അഹമ്മദാബാദ്: കൊലപാതകക്കേസിൽ ജീവപര്യന്തം തടവിന് ശിക്ഷിക്കപ്പെട്ട്, പരോളിലിറങ്ങി 12 വർഷമായി ഒളിവിൽ കഴിഞ്ഞിരുന്ന ബോളിവുഡ് നടൻ ഒടുവിൽ പോലീസ് പിടിയിൽ (Bollywood actor arrested Ahmedabad). ‘തഗ്സ് ഓഫ് ഹിന്ദുസ്ഥാൻ’ ഉൾപ്പെടെയുള്ള പ്രമുഖ ചിത്രങ്ങളിൽ വേഷമിട്ട ഹേമന്ത് മോദി (53) എന്ന ഹേമന്ത് നാഗിന്ദാസ് പുരുഷോത്തംദാസ് വൈഷ്ണവ് ആണ് അഹമ്മദാബാദ് ക്രൈംബ്രാഞ്ചിന്റെ വലയിലായത്. അഹമ്മദാബാദിലെ ഘീകാന്ത മെട്രോ സ്റ്റേഷന് സമീപത്തുനിന്നാണ് നാടകീയമായി ഇയാളെ പോലീസ് അറസ്റ്റ് ചെയ്തത്.
2005 ജൂൺ 15-ന് രാത്രി അഹമ്മദാബാദിലെ നരോധ പ്രദേശത്തുള്ള പാർശ്വനാഥ് ടൗൺഷിപ്പിൽ വെച്ചുണ്ടായ ഭൂമി തർക്കമാണ് കേസിനാസ്പദമായ സംഭവം. തർക്കത്തെ തുടർന്ന് രണ്ട് സംഘങ്ങൾ തമ്മിലേറ്റുമുട്ടുകയും നരേന്ദ്ര (നന്നോ യശ്വന്ത് കാംബ്ലെ) എന്നയാൾ കൊല്ലപ്പെടുകയുമായിരുന്നു. ഈ കൊലപാതകക്കേസിൽ ഹേമന്ത് വൈഷ്ണവ് കുറ്റക്കാരനാണെന്ന് കണ്ടെത്തിയ കോടതി 2008 ഓഗസ്റ്റ് 27-ന് ഇയാൾക്ക് ജീവപര്യന്തം തടവുശിക്ഷ വിധിച്ചു. ഐ.പി.സി 302 (കൊലപാതകം), 120-ബി (ഗൂഢാലോചന) ഉൾപ്പെടെയുള്ള കടുത്ത വകുപ്പുകളാണ് ഇയാൾക്കെതിരെ ചുമത്തിയിരുന്നത്.
മെഹ്സാന ജയിലിൽ ശിക്ഷ അനുഭവിക്കുന്നതിനിടെയാണ് ഹേമന്ത് വൈഷ്ണവിന് 2014 ജൂലൈ 25-ന് ഗുജറാത്ത് ഹൈക്കോടതി 30 ദിവസത്തെ പരോൾ അനുവദിക്കുന്നത്. എന്നാൽ പരോൾ കാലാവധി കഴിഞ്ഞിട്ടും ഇയാൾ ജയിലിലേക്ക് തിരികെ എത്തിയില്ല. തുടർന്ന് പോലീസ് ഇയാളെ പിടികിട്ടാപ്പുള്ളിയായി പ്രഖ്യാപിക്കുകയായിരുന്നു.
ഒളിവിൽ പോയ ഹേമന്ത് മോദി പിന്നീട് തന്റെ പേരുമാറ്റി സിനിമ-ടെലിവിഷൻ രംഗത്ത് സജീവമാകുകയായിരുന്നു എന്നാണ് പുറത്തുവരുന്ന വിവരം. ഈ 12 വർഷത്തെ ഒളിവുജീവിതത്തിനിടയിലാണ് ഇയാൾ പ്രമുഖ ബോളിവുഡ് ചിത്രങ്ങളായ അമൻ ഖാൻ നായകനായ ‘തഗ്സ് ഓഫ് ഹിന്ദുസ്ഥാൻ’ (Thugs of Hindostan), രൺവീർ സിങ് ചിത്രം ‘ജയേഷ്ഭായ് ജോർദാർ’ (Jayeshbhai Jordaar) എന്നിവയിലും പ്രശസ്ത ടെലിവിഷൻ പരമ്പരയായ ‘വാഗ്ലെ കി ദുനിയ’ (Wagle Ki Duniya), വിവിധ നാടകങ്ങൾ എന്നിവയിലും വേഷമിട്ടതെന്ന് അഹമ്മദാബാദ് ക്രൈംബ്രാഞ്ച് വ്യക്തമാക്കി.
പിടികിട്ടാപ്പുള്ളികളെ കണ്ടെത്താനായി ക്രൈംബ്രാഞ്ച് നടത്തിയ പ്രത്യേക നീക്കത്തിനൊടുവിലാണ് ഹേമന്ത് മോദി പിടിയിലാകുന്നത്. പ്രതിയെ തുടർന്നുള്ള നിയമനടപടികൾക്കായി ജയിൽ അധികൃതർക്ക് കൈമാറുമെന്ന് പോലീസ് അറിയിച്ചു.
Story Summary (English): Bollywood actor Hemant Modi (53), alias Hemant Nagindas Purushottamdas Vaishnav, who was on the run for 12 years after jumping parole in a murder case, has been arrested by the Ahmedabad Crime Branch near Gheekanta Metro Station. Convicted in 2008 to life imprisonment for a 2005 land-dispute murder in Naroda, he was granted 30-day parole from Mehsana Jail in July 2014 but never returned. During his 12 years in hiding, he worked in Bollywood movies like ‘Thugs of Hindostan’, ‘Jayeshbhai Jordaar’, and the TV show ‘Wagle Ki Duniya’.
