ബീജിംഗ്: ആഗോള സാങ്കേതികവിദ്യാരംഗത്ത് വിപ്ലവകരമായ മുന്നേറ്റവുമായി ചൈന. ലോകത്തിലെ ആദ്യത്തെ വാണിജ്യ അണ്ടർവാട്ടർ (കടലിനടിയിലെ) ഡാറ്റാ സെന്റർ (China worlds first underwater datacentre) ചൈന വിജയകരമായി വിക്ഷേപിച്ചു. ഹെയ്നാൻ (Hainan) പ്രവിശ്യയിലെ തീരക്കടലിൽ സ്ഥാപിച്ചിരിക്കുന്ന ഈ കൂറ്റൻ പ്രോജക്റ്റ് പൂർണ്ണമായും പ്രവർത്തിക്കുന്നത് ഓഫ്ഷോർ വിൻഡ് എനർജി (തീരക്കടലിലെ കാറ്റാടിപ്പാടങ്ങളിൽ നിന്നുള്ള ഊർജ്ജം) വഴിയാണെന്നതാണ് ഇതിന്റെ ഏറ്റവും വലിയ പ്രത്യേകത.
ആഗോളതലത്തിൽ ഇന്റർനെറ്റ്, ക്ലൗഡ് കമ്പ്യൂട്ടിംഗ് എന്നിവയുടെ ഉപയോഗം വർദ്ധിച്ചതോടെ ഡാറ്റാ സെന്ററുകൾ വലിയ തോതിൽ താപം (Heat) പുറന്തള്ളുന്നത് വലിയൊരു പാരിസ്ഥിതിക വെല്ലുവിളിയാണ്. കരയിലുള്ള ഡാറ്റാ സെന്ററുകൾ തണുപ്പിക്കുന്നതിനായി വൻതോതിൽ വൈദ്യുതിയും ശുദ്ധജലവും ഉപയോഗിക്കേണ്ടി വരാറുണ്ട്. ഈ പ്രതിസന്ധിക്കുള്ള പരിഹാരമായാണ് ചൈന കടലിനടിയിലെ സ്വാഭാവിക തണുപ്പ് പ്രയോജനപ്പെടുത്തുന്ന സാങ്കേതികവിദ്യ വികസിപ്പിച്ചത്. സമുദ്രജലത്തിന്റെ സ്വാഭാവിക തണുപ്പ് ഉപയോഗിക്കുന്നത് വഴി പരമ്പരാഗത ഡാറ്റാ സെന്ററുകളെ അപേക്ഷിച്ച് 40 മുതൽ 60 ശതമാനം വരെ ഊർജ്ജം ലാഭിക്കാൻ ഇതിലൂടെ സാധിക്കും.
ഓരോ വൺ-മീറ്റർ വ്യാസമുള്ള കൂറ്റൻ സിലിണ്ടർ കാബിനുകളായാണ് ഈ ഡാറ്റാ സെന്റർ രൂപകൽപ്പന ചെയ്തിരിക്കുന്നത്. ഇവ കടലിനടിയിൽ ഏകദേശം 35 മീറ്റർ താഴ്ചയിലാണ് സ്ഥാപിച്ചിരിക്കുന്നത്. കടുത്ത സമുദ്ര സമ്മർദ്ദങ്ങളെയും ഉപ്പുവെള്ളം മൂലമുണ്ടാകുന്ന നാശനഷ്ടങ്ങളെയും പ്രതിരോധിക്കാൻ ശേഷിയുള്ള അത്യാധുനിക വസ്തുക്കൾ ഉപയോഗിച്ചാണ് ഇവ നിർമ്മിച്ചിരിക്കുന്നത്. ഏകദേശം 60,000 പരമ്പരാഗത കമ്പ്യൂട്ടറുകളുടെ ഡാറ്റ ഒരേസമയം കൈകാര്യം ചെയ്യാൻ ശേഷിയുള്ളതാണ് ഈ അണ്ടർവാട്ടർ സെന്റർ.
ചൈനീസ് കമ്മ്യൂണിക്കേഷൻസ് എന്റർപ്രൈസസും പ്രമുഖ സാങ്കേതിക കമ്പനികളും സംയുക്തമായാണ് ഈ പദ്ധതി യാഥാർത്ഥ്യമാക്കിയത്. കാർബൺ ഉദ്വമനം കുറയ്ക്കാനും 2060-ഓടെ കാർബൺ ന്യൂട്രാലിറ്റി കൈവരിക്കാനുമുള്ള ചൈനയുടെ ആഗോള ഹരിത ലക്ഷ്യങ്ങൾക്ക് (Green Goals) ഈ പദ്ധതി വലിയ ഊർജ്ജം നൽകും. ഭാവിയിൽ സമുദ്രതീരങ്ങളുള്ള മറ്റ് പ്രധാന ആഗോള നഗരങ്ങളിലും ഈ സാങ്കേതികവിദ്യ വിജയകരമായി നടപ്പിലാക്കാൻ സാധിക്കുമെന്നാണ് വിലയിരുത്തപ്പെടുന്നത്.
