ന്യൂഡൽഹി: സിബിഎസ്ഇ പുതുതായി അവതരിപ്പിച്ച ഓൺ-സ്ക്രീൻ മാർക്കിംഗ് (OSM) സമ്പ്രദായത്തിനെതിരെ വ്യാപകമായ പ്രതിഷേധം ഉയരുമ്പോഴും, അടുത്ത വർഷവും ഈ ഡിജിറ്റൽ മൂല്യനിർണ്ണയ രീതി തുടരാൻ സാധ്യതയുണ്ടെന്ന് വിദ്യാഭ്യാസ മന്ത്രാലയ വൃത്തങ്ങൾ സൂചിപ്പിച്ചു (CBSE OSM Controversy Digital Evaluation). ഈ വർഷത്തെ അനുഭവങ്ങളും ഫീഡ്ബാക്കുകളും വിലയിരുത്തിയ ശേഷമായിരിക്കും ബോർഡ് ഇതിൽ അന്തിമ തീരുമാനമെടുക്കുക. നിലവിലുള്ള സംവിധാനങ്ങൾ കൂടുതൽ ശക്തിപ്പെടുത്തി മുന്നോട്ട് പോകാനാണ് സാധ്യതയെന്നും, കുട്ടികൾക്ക് ബുദ്ധിമുട്ടുണ്ടാകാത്ത രീതിയിൽ കാര്യങ്ങൾ ക്രമീകരിക്കുമെന്നും മന്ത്രാലയത്തിലെ മുതിർന്ന ഉദ്യോഗസ്ഥൻ വ്യക്തമാക്കി.
ഈ വർഷം പന്ത്രണ്ടാം ക്ലാസ് ബോർഡ് പരീക്ഷകൾക്കാണ് ഒഎസ്എം സിസ്റ്റം ഏർപ്പെടുത്തിയത്. ഇതിൽ ഉത്തരം എഴുതിയ പേപ്പറുകൾ സ്കാൻ ചെയ്ത് ഡിജിറ്റൽ കോപ്പികളാക്കിയാണ് അധ്യാപകർ കമ്പ്യൂട്ടർ സ്ക്രീനിലൂടെ മൂല്യനിർണ്ണയം നടത്തിയത്. എന്നാൽ, റീ-ഇവാലുവേഷൻ പോർട്ടൽ വഴി തങ്ങളുടെ സ്കാൻ ചെയ്ത ഉത്തരക്കടലാസുകൾ പരിശോധിച്ച വിദ്യാർത്ഥികൾ, പല പേജുകളും വ്യക്തതയില്ലാത്തതാണെന്നും വായിക്കാൻ കഴിയാത്തതാണെന്നും ആരോപിച്ച് രംഗത്തെത്തിയിരുന്നു.
ചില ഉത്തരങ്ങൾ നോക്കാതെ വിട്ടതായും സ്റ്റെപ്പ് മാർക്കിംഗ് നൽകിയില്ലെന്നും പരാതിയുണ്ട്. എന്നാൽ ഏകദേശം 98 ലക്ഷം ഉത്തരക്കടലാസുകളിൽ 68,000 എണ്ണത്തിൽ മാത്രമാണ് സ്കാനിംഗ് പ്രശ്നങ്ങൾ ആദ്യഘട്ടത്തിൽ കണ്ടതെന്നും, പിന്നീട് ഇത് 13,000 ആയി കുറഞ്ഞെന്നും അധികൃതർ വിശദീകരിച്ചു. വിദ്യാർത്ഥികൾ എഴുതിയ മഷിയുടെ നേർത്ത നിറം കാരണം സ്കാൻ വ്യക്തമാകാത്ത ഈ 13,000 പേപ്പറുകൾ മാനുവലായി (നേരിട്ട്) പരിശോധിച്ച് മാർക്ക് നൽകിയിട്ടുണ്ടെന്നും സോഷ്യൽ മീഡിയ ഇത്തരം ഒറ്റപ്പെട്ട സംഭവങ്ങളെ പെരുപ്പിച്ചു കാണിക്കുകയാണെന്നും മന്ത്രാലയ വൃത്തങ്ങൾ കൂട്ടിച്ചേർത്തു. ഒരേസമയം ഒന്നര ലക്ഷത്തോളം ആളുകൾ ലോഗിൻ ചെയ്യാൻ ശ്രമിച്ചതുകൊണ്ടാണ് റീ-ഇവാലുവേഷൻ പോർട്ടലിൽ സാങ്കേതിക തടസ്സങ്ങൾ ഉണ്ടായതെന്നും, ഇതിനാൽ അപേക്ഷിക്കാനുള്ള തീയതി നീട്ടി നൽകിയിട്ടുണ്ടെന്നും അധികൃതർ അറിയിച്ചു.
Summary: Despite the ongoing backlash against CBSE’s newly introduced On-Screen Marking (OSM) system, Education Ministry sources indicated that the digital evaluation mechanism is highly likely to continue next year. Under the new Class 12 evaluation method, physical answer sheets were replaced with digitally scanned copies for on-screen grading.
