കൊച്ചി: മോഡലിങ്ങിന്റെ മറവിൽ യുവതികളെ വിദേശത്തെത്തിച്ച് പെൺവാണിഭത്തിന് ഇരയാക്കിയ കേസിൽ ഞെട്ടിക്കുന്ന കൂടുതൽ വിവരങ്ങൾ പുറത്ത് (Kochi sex racket Bilal remanded). കേസിൽ കഴിഞ്ഞദിവസം അറസ്റ്റിലായ മാവേലിക്കര സ്വദേശി ബിലാൽ എന്ന ശ്രീകുമാറിന്റെ റിമാൻഡ് റിപ്പോർട്ടിലാണ് അതീവ ഗുരുതരമായ വിവരങ്ങളുള്ളത്. കൊച്ചി കേന്ദ്രീകരിച്ച് പ്രതികൾ വലിയൊരു നെറ്റ്വർക്ക് തന്നെയായിരുന്നു ഇതിനായി പ്രവർത്തിപ്പിച്ചിരുന്നതെന്ന് കൊച്ചി സിറ്റി പോലീസ് കമ്മീഷണർ വ്യക്തമാക്കി. പ്രതിയായ ബിലാലിനെ എറണാകുളം മജിസ്ട്രേറ്റ് കോടതി വരും മാസം ജൂൺ 5 വരെ റിമാൻഡ് ചെയ്ത് ജയിലിലേക്കയച്ചു.
കേസിലെ മുഖ്യസൂത്രധാരനായ ബിലാൽ നിരവധി യുവതികളെ ഇത്തരത്തിൽ ദുബായിൽ എത്തിച്ച് വൻതോതിൽ കമ്മീഷൻ കൈപ്പറ്റിയിരുന്നതായി റിമാൻഡ് റിപ്പോർട്ടിൽ പറയുന്നു. നിലവിൽ പരാതി നൽകിയ യുവതിയെ വിദേശത്തേക്ക് കടത്തുന്ന സമയത്ത് ബിലാലും വിമാനത്തിൽ ഒപ്പമുണ്ടായിരുന്നു.
കേസിലെ ഒന്നാം പ്രതി സിന്ധു ഉൾപ്പെടെയുള്ളവരുടെ അന്താരാഷ്ട്ര മനുഷ്യക്കടത്ത് ഇടപാടുകളെക്കുറിച്ച് ബിലാലിന് വ്യക്തമായ അറിവുണ്ടായിരുന്നു. ഇവർ തമ്മിൽ നടത്തിയ ലക്ഷക്കണക്കിന് രൂപയുടെ സാമ്പത്തിക ഇടപാടുകളുടെ ഡിജിറ്റൽ തെളിവുകളും അന്വേഷണസംഘം ശേഖരിച്ചിട്ടുണ്ട്.
“പ്രതികൾ ഇതൊരു ബിസിനസ്സ് കച്ചവടം പോലെയാണ് നടത്തിയിരുന്നത്. ഇതിൽ പങ്കാളികളായ പലർക്കും കൃത്യമായി കമ്മീഷൻ തുക ലഭിച്ചിരുന്നു. ശക്തമായ അന്വേഷണത്തിലൂടെ ഈ ശൃംഖല പൂർണ്ണമായും തകർക്കാൻ പോലീസിന് സാധിക്കും.”- കൊച്ചി സിറ്റി പോലീസ് കമ്മീഷണർ പറഞ്ഞു.
പുതിയ പരാതികൾ; ഗുണ്ടാ നേതാവ് ഔറംഗസേബിലേക്കും അന്വേഷണം
കേസ് മാധ്യമങ്ങളിൽ വാർത്തയായതോടെ തങ്ങളും സമാനമായ രീതിയിൽ ചതിക്കപ്പെട്ടതാണെന്ന് കാണിച്ച് കൂടുതൽ യുവതികൾ പോലീസിനെ സമീപിക്കുന്നുണ്ട്. പുതിയ പരാതികൾ കൂടി ലഭിക്കുന്ന പശ്ചാത്തലത്തിൽ വരും ദിവസങ്ങളിൽ കേസിൽ കൂടുതൽ അറസ്റ്റുണ്ടാകുമെന്നാണ് സിറ്റി പോലീസ് നൽകുന്ന സൂചന.
നിലവിൽ ദുബായിൽ ഒളിവിലിരുന്ന് റാക്കറ്റ് നിയന്ത്രിക്കുന്ന മറ്റ് പ്രതികളെ നാട്ടിലെത്തിക്കാനുള്ള നിയമപരമായ ശ്രമങ്ങൾ പോലീസ് ഊർജ്ജിതമാക്കിയിട്ടുണ്ട്. ഇതോടൊപ്പം, കേസിൽ നേരത്തെ പിടിയിലായ നടി അലീനയുടെ സുഹൃത്തും കൊച്ചിയിലെ കുപ്രസിദ്ധ ഗുണ്ടാ നേതാവുമായ ഔറംഗസേബിന് ഈ മനുഷ്യക്കടത്ത് ശൃംഖലയുമായി എന്ത് ബന്ധമാണുള്ളതെന്ന കാര്യവും പ്രത്യേക അന്വേഷണസംഘം വിശദമായി പരിശോധിച്ചുവരികയാണ്.
Story Summary (English): The remand report of Bilal (alias Sreekumar), arrested in the Kochi modeling sex racket case, has revealed shocking details of a well-organized trafficking network. The Kochi City Police Commissioner stated that the syndicate operated like a business, with members receiving heavy commissions for each victim trafficked to Dubai. Bilal was even present on the flight when the complainant was taken abroad. The Ernakulam Magistrate Court has remanded Bilal until June 5. As more victims are coming forward with fresh complaints, police expect further arrests. Investigations are also underway to check the involvement of gangster Aurangazeeb, a close friend of the accused Aleena.
