ഫിറോസ്പൂർ: പഞ്ചാബിലെ ഫിറോസ്പൂരിൽ ട്രക്കും ജീപ്പും കൂട്ടിയിടിച്ച് ഉണ്ടായ ദാരുണമായ വാഹനാപകടത്തിൽ ഒമ്പത് പേർ സംഭവസ്ഥലത്തുതന്നെ മരണപ്പെട്ടു (Punjab Ferozepore Road Accident). അപകടത്തിൽ പതിനഞ്ചോളം പേർക്ക് ഗുരുതരമായി പരിക്കേറ്റിട്ടുണ്ട്. മരണപ്പെട്ടവർ ഒരു കുടുംബത്തിലെ അംഗങ്ങളാണെന്നാണ് ലഭ്യമാകുന്ന പ്രാഥമിക വിവരങ്ങൾ. അന്തരിച്ച തങ്ങളുടെ കുടുംബാംഗത്തിന്റെ അസ്ഥി നിമജ്ജനം ചെയ്യുന്നതിനായി ജീപ്പിൽ യാത്രതിരിച്ച സംഘമാണ് ശനിയാഴ്ച പുലർച്ചെയുണ്ടായ ദാരുണമായ അപകടത്തിൽപ്പെട്ടത്.
അപകടവിവരമറിഞ്ഞ് ഉടൻ തന്നെ പോലീസും അടിയന്തര രക്ഷാപ്രവർത്തകരും സംഭവസ്ഥലത്തേക്ക് കുതിച്ചെത്തുകയും പരിക്കേറ്റവരെ സമീപത്തെ വിവിധ ആശുപത്രികളിൽ പ്രവേശിപ്പിക്കുകയും ചെയ്തു. ഇതിൽ ചിലരുടെ നില അതീവ ഗുരുതരമായി തുടരുകയാണെന്ന് ആരോഗ്യവകുപ്പ് അധികൃതർ വ്യക്തമാക്കി. അമിതവേഗതയിലെത്തിയ ട്രക്ക് ജീപ്പിലേക്ക് ഇടിച്ചുകയറുകയായിരുന്നുവെന്നാണ് പ്രാഥമിക നിഗമനം. സംഭവത്തിൽ ഫിറോസ്പൂർ പ്രാദേശിക പോലീസ് കേസെടുത്ത് അപകടത്തിന്റെ കൃത്യമായ കാരണത്തെക്കുറിച്ച് വിശദമായ അന്വേഷണം ആരംഭിച്ചിട്ടുണ്ട്.
Summary: Nine people were killed on the spot and 15 others sustained severe injuries in a tragic road accident in Punjab’s Ferozepore after a head-on collision between a truck and a jeep. The victims, members of a family, were travelling to immerse the ashes of a deceased relative when the accident took place on Saturday. Emergency response teams rushed to the location and shifted the injured to nearby hospitals. Local police authorities have initiated an investigation to ascertain the exact cause of the collision.
