പാരീസ്: ഫ്രാൻസിൽ നിലവിൽ അനുഭവപ്പെടുന്ന കടുത്ത ഉഷ്ണതരംഗത്തെത്തുടർന്ന് വിവിധയിടങ്ങളിലായി ഏഴ് പേർ മരണപ്പെട്ടതായി ഫ്രഞ്ച് ഊർജ്ജ സഹമന്ത്രി മോഡ് ബ്രെജിയോൺ അറിയിച്ചു (France Heatwave Fatalities). മരിച്ചവരിൽ അഞ്ച് പേർ ചൂടിൽ നിന്നും രക്ഷനേടാനായി തടാകങ്ങളിലും നദികളിലും കടൽത്തീരങ്ങളിലും ഇറങ്ങിയപ്പോൾ മുങ്ങിമരിക്കുകയായിരുന്നുവെന്ന് മന്ത്രി വ്യക്തമാക്കി. കടുത്ത ചൂടിന്റെ പശ്ചാത്തലത്തിൽ കായിക വിനോദങ്ങളിലും മത്സരങ്ങളിലും ഏർപ്പെടുന്ന ആളുകളുടെ സുരക്ഷ ഉറപ്പാക്കാൻ പ്രാദേശിക ഭരണകൂടങ്ങൾക്ക് സർക്കാർ കർശന നിർദ്ദേശം നൽകിയിട്ടുണ്ട്. ശനിയാഴ്ച മുതൽ രാജ്യത്തിന്റെ മിക്ക ഭാഗങ്ങളിലും സാധാരണയേക്കാൾ ഉയർന്ന താപനിലയാണ് രേഖപ്പെടുത്തുന്നത്.
ഫ്രാൻസിലെ പ്രധാന മേഖലയായ ബ്രിട്ടാനിയിൽ കാലാവസ്ഥാ നിരീക്ഷണ കേന്ദ്രമായ ‘മെറ്റിയോ ഫ്രാൻസ്’ ഓറഞ്ച് അലർട്ട് പ്രഖ്യാപിച്ചിട്ടുണ്ട്. ചൊവ്വാഴ്ച ഉച്ചയ്ക്ക് ശേഷം ഇവിടങ്ങളിൽ താപനില 36 ഡിഗ്രി സെൽഷ്യസ് വരെ ഉയരുമെന്നാണ് പ്രതീക്ഷിക്കുന്നത്. പാരീസ് ഉൾപ്പെടെയുള്ള നഗരങ്ങളിൽ ജനങ്ങൾക്ക് ആശ്വാസം പകരാൻ പാർക്കുകളിലും പൊതുസ്ഥലങ്ങളിലും തളിക്കാനുള്ള വാട്ടർ സ്പ്രേയറുകൾ ഉൾപ്പെടെയുള്ള ക്രമീകരണങ്ങൾ അധികൃതർ ഒരുക്കിയിട്ടുണ്ട്. ഈ ആഴ്ച ബുധൻ, വ്യാഴം ദിവസങ്ങളിലും ഉഷ്ണതരംഗം ശക്തമായി തുടരുമെന്നാണ് കാലാവസ്ഥാ മുന്നറിയിപ്പ്.
Summary: Seven people have died in France due to causes related directly or indirectly to an ongoing heatwave, with five fatalities resulting from drowning incidents. Weather agency Meteo France has issued an orange alert for most of Brittany, expecting temperatures to soar up to 36 degrees Celsius. The government has directed local authorities to implement protective measures, especially during sporting events, as the hot weather is projected to continue.
