കൊച്ചി: കേരളത്തിലെ റോഡ് സുരക്ഷാ ബോധത്തെയും ട്രാഫിക് നിയമപാലനത്തെയും പ്രശംസിച്ച് ഉത്തരാഖണ്ഡിൽ നിന്നുള്ള പ്രമുഖ ബൈക്ക് റൈഡറുടെ സോഷ്യൽ മീഡിയ വീഡിയോ (Kochi Traffic Discipline Video). കൊച്ചി നഗരത്തിലെ തിരക്കേറിയ റോഡുകളിലൂടെ യാത്ര ചെയ്ത റോഹൻ കുമാർ മണ്ഡൽ എന്ന ബൈക്കറാണ് കൊച്ചിയിലെ ഇരുചക്രവാഹന യാത്രക്കാരുടെ ട്രാഫിക് അച്ചടക്കം കണ്ട് അത്ഭുതപ്പെട്ട് ഇൻസ്റ്റാഗ്രാമിൽ വീഡിയോ പങ്കുവെച്ചത്. കൊച്ചിയിലെ റോഡുകളിൽ യാത്ര ചെയ്യുന്ന ഓരോ റൈഡറും കൃത്യമായി ഹെൽമെറ്റ് ധരിക്കുന്നുണ്ടെന്നും, കേരളത്തിലെ ട്രാഫിക് നിയമങ്ങളും അവ പാലിക്കുന്ന രീതിയും മറ്റൊരു തലത്തിലാണെന്നും അദ്ദേഹം തന്റെ വീഡിയോയിലൂടെ സാക്ഷ്യപ്പെടുത്തുന്നു.
കേവലം സാധാരണ ഹെൽമെറ്റുകൾക്ക് പകരം കൊച്ചിയിലെ ഒട്ടുമിക്ക റൈഡർമാരും മികച്ച സുരക്ഷ ഉറപ്പുനൽകുന്ന പ്രീമിയം ക്വാളിറ്റി ഹെൽമെറ്റുകളാണ് ഉപയോഗിക്കുന്നത് എന്ന കാര്യവും അദ്ദേഹം എടുത്തുപറഞ്ഞു. ഗുണനിലവാരമുള്ള ഹെൽമെറ്റുകൾ വാങ്ങുന്നതിൽ കേരളത്തിലെ ജനങ്ങൾ കാണിക്കുന്ന താല്പര്യം അഭിനന്ദനാർഹമാണ്. കൊച്ചിയിലെ കനത്ത ട്രാഫിക്കിലും കാർമേഘങ്ങൾ നിറഞ്ഞ മനോഹരമായ കാലാവസ്ഥ ആസ്വദിച്ചാണ് താൻ യാത്ര ചെയ്തതെന്നും, മറ്റ് വാഹനങ്ങളിൽ തട്ടാത്ത രീതിയിൽ അതീവ ജാഗ്രതയോടെയാണ് കൊച്ചിയിലൂടെ വണ്ടി ഓടിച്ചതെന്നും റോഹൻ കൂട്ടിച്ചേർത്തു. ‘കൊച്ചിയിലെ ജനങ്ങൾ റോഡ് നിയമങ്ങൾ കൃത്യമായി പാലിക്കുന്നു’ എന്ന അടിക്കുറിപ്പോടെ പങ്കുവെച്ച ഈ വീഡിയോ ഇതിനകം തന്നെ സോഷ്യൽ മീഡിയയിൽ മലയാളികൾ ഏറ്റെടുത്തു കഴിഞ്ഞു.
View this post on Instagram
