കാസർകോട്: അമ്മ ക്ഷേത്രദർശനത്തിന് പോയ സമയം വീട്ടിനുള്ളിൽ അതിക്രമിച്ചു കയറി ഉറങ്ങിക്കിടക്കുകയായിരുന്ന 11 വയസ്സുകാരിയെ ക്രൂരമായി ലൈംഗിക അതിക്രമത്തിന് ഇരയാക്കിയ കേസിൽ 63-കാരനായ പ്രതിക്ക് 30 വർഷം കഠിനതടവ് (Kasaragod POCSO case). മയിലാട്ടി, പനയാൽ ഗ്രാമത്തിലെ കുറുക്കൻകുന്ന് കോളനിയിൽ താമസിക്കുന്ന മധുസൂദനൻ നായരെയാണ് (63) ഹോസ്ദുർഗ് പോക്സോ സ്പെഷ്യൽ കോടതി ജഡ്ജി സുരേഷ് കഠിനശിക്ഷയ്ക്ക് വിധിച്ചത്. തടവുശിക്ഷയ്ക്ക് പുറമെ പ്രതി 25,000 രൂപ പിഴയായും ഒടുക്കണം. പിഴ അടച്ചില്ലെങ്കിൽ ആറുമാസം കൂടി അധിക തടവ് അനുഭവിക്കണമെന്നും വിധിന്യായത്തിൽ വ്യക്തമാക്കുന്നു.
2023 മേയ് 25-നായിരുന്നു നാടിനെ നടുക്കിയ കേസിനാസ്പദമായ സംഭവം നടന്നത്. ചീമേനി പോലീസ് സ്റ്റേഷൻ പരിധിയിൽ താമസിക്കുന്ന 11 വയസ്സുകാരിയുടെ മാതാവ് ക്ഷേത്രദർശനത്തിനായി പുറത്തുപോയ സമയത്തായിരുന്നു സംഭവം. പെൺകുട്ടിയും അനുജനും മാത്രം വീട്ടിനുള്ളിൽ ഉറങ്ങിക്കിടക്കുന്നത് മനസ്സിലാക്കിയ പ്രതി, വീടിനകത്തേക്ക് അതിക്രമിച്ചു കയറി കുട്ടിയെ ലൈംഗിക പീഡനത്തിന് ഇരയാക്കുകയായിരുന്നു.
തുടർന്ന് ചൈൽഡ് ലൈൻ ഇടപെടലിലൂടെ പുറത്തുവന്ന സംഭവത്തിൽ പ്രതിക്കെതിരെ പോക്സോ നിയമത്തിലെ വിവിധ കടുത്ത വകുപ്പുകൾ പ്രകാരം പോലീസ് കേസെടുത്തു. സംഭവ സമയത്ത് ചീമേനി സബ് ഇൻസ്പെക്ടറായിരുന്ന അജിതയാണ് കേസ് കൃത്യമായി അന്വേഷിച്ച് കോടതിയിൽ കുറ്റപത്രം സമർപ്പിച്ചത്. വിചാരണ വേളയിൽ പ്രതിക്കെതിരെയുള്ള ശാസ്ത്രീയ തെളിവുകളും മൊഴികളും കൃത്യമായി ഹാജരാക്കാൻ പ്രൊസിക്യൂഷന് സാധിച്ചു. പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യൂട്ടർ ഗംഗാധരൻ കോടതിയിൽ ഹാജരായി.
Story Summary: A 63-year-old man, Madhusudanan Nair, has been sentenced to 30 years of rigorous imprisonment and fined ₹25,000 by the Hosdurg POCSO Special Court for sexually assaulting an 11-year-old girl inside her house in Kasaragod while her mother was away at a temple.
