ന്യൂഡൽഹി: കരിയറിലെ വലിയ സാമ്പത്തിക നേട്ടങ്ങൾക്കിടയിലും ജീവിതത്തിൽ അനുഭവപ്പെടുന്ന മാനസിക ശൂന്യതയെക്കുറിച്ചുള്ള ഒരു കോർപ്പറേറ്റ് ജീവനക്കാരന്റെ സോഷ്യൽ മീഡിയ കുറിപ്പ് ഇന്റർനെറ്റിൽ വൻ ചർച്ചകൾക്ക് വഴിവെക്കുന്നു (Viral Reddit Post Corporate Worker Salary). പ്രതിമാസം 2.5 ലക്ഷം രൂപ ശമ്പളം ലഭിക്കുന്നുണ്ടെങ്കിലും തനിക്ക് യാതൊരുവിധ സന്തോഷവും തോന്നുന്നില്ലെന്നും, ഇതിനേക്കാൾ എത്രയോ ആനന്ദകരമായിരുന്നു മാസം 25,000 രൂപ മാത്രം വരുമാനമുണ്ടായിരുന്ന കാലമെന്നുമാണ് യുവാവ് റെഡ്ഡിറ്റിൽ കുറിച്ചത്. ‘പേഴ്സണൽ ഫിനാൻസ് ഇന്ത്യ’ എന്ന ഗ്രൂപ്പിൽ പ്രത്യക്ഷപ്പെട്ട ഈ കുറിപ്പ് പണവും സന്തോഷവും തമ്മിലുള്ള യഥാർത്ഥ ബന്ധത്തെക്കുറിച്ചുള്ള പുതിയ സംവാദങ്ങൾക്ക് തുടക്കമിട്ടു കഴിഞ്ഞു. സമൂഹത്തിന്റെ മാനദണ്ഡങ്ങൾ പ്രകാരം താൻ ജീവിതത്തിൽ വൻ വിജയം നേടിയ ആളാണെങ്കിലും ഉള്ളിൽ പൂർണ്ണമായും ശൂന്യത മാത്രമാണെന്ന് ഇയാൾ തുറന്നുപറയുന്നു.
കുറഞ്ഞ ശമ്പളം വാങ്ങിയിരുന്ന കാലത്ത് ജീവിതം വളരെ ഊർജ്ജസ്വലമായിരുന്നുവെന്നും, അക്കാലത്ത് സ്വന്തം അധ്വാനത്തിൽ നിന്നും 500 രൂപ ചിലവഴിച്ച് കഴിക്കുന്ന ഒരു അത്താഴം പോലും വലിയൊരു വിജയമായി അനുഭവപ്പെട്ടിരുന്നുവെന്നും യുവാവ് ഓർക്കുന്നു. എന്നാൽ ഇപ്പോൾ ലക്ഷങ്ങൾ അക്കൗണ്ടിൽ എത്തുമ്പോൾ ഒന്നും തോന്നാറില്ല. നിലവിലെ ഉയർന്ന ശമ്പളത്തിന്റെ 50 ശതമാനത്തോളം തുക മ്യൂച്വൽ ഫണ്ടുകളിലേക്കും മറ്റ് നിക്ഷേപങ്ങളിലേക്കും അടിയന്തിര കരുതൽ ശേഖരത്തിലേക്കുമാണ് പോകുന്നത്. ഭാവി സുരക്ഷിതമാക്കാൻ വേണ്ടി നിലവിലെ സ്വന്തം ജീവിതത്തെയും ആഗ്രഹങ്ങളെയും പട്ടിണിക്കിടുകയാണെന്നും, തന്റെ യൗവനവും സമാധാനവും പണത്തിന് വേണ്ടി പണയം വെച്ചതുപോലെയാണ് തോന്നുന്നതെന്നും അദ്ദേഹം കുറിച്ചു. സ്വന്തം ജീവിതം ആസ്വദിക്കാൻ സാധിക്കാതെ വെറുമൊരു കാഴ്ചക്കാരനായി മാറിപ്പോയ തനിക്ക് എങ്ങനെ പഴയ ആവേശം വീണ്ടെടുക്കാൻ സാധിക്കുമെന്നാണ് ഇയാൾ ചോദിക്കുന്നത്.
Earning ₹2.5 Lakhs a month, but I’ve never felt poorer. The ₹25k version of me was happier.
by
u/SeparatePermission79 in
personalfinanceindia
പോസ്റ്റ് വൈറലായതോടെ യുവാവിനെ അനുകൂലിച്ചും നിർദ്ദേശങ്ങൾ നൽകിയും നിരവധി പേർ രംഗത്തെത്തി. പണം തരുന്ന സന്തോഷത്തിന് ഒരു പരിധിയുണ്ടെന്നും, വരുമാനം കൂടുമ്പോൾ അതിനനുസരിച്ച് ആഗ്രഹങ്ങളും ലക്ഷ്യങ്ങളും വലുതാക്കണമെന്നും ചിലർ ഉപദേശിച്ചു. സമ്പാദ്യം മാത്രം നോക്കാതെ വിദേശ യാത്രകൾ നടത്താനും ജീവിതം പൂർണ്ണമായി ആസ്വദിക്കാനും ചിലർ നിർദ്ദേശിച്ചപ്പോൾ, നിലവിലെ ജീവിത ആവശ്യങ്ങളും ഭാവിയിലേക്കുള്ള സമ്പാദ്യവും തമ്മിൽ കൃത്യമായ ഒരു ബാലൻസ് സൂക്ഷിക്കേണ്ടത് അത്യാവശ്യമാണെന്ന് ഭൂരിഭാഗം പേരും അഭിപ്രായപ്പെട്ടു. പണത്തിന് എല്ലാ സന്തോഷങ്ങളും വാങ്ങിത്തരാൻ കഴിയില്ലെന്ന യാഥാർത്ഥ്യം വിളിച്ചോതുന്ന ഈ കുറിപ്പ് ലക്ഷക്കണക്കിന് യുവ ഉദ്യോഗസ്ഥരുടെ ഇടയിലാണ് ഇപ്പോൾ ചർച്ചയാകുന്നത്.
Summary: A viral Reddit post by a corporate employee earning Rs 2.5 lakh monthly has sparked a debate on money and happiness after they confessed to feeling emotionally empty. The worker recalled being much happier when earning just Rs 25,000, as every small expense felt meaningful back then compared to the routine financial milestones of today. While social media users offered empathy and advice on balancing future investments with current joys, the post highlights the growing mental health challenges and burnout within the high-paying corporate sector.
