തിരുവനന്തപുരം: കേരളത്തിന്റെ പതിനാറാമത് നിയമസഭയുടെ സ്പീക്കർ തിരഞ്ഞെടുപ്പ് ഇന്ന് നടക്കും. യുഡിഎഫിന് സഭയിൽ വ്യക്തമായ ഭൂരിപക്ഷമുള്ളതിനാൽ മുതിർന്ന കോൺഗ്രസ് നേതാവും കോട്ടയം എംഎൽഎയുമായ തിരുവഞ്ചൂർ രാധാകൃഷ്ണൻ പുതിയ സ്പീക്കറായി തിരഞ്ഞെടുക്കപ്പെടുമെന്ന് ഏകദേശം ഉറപ്പായിക്കഴിഞ്ഞു. രാവിലെ 9 മണിക്ക് സഭയ്ക്കുള്ളിൽ വോട്ടെടുപ്പ് നടപടികൾ ആരംഭിക്കും.(Kerala Assembly Speaker Election, Thiruvanchoor Radhakrishnan To Be Elected As Kerala Assembly Speaker Today)
ഇരിപ്പിടം അനുസരിച്ച് നടക്കുന്ന വോട്ടെടുപ്പിൽ മുഖ്യമന്ത്രി വി.ഡി. സതീശനായിരിക്കും ആദ്യ വോട്ട് രേഖപ്പെടുത്തുക. ഫലപ്രഖ്യാപനത്തിന് ശേഷം മുഖ്യമന്ത്രിയും പ്രതിപക്ഷ നേതാവും ചേർന്നാകും പുതിയ സ്പീക്കറെ ഡയസിലേക്ക് ആനയിക്കുക. കേരള നിയമസഭാ ചരിത്രത്തിൽ ഇന്നേവരെ ഉണ്ടാകാത്ത വിധം ഒരു ത്രികോണ മത്സരത്തിനാണ് ഇത്തവണ സ്പീക്കർ തിരഞ്ഞെടുപ്പ് സാക്ഷ്യം വഹിക്കുന്നത്.
യുഡിഎഫ്, എൽഡിഎഫ് മുന്നണികൾക്ക് പുറമെ ഇത്തവണ ബിജെപിയും മത്സരരംഗത്തുണ്ട്. 102 അംഗങ്ങളുടെ പിന്തുണയുള്ള യുഡിഎഫ് ക്യാമ്പിൽ തിരുവഞ്ചൂർ രാധാകൃഷ്ണൻ മത്സരിക്കുമ്പോൾ, തങ്ങളുടെ രാഷ്ട്രീയ നിലപാട് വ്യക്തമാക്കാനാണ് മറ്റ് മുന്നണികൾ സ്ഥാനാർത്ഥികളെ നിർത്തുന്നത്. എൽഡിഎഫ് സ്ഥാനാർത്ഥിയായി മുൻ മന്ത്രിയും കുന്നംകുളം എംഎൽഎയുമായ മുതിർന്ന സിപിഎം നേതാവ് എ.സി. മൊയ്തീൻ മത്സരിക്കും.
ചരിത്രത്തിലാദ്യമായി മൂന്ന് സീറ്റുകൾ നേടി നിയമസഭയിൽ സാന്നിധ്യമറിയിച്ച ബിജെപിയും സ്പീക്കർ സ്ഥാനത്തേക്ക് മത്സരിക്കാൻ തീരുമാനിച്ചിട്ടുണ്ട്. കൊല്ലം ചാത്തന്നൂർ മണ്ഡലത്തിൽ നിന്നും മികച്ച വിജയം കൈവരിച്ച ബി.ബി. ഗോപകുമാറാണ് ബിജെപിയുടെ സ്ഥാനാർത്ഥി. സഭയിലെ മറ്റ് ബിജെപി ജനപ്രതിനിധികളായ രാജീവ് ചന്ദ്രശേഖറും വി. മുരളീധരനും ചേർന്നാകും ഗോപകുമാറിന്റെ പേര് നിർദ്ദേശിക്കുക.
സ്പീക്കർ തിരഞ്ഞെടുപ്പിന് ശേഷം മെയ് 23 മുതൽ 28 വരെ സഭ സമ്മേളിക്കില്ല. തുടർന്ന് മെയ് 29-നാണ് ഗവർണറുടെ നയപ്രഖ്യാപന പ്രസംഗം നടക്കുക. ജൂൺ ഒന്ന് മുതൽ മൂന്ന് വരെ ഗവർണറുടെ നയപ്രഖ്യാപനത്തിന്മേലുള്ള നന്ദിപ്രമേയ ചർച്ചകൾ സഭയിൽ നടക്കും. ജൂൺ ഒന്നിനാണ് ഡെപ്യൂട്ടി സ്പീക്കർ തിരഞ്ഞെടുപ്പ് നിശ്ചയിച്ചിരിക്കുന്നത്. യുഡിഎഫ് സ്ഥാനാർത്ഥിയായി ഷാനിമോൾ ഉസ്മാൻ ഡെപ്യൂട്ടി സ്പീക്കർ പദവിയിലെത്തും.
Story Summary
The election for the Speaker of the 16th Kerala Legislative Assembly will take place today, with UDF candidate Thiruvanchoor Radhakrishnan assured of victory due to a clear majority. For the first time in history, the assembly will witness a three way contest as LDF fields A C Moideen and BJP fields B B Gopakumar. The Deputy Speaker election is scheduled for June 1st, where Shanimol Usman is expected to take charge.
