ന്യൂഡൽഹി: ഐപിഎൽ 2026 എലിമിനേറ്റർ മത്സരത്തിൽ രാജസ്ഥാൻ റോയൽസിന് വേണ്ടി വെറും 29 പന്തിൽ 97 റൺസ് അടിച്ചുകൂട്ടി ക്രിക്കറ്റ് ലോകത്തെ ഞെട്ടിച്ച 15-കാരൻ വൈഭവ് സൂര്യവംശിയെ മുൻ പാകിസ്താൻ താരം ഷാഹിദ് അഫ്രീദിയോട് ഉപമിച്ച മുൻ പാക് ബാറ്റർ മുഹമ്മദ് യൂസുഫിന്റെ പ്രസ്താവന സോഷ്യൽ മീഡിയയിൽ വലിയ ചർച്ചയാകുന്നു (Vaibhav Sooryavanshi Shahid Afridi Comparison Controversy). വൈഭവിന്റെ വെടിക്കെട്ട് ബാറ്റിംഗ് തന്നെ ചെറുപ്പകാലത്തെ അഫ്രീദിയെ ഓർമ്മിപ്പിക്കുന്നുവെന്നും ഭയമില്ലാത്ത പ്രകടനമാണ് ഈ യുവതാരത്തിന്റേതെന്നുമായിരുന്നു യൂസുഫ് തന്റെ എക്സ് അക്കൗണ്ടിൽ കുറിച്ചത്.
1996-ൽ തന്റെ ആദ്യ ഏകദിന ഇന്നിംഗ്സിൽ തന്നെ 37 പന്തിൽ സെഞ്ച്വറി നേടി റെക്കോർഡിട്ട ചരിത്രമാണ് അഫ്രീദിക്കുള്ളത്. എന്നാൽ സച്ചിൻ ടെണ്ടുൽക്കറോടും ഡോൺ ബ്രാഡ്മാനോടും വരെ ക്രിക്കറ്റ് വിദഗ്ധർ ഉപമിക്കുന്ന വൈഭവിനെ അഫ്രീദിയോട് ഉപമിച്ചത് താരത്തിന് നൽകാവുന്ന ‘ഏറ്റവും വലിയ അപമാനമാണെന്ന്’ ചൂണ്ടിക്കാട്ടി ഇന്ത്യൻ ക്രിക്കറ്റ് ആരാധകർ ഇതിനെതിരെ രംഗത്തെത്തി.
അതേസമയം, ഇന്ന് ന്യൂ ചണ്ഡീഗഢിൽ നടക്കാനിരിക്കുന്ന ഗുജറാത്ത് ടൈറ്റൻസും രാജസ്ഥാൻ റോയൽസും തമ്മിലുള്ള രണ്ടാം ക്വാളിഫയർ മത്സരത്തിന് മുന്നോടിയായി ഗുജറാത്ത് അസിസ്റ്റന്റ് കോച്ച് പാർഥിവ് പട്ടേൽ വൈഭവ് സൂര്യവംശിയെ പ്രശംസിച്ചു. വൈഭവ് മികച്ച ഫോമിലാണെന്നും എന്നാൽ മുഹമ്മദ് സിറാജ്, കാഗിസോ റബാഡ എന്നിവരടങ്ങുന്ന തങ്ങളുടെ ശക്തമായ ബോളിങ് നിരയിലൂടെ ഈ യുവ പ്രതിഭയെ നേരത്തെ തന്നെ പുറത്താക്കാനുള്ള കൃത്യമായ തന്ത്രങ്ങൾ ടീം അണിയറയിൽ ഒരുക്കിയിട്ടുണ്ടെന്നും അദ്ദേഹം വാർത്താസമ്മേളനത്തിൽ പറഞ്ഞു. വൈഭവിന്റെ പ്രായത്തെക്കുറിച്ച് ചർച്ച ചെയ്യുന്നത് ഇനി അവസാനിപ്പിക്കണമെന്നും അദ്ദേഹത്തിന്റെ ബാറ്റിംഗ് മികവിനെയാണ് ആദരിക്കേണ്ടതെന്നും പാർഥിവ് കൂട്ടിച്ചേർത്തു. ഇന്നത്തെ മത്സരത്തിലെ വിജയികൾ ഞായറാഴ്ച അഹമ്മദാബാദിൽ നടക്കുന്ന ഫൈനലിൽ റോയൽ ചലഞ്ചേഴ്സ് ബംഗളൂരുവിനെ നേരിടും.
Summary: Former Pakistan batter Mohammad Yousuf faced backlash from Indian fans after comparing 15-year-old batting sensation Vaibhav Sooryavanshi to Shahid Afridi on social media. Netizens expressed displeasure, calling the comparison a downgrade for the youngster who recently smashed a breathtaking 97 off 29 balls in the IPL 2026 Eliminator. Meanwhile, Gujarat Titans assistant coach Parthiv Patel stated that their bowling attack has specific plans to counter the Rajasthan Royals starlet in tonight’s crucial Qualifier 2.
