മെഗാ പവർ സ്റ്റാർ രാം ചരണും ബോളിവുഡ് സുന്ദരി ജാൻവി കപൂറും ആദ്യമായി ഒന്നിക്കുന്ന ബിഗ് ബജറ്റ് ചിത്രം ‘പെദ്ധി’യുടെ റിലീസ് തീയതി പ്രഖ്യാപിച്ചു (Ram Charan-Janhvi Kapoor). ബുച്ചി ബാബു സന സംവിധാനം ചെയ്യുന്ന ഈ പാൻ-ഇന്ത്യൻ ചിത്രം വരും മാസങ്ങളിൽ തെന്നിന്ത്യൻ സിനിമ കാത്തിരിക്കുന്ന ഏറ്റവും വലിയ പ്രോജക്ടുകളിൽ ഒന്നാണ്. നിലവിൽ ചിത്രത്തിന്റെ ട്രെയിലർ ലോഞ്ച് ചടങ്ങിനിടെ നായിക ജാൻവി കപൂർ രാം ചരണിന്റെ ഡാൻസ് മികവിനെക്കുറിച്ച് പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ തരംഗമാകുന്നത്. രാം ചരണിനൊപ്പം ഡാൻസ് ചെയ്താൽ വളരെ പെട്ടെന്ന് ശരീരഭാരം കുറയുമെന്നാണ് ജാൻവി തമാശയായി പറയുന്നത്.
“നിങ്ങൾക്കെല്ലാവർക്കും പരീക്ഷിക്കാൻ പറ്റുന്ന വളരെ എളുപ്പമുള്ള ഒരു വെയ്റ്റ് ലോസ് ടിപ്പ് ഞാൻ തരാം. രാം ചരൺ സാറിന്റെ ഏതെങ്കിലും ഒരു പാട്ടിന് അദ്ദേഹത്തിനൊപ്പം ഒന്നു ഡാൻസ് ചെയ്യാൻ ശ്രമിക്കൂ. അതിനായി ഒരു ദിവസം പോലും പൂർണ്ണമായി വേണ്ട, ദിവസത്തിന്റെ പകുതിയാവുമ്പോഴേക്കും തന്നെ നിങ്ങളുടെ ശരീരത്തിൽ ആ മാറ്റം കാണാൻ സാധിക്കും,” ജാൻവി പറഞ്ഞു.
ചിത്രത്തിലെ ഒരു പ്രധാന പാട്ടിന്റെ ഷൂട്ടിങ് അനുഭവങ്ങൾ പങ്കുവെച്ചുകൊണ്ടായിരുന്നു താരത്തിന്റെ ഈ വെളിപ്പെടുത്തൽ. “രാം ചരൺ സാറിനൊപ്പം ഡാൻസ് ചെയ്ത ബാക്ക്ഗ്രൗണ്ട് ഡാൻസേഴ്സ് ദിവസങ്ങൾക്കകം മെലിഞ്ഞതായി ഞാൻ നേരിട്ട് കണ്ടു. ഏകദേശം മൂന്ന്-നാല് ദിവസമെടുത്താണ് ഞങ്ങൾ ആ പാട്ട് രംഗം ഷൂട്ട് ചെയ്തത്. നാലാം ദിവസം ആയപ്പോഴേക്കും കൂടെയുണ്ടായിരുന്ന ഡാൻസേഴ്സ് എല്ലാം കഠിനമായ സ്റ്റെപ്പുകൾ ചെയ്ത് തളരുകയും, അവർ മെലിഞ്ഞ് ചെറുതായതായി എനിക്ക് തോന്നുകയും ചെയ്തു,” ജാൻവി കപൂർ കൂട്ടിച്ചേർത്തു.
വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു നിർമ്മിക്കുന്ന ഈ ബിഗ് ബജറ്റ് ചിത്രം വരും ജൂൺ നാലിന് തിയേറ്ററുകളിൽ എത്തും. മൈത്രി മൂവി മേക്കേഴ്സ്, സുകുമാർ റൈറ്റിങ്സ് എന്നിവർ ചേർന്നാണ് ചിത്രം പ്രേക്ഷകർക്ക് മുന്നിൽ അവതരിപ്പിക്കുന്നത്. ചിത്രത്തിന്റെ മലയാളം, തമിഴ് പതിപ്പുകൾ കേരളത്തിലും തമിഴ്നാട്ടിലും പ്രദർശനത്തിന് എത്തിക്കുന്നത് പ്രമുഖ വിതരണക്കാരായ തിങ്ക് സ്റ്റുഡിയോസാണ്.
Story Summary: During the trailer launch of the upcoming big-budget movie ‘Peddhi’, actress Janhvi Kapoor shared a funny weight loss tip involving her co-star Ram Charan. She noted that dancing alongside Ram Charan in song sequences is so intense that background dancers visibly lost weight within four days.
