ന്യൂഡൽഹി: ഗ്രേറ്റർ നോയിഡയിലെയും ഭോപ്പാലിലെയും യുവതികളുടെ മരണം രാജ്യം ചർച്ച ചെയ്യുമ്പോൾ, പെൺകുട്ടികൾക്ക് ഉപദേശവുമായി ബോളിവുഡ് നടിയും എം.പി.യുമായ കങ്കണ റണാവത് രംഗത്ത് (Kangana Ranaut Instagram story). സാമ്പത്തികമായി സ്വയംപര്യാപ്തതയും സ്വന്തമായി ഒരു കരിയറും നേടിയ ശേഷം മാത്രം മതി വിവാഹമെന്നാണ് യുവതികളോട് കങ്കണ പറയുന്നത്. ഇൻസ്റ്റഗ്രാം സ്റ്റോറിയിലൂടെയായിരുന്നു താരത്തിന്റെ പ്രതികരണം.
ഭോപ്പാലിൽ ത്വിഷ എന്ന മോഡലും നോയിഡയിൽ ദീപിക എന്ന യുവതിയും ആത്മഹത്യ ചെയ്ത സംഭവങ്ങളെ തുടർന്നാണ് കങ്കണയുടെ കുറിപ്പ്. രണ്ടുപേരുടെയും ആത്മഹത്യയ്ക്ക് പിന്നിലും കടുത്ത ദാമ്പത്യപ്രശ്നങ്ങളും പീഡനങ്ങളുമാണെന്നാണ് പുറത്തുവരുന്ന വിവരം. വിവാഹിതരായ യുവതികൾ അനുഭവിക്കുന്ന ക്രൂരതകളെക്കുറിച്ചുള്ള വേദനാജനകമായ വാർത്തകൾ എല്ലാ ദിവസവും പുറത്തുവരുന്നുണ്ടെന്ന് കങ്കണ ചൂണ്ടിക്കാട്ടി.
“വിദ്യാസമ്പന്നരായ ഈ യുവതികളിൽ പലരും ദുരന്തങ്ങൾ സംഭവിക്കുന്നതിന് മുൻപ്, തങ്ങൾ അനുഭവിക്കുന്ന ഞെരുങ്ങുന്ന സാഹചര്യങ്ങളിൽ നിന്ന് രക്ഷിക്കണമെന്ന് മാതാപിതാക്കളോട് അഭ്യർത്ഥിക്കാറുണ്ട്. പക്ഷേ, ഇന്ത്യൻ സമൂഹം വിവാഹിതരായ പെൺമക്കളെ പലപ്പോഴും കൈവിടുന്നതിൽ പ്രശസ്തമാണ്. നിങ്ങളുടെ കരിയർ നിങ്ങളുടെ ജീവിതത്തിൽ മറ്റാരേക്കാളും പ്രധാനമാണ്. അതുകൊണ്ട് പൂർണ്ണമായി സ്വതന്ത്രയായതിന് ശേഷം മാത്രം വിവാഹത്തെക്കുറിച്ച് ചിന്തിക്കുക” – കങ്കണ കുറിച്ചു.
സോഷ്യൽ മീഡിയയോ ഫാഷൻ, ഡേറ്റിംഗ്, മേക്കപ്പ് വ്യവസായങ്ങളോ പെൺകുട്ടികളോട് പറയാത്ത ചില യാഥാർത്ഥ്യങ്ങളാണ് ഇതെന്നും കങ്കണ കൂട്ടിച്ചേർത്തു.
“ദയവായി, നിങ്ങൾ നിങ്ങളുടെ ജീവിതത്തിലെ നായികയാകുക. നിങ്ങളെ രക്ഷിക്കാൻ ഇവിടെ ആരും വരാൻ പോകുന്നില്ല. നിങ്ങൾ ആരായിരിക്കുന്നു, നിങ്ങൾ എന്താണ് ചെയ്യുന്നത് എന്നത് നിങ്ങൾ ആരെ വിവാഹം കഴിക്കുന്നു എന്നതിനേക്കാൾ വളരെ പ്രധാനപ്പെട്ട കാര്യമാണ്. നിങ്ങൾക്ക് വേണ്ടിയുള്ള ഒരു ജീവിതം നിങ്ങൾ തന്നെ കെട്ടിപ്പടുക്കുക. ഇതിൽ മറ്റാരുടെയും ഉപദേശം കേൾക്കേണ്ടതില്ല.” – കങ്കണ റണാവത് വ്യക്തമാക്കി.
സ്ത്രീകളുടെ സാമ്പത്തിക സ്വാതന്ത്ര്യത്തെക്കുറിച്ചും കരിയറിനെക്കുറിച്ചുമുള്ള കങ്കണയുടെ ഈ തുറന്നുപറച്ചിൽ ഇപ്പോൾ സോഷ്യൽ മീഡിയയിൽ വലിയ രീതിയിൽ ചർച്ചയായി മാറിയിട്ടുണ്ട്.
Story Summary (English): Bollywood actress and MP Kangana Ranaut has reacted to the tragic suicides of a model named Tvisha in Bhopal and a young woman named Deepika in Noida, both reportedly driven by marital discord. In her Instagram story, Kangana advised young women to focus entirely on financial independence and their careers before considering marriage. Criticizing society for often abandoning married daughters in distress, she urged women to become the “heroines of their own lives,” emphasizing that self-reliance and personal achievements matter far more than marriage.
