ന്യൂഡൽഹി: ആഫ്രിക്കൻ രാജ്യങ്ങളിൽ എബോള വൈറസ് ബാധ റിപ്പോർട്ട് ചെയ്ത സാഹചര്യത്തിൽ, ഈ മാസം അവസാനം ന്യൂഡൽഹിയിൽ നടത്താനിരുന്ന നാലാമത് ഇന്ത്യ-ആഫ്രിക്കൻ യൂണിയൻ ഫോറം ഉച്ചകോടി മാറ്റിവെച്ചു (India African Union Forum Summit Postponed). മേയ് 28 മുതൽ നടത്താനിരുന്ന ഉച്ചകോടിയാണ് ആഫ്രിക്കയിലെ നിലവിലെ ആരോഗ്യ സാഹചര്യം കണക്കിലെടുത്ത് ഇരുവിഭാഗവും സംയുക്തമായി തീരുമാനിച്ചതിനെ തുടർന്ന് മാറ്റിയത്. ഡെമോക്രാറ്റിക് റിപ്പബ്ലിക് ഓഫ് കോംഗോയിലെ സൗത്ത് കിവു പ്രവിശ്യയിലാണ് ഏറ്റവും ഒടുവിൽ മാരകമായ എബോള വൈറസ് ബാധ സ്ഥിരീകരിച്ചത്. ഇതേത്തുടർന്ന് ആഫ്രിക്കൻ യൂണിയൻ ചെയർപേഴ്സണും കേന്ദ്ര സർക്കാരും തമ്മിൽ നടത്തിയ ചർച്ചകൾക്ക് ശേഷമാണ് പുതിയ തീയതികളിലേക്ക് ഉച്ചകോടി മാറ്റാൻ തീരുമാനിച്ചത്.
ഇന്ത്യയിൽ ഇതുവരെ എബോള കേസുകളൊന്നും റിപ്പോർട്ട് ചെയ്തിട്ടില്ലെങ്കിലും കേന്ദ്ര ആരോഗ്യ മന്ത്രാലയം രാജ്യത്തുടനീളം ജാഗ്രത ശക്തമാക്കിയിട്ടുണ്ട്. ആഫ്രിക്കയിലെ എബോള വ്യാപനത്തെ ലോകാരോഗ്യ സംഘടന അന്താരാഷ്ട്ര പ്രാധാന്യമുള്ള പൊതുജനാരോഗ്യ അടിയന്തരാവസ്ഥയായി പ്രഖ്യാപിച്ചതിന് പിന്നാലെയാണിത്. വിമാനത്താവളങ്ങളിലും തുറമുഖങ്ങളിലും എത്തുന്ന യാത്രക്കാരുടെ പ്രീ-അറൈവൽ, പോസ്റ്റ്-അറൈവൽ സ്ക്രീനിംഗ്, ക്വാറന്റൈൻ പ്രോട്ടോക്കോൾ എന്നിവ കർശനമായി പാലിക്കാൻ സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കും കേന്ദ്ര സർക്കാർ നിർദ്ദേശം നൽകി. മുൻപ് പടർന്നുപിടിച്ച അതിതീവ്രമായ ‘സൈർ’ വകഭേദത്തെ അപേക്ഷിച്ച് മാരകശേഷി കുറഞ്ഞ ‘ബുന്ദിബുഗ്യോ’ വകഭേദമാണ് ഇപ്പോൾ കോംഗോയിൽ പടരുന്നതെന്നാണ് വിദഗ്ധർ വ്യക്തമാക്കുന്നത്.
Summary: The Fourth India-Africa Forum Summit, scheduled to be held in New Delhi from May 28, has been postponed due to a resurging Ebola outbreak in several parts of Africa. The decision followed high-level consultations between New Delhi and the African Union Commission after the WHO declared the situation a public health emergency. Driven primarily by the Bundibugyo strain in the Democratic Republic of Congo, the outbreak has prompted India—which has no reported cases—to enforce strict airport screenings, quarantine protocols, and institutional preparedness across all states.
