ഒട്ടാവ: കാനഡയിലെ വടക്കൻ സസ്കാച്ചവാനിലുള്ള ഉൾനാടൻ യുറേനിയം ഖനന മേഖലയിലുണ്ടായ അപൂർവ്വമായ കരടി ആക്രമണത്തിൽ മലയാളി യുവാവ് കൊല്ലപ്പെട്ടു. മിക്സഡ് മാർഷ്യൽ ആർട്സ് താരമാകാൻ ആഗ്രഹിച്ച് കാനഡയിലെത്തിയ ഇരുപത്തിയേഴുകാരനായ ഋഷികേശ് കൊളത്താണ് ദാരുണമായി മരണമടഞ്ഞത് (Hrishikesh Koloth Killed Canada Bear Attack). വാൻകൂവർ ആസ്ഥാനമായി പ്രവർത്തിക്കുന്ന യുറേനിയം എക്സ് ഡിസ്കവറി കോർപ്പറേഷന്റെ കീഴിലുള്ള സൂ ബേ പ്രോജക്റ്റിൽ കരാർ അടിസ്ഥാനത്തിൽ ടെക്നീഷ്യനായി ജോലി ചെയ്യുകയായിരുന്നു ഇദ്ദേഹം. കഴിഞ്ഞ മൂന്ന് വർഷമായി ബ്രിട്ടീഷ് കൊളംബിയയിലെ പെന്റിക്ടണിൽ മൂത്ത സഹോദരൻ അർജ്ജുനൊപ്പമാണ് ഋഷികേശ് താമസിച്ചിരുന്നത്. കാനഡയിലെ പ്രശസ്തമായ ‘സ്കോഡൻ മാർഷ്യൽ ആർട്സ്’ ക്ലബ്ബിൽ പരിശീലനം നേടിയിരുന്ന ഇദ്ദേഹം, ലോകപ്രശസ്തമായ യുഎഫ്സി (UFC) പോരാട്ട വേദികളിൽ ഇന്ത്യയെ പ്രതിനിധീകരിച്ച് മത്സരിക്കുക എന്ന വലിയ സ്വപ്നവുമായാണ് വിദേശത്തേക്ക് കുടിയേറിയത്.
ആക്രമണത്തിന് പിന്നാലെ സൈറ്റിലുണ്ടായിരുന്ന മറ്റൊരു ജീവനക്കാരൻ വെടിയുതിർത്ത് കരടിയെ കൊലപ്പെടുത്തുകയായിരുന്നു. കരടിയുടെ മൃതദേഹം പോസ്റ്റുമോർട്ടം ഉൾപ്പെടെയുള്ള വിദ്ഗദ്ധ പരിശോധനകൾക്കായി സസ്കാച്ചവാനിലെ വെറ്ററിനറി കോളേജിലേക്ക് മാറ്റിയിട്ടുണ്ട്. കാനഡയിലെ റോയൽ കനേഡിയൻ മൗണ്ടഡ് പോലീസും ന്യജീവി സംരക്ഷണ വിഭാഗവും സംഭവത്തിൽ സംയുക്ത അന്വേഷണം ആരംഭിച്ചിട്ടുണ്ട്. കാനഡയുടെ ചരിത്രത്തിൽ തന്നെ ഏറ്റവും അപൂർവ്വമായി മാത്രം സംഭവിക്കുന്ന ഒന്നാണ് ഇത്തരം മാരകമായ കരടി ആക്രമണങ്ങൾ. സസ്കാച്ചവാൻ പ്രവിശ്യയുടെ ചരിത്രത്തിൽ രേഖപ്പെടുത്തുന്ന നാലാമത്തെ മാത്രം കരടി ആക്രമണ മരണമാണിത്. ഇതിന് മുൻപ് 2020 ഓഗസ്റ്റിലും, അതിനും മുൻപ് 1983-ലുമാണ് ഇവിടെ കരടിയുടെ ആക്രമണത്തിൽ മനുഷ്യർ കൊല്ലപ്പെട്ടിട്ടുള്ളത്. ഋഷികേശിന്റെ അപ്രതീക്ഷിത വിയോഗം കാനഡയിലെ മലയാളി സമൂഹത്തെയും കായിക പ്രേമികളെയും വലിയ രീതിയിൽ സങ്കടത്തിലാഴ്ത്തിയിരിക്കുകയാണ്.
Summary: Hrishikesh Koloth, a 27-year-old aspiring MMA fighter from Kerala, was tragically killed in a rare bear attack at a remote uranium exploration site in Saskatchewan, Canada. Working as a contract technician, Hrishikesh had relocated three years ago with dreams of eventually competing in the UFC. Local authorities and wildlife response teams are currently conducting a thorough investigation into the incident, which marks only the fourth fatal bear attack in the province’s history.
