികൃതർ പ്രവേശനാനുമതി നിഷേധിച്ചതിനെത്തുടർന്ന് 2026 ഫിഫ ലോകകപ്പിൽ നിന്ന് പുറത്തായ പ്രമുഖ സോമാലിയൻ ഫുട്ബോൾ റഫറി ഒമർ അബ്ദുൾഖാദിർ അർതാന് മാതൃരാജ്യത്ത് ഉജ്ജ്വല വരവേൽപ്പ് (Somalia Referee Omar Abdulkadir Artan). ബുധനാഴ്ച മൊഗാദിഷുവിലെ ആദൻ അബ്ദുള്ള ഒസ്മാൻ അന്താരാഷ്ട്ര വിമാനത്താവളത്തിൽ വന്നിറങ്ങിയ അർതാനെ നൂറുകണക്കിന് ആരാധകരും സർക്കാർ ഉന്നത ഉദ്യോഗസ്ഥരും ഫുട്ബോൾ അസോസിയേഷൻ പ്രതിനിധികളും ചേർന്ന് സ്വീകരിച്ചു. താനൊരു ‘ദേശീയ ഐക്കൺ’ ആണെന്ന് തെളിയിക്കുന്നതായിരുന്നു അർതാന് ലഭിച്ച ഈ വൈകാരിക സ്വീകരണം. അടുത്ത ലോകകപ്പിൽ താൻ തീർച്ചയായും പങ്കെടുക്കുമെന്ന് അദ്ദേഹം ജനങ്ങൾക്ക് ഉറപ്പുനൽകി.
2025-ലെ ആഫ്രിക്കൻ ഫുട്ബോൾ കോൺഫെഡറേഷന്റെ മികച്ച റഫറിയായി തിരഞ്ഞെടുക്കപ്പെട്ട അർതാൻ, ലോകകപ്പ് നിയന്ത്രിക്കുന്ന ആദ്യത്തെ സോമാലിയൻ റഫറിയാകാൻ ചരിത്രപരമായ നേട്ടമാണ് കൈവരിച്ചത്. എന്നാൽ ഇസ്താംബൂളിൽ നിന്ന് മയാമി വിമാനത്താവളത്തിൽ എത്തിയപ്പോൾ യു.എസ് കസ്റ്റംസ് അധികൃതർ അദ്ദേഹത്തെ തടയുകയായിരുന്നു. സാധുവായ വിസയും നയതന്ത്ര പാസ്പോർട്ടും ഉണ്ടായിരുന്നിട്ടും, 11 മണിക്കൂർ നീണ്ട കഠിനമായ ചോദ്യം ചെയ്യലിന് ശേഷം അദ്ദേഹത്തെ തുർക്കിയിലേക്ക് തിരിച്ചയക്കുകയായിരുന്നു. സോമാലിയയിലെ രാഷ്ട്രീയ സാഹചര്യങ്ങളെക്കുറിച്ചും ഭീകരവാദ ബന്ധങ്ങളെക്കുറിച്ചും അർതാനെതിരെ ഉയർന്ന ആരോപണങ്ങൾ ഉന്നയിച്ചാണ് ട്രംപ് ഭരണകൂടം അദ്ദേഹത്തെ തടഞ്ഞത്. ഈ ആരോപണങ്ങൾ സോമാലിയൻ സർക്കാർ തള്ളിക്കളഞ്ഞു. ഫിഫ ഈ വിഷയത്തിൽ ഒഴിഞ്ഞുമാറിയെങ്കിലും, അർതാനൊപ്പമാണ് തങ്ങളെന്ന് സോമാലിയൻ ജനത തെരുവിലിറങ്ങി പ്രഖ്യാപിച്ചു.
Summary: Somali football referee Omar Abdulkadir Artan, who was denied entry into the United States for the 2026 FIFA World Cup due to strict immigration policies, received a hero’s welcome upon his return to Mogadishu. Despite possessing valid tournament credentials and a diplomatic passport, Artan was detained at Miami International Airport and interrogated for 11 hours over alleged links to militant groups before being deported.
