മുംബൈ: പെട്രോൾ, ഡീസൽ വിലയിലുണ്ടായ കുത്തനെയുള്ള വർധനവ് സാധാരണക്കാരുടെ കുടുംബ ബജറ്റിനെ താളംതെറ്റിക്കുമെന്നും ഇത് പണപ്പെരുപ്പത്തിന് കാരണമാകുമെന്നും ആർബിഐ ഗവർണർ സഞ്ജയ് മൽഹോത്ര മുന്നറിയിപ്പ് നൽകി. മുംബൈയിൽ ചേർന്ന പണനയ അവലോകന യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.(RBI Governor Sanjay Malhotra warns about inflation and economic risks)
പെട്രോൾ വിലയിൽ 7.4 ശതമാനവും ഡീസൽ വിലയിൽ 8.4 ശതമാനവും വർധനവാണ് ഉണ്ടായിരിക്കുന്നത്. ഇത് ഹെഡ്ലൈൻ പണപ്പെരുപ്പത്തിൽ ഏകദേശം 36 ബേസിസ് പോയിന്റിന്റെ വർധനവ് നേരിട്ട് വരുത്തുമെന്നും, ഇതിന്റെ പ്രത്യാഘാതം വരും മാസങ്ങളിൽ ഉപഭോക്തൃ വില സൂചികയിൽ പ്രതിഫലിക്കുമെന്നും ഗവർണർ വ്യക്തമാക്കി. നടപ്പ് സാമ്പത്തിക വർഷത്തിന്റെ ബാക്കി കാലയളവിൽ പണപ്പെരുപ്പം 5.1 ശതമാനമായിരിക്കുമെന്നാണ് ആർബിഐയുടെ വിലയിരുത്തൽ.
തെക്കുപടിഞ്ഞാറൻ കാലവർഷം ദുർബലമാകാനും എൽ നിനോ പ്രതിഭാസം ഉണ്ടാകാനുമുള്ള സാധ്യതയുണ്ടെന്ന് അദ്ദേഹം ചൂണ്ടിക്കാട്ടി. ഇത് കാർഷിക ഉൽപ്പാദനത്തെയും ഗ്രാമീണ വിപണിയെയും പ്രതികൂലമായി ബാധിക്കുകയും ഭക്ഷ്യവില വർധനവിന് വഴിയൊരുക്കുകയും ചെയ്യും. പശ്ചിമേഷ്യയിലെ യുദ്ധം ആഗോള സമ്പദ്വ്യവസ്ഥയെ ബാധിക്കുന്നുണ്ടെങ്കിലും, അതിനെ നേരിടാനുള്ള കരുത്ത് ഇന്ത്യയുടെ സമ്പദ്വ്യവസ്ഥയ്ക്കുണ്ട്. ബാങ്കുകളുടെ സുസ്ഥിരതയും മികച്ച വിദേശനാണ്യ കരുതൽ ശേഖരവും ഇന്ത്യയ്ക്ക് ആശ്വാസമാണെന്നും അദ്ദേഹം പറഞ്ഞു.
രാജ്യത്ത് പോളിമർ നോട്ടുകൾ പുറത്തിറക്കുന്നതുമായി ബന്ധപ്പെട്ട നിർദ്ദേശം സർക്കാരിന്റെ പരിഗണനയിലാണെന്നും, എന്നാൽ ഇത് പ്രാഥമിക ഘട്ടത്തിലാണെന്നും ഗവർണർ അറിയിച്ചു. എന്തൊക്കെ പ്രതിസന്ധികൾ ഉണ്ടെങ്കിലും ആഭ്യന്തര വിപണിയിൽ ബാലൻസ് നിലനിർത്താൻ സാധിക്കുമെന്നും മൽഹോത്ര ആത്മവിശ്വാസം പ്രകടിപ്പിച്ചു.
Story Summary
RBI Governor Sanjay Malhotra has cautioned that the recent surge in fuel prices and potential monsoon failures could increase inflation and disrupt household budgets. Despite these risks, he expressed confidence in India’s economic resilience, citing strong corporate balance sheets and healthy forex reserves.
