ന്യൂഡൽഹി: മുൻ പ്രധാനമന്ത്രി രാജീവ് ഗാന്ധിയുടെ 35-ാം ചരമവാർഷിക ദിനത്തിൽ വികാരനിർഭരമായ ഓർമ്മക്കുറിപ്പും കുട്ടിക്കാലത്തെ ചിത്രവും പങ്കുവെച്ച് കോൺഗ്രസ് നേതാവ് രാഹുൽ ഗാന്ധി. അച്ഛൻ വിഭാവനം ചെയ്ത നൈപുണ്യമുള്ളതും സമൃദ്ധവും ശക്തവുമായ ഒരു ഇന്ത്യ കെട്ടിപ്പടുക്കുക എന്ന ദൗത്യം താൻ പൂർണ്ണ ഉത്തരവാദിത്തത്തോടെ മുന്നോട്ട് കൊണ്ടുപോകുമെന്ന് രാഹുൽ ഗാന്ധി പ്രതിജ്ഞചെയ്തു.(Rajiv Gandhi 35th Death Anniversary, Rahul Gandhi Pays Moving Tribute To Father )
പപ്പാ, നിങ്ങൾ വിഭാവനം ചെയ്ത നൈപുണ്യമുള്ളതും സമൃദ്ധവും ശക്തവുമായ ഒരു ഇന്ത്യ എന്ന സ്വപ്നം സാക്ഷാത്കരിക്കാനുള്ള ഉത്തരവാദിത്തം ഞാൻ പൂർണ്ണമായും ഏറ്റെടുക്കുന്നു. നിങ്ങളുടെ പാഠങ്ങളും മൂല്യങ്ങളും ഓർമ്മകളും എപ്പോഴും എന്നോടൊപ്പമുണ്ടാകും, രാഹുൽ ഗാന്ധി എക്സിൽ കുറിച്ചു. രാവിലെ ഡൽഹിയിലെ വീർ ഭൂമിയിലെത്തി രാഹുൽ ഗാന്ധി രാജീവ് ഗാന്ധിയുടെ സ്മൃതിമണ്ഡപത്തിൽ പുഷ്പാർച്ചന നടത്തിയിരുന്നു.
1991 മെയ് 21-ന് തന്റെ 46-ാം വയസ്സിലാണ് രാജീവ് ഗാന്ധി ഭീകരരുടെ ചാവേർ ബോംബാക്രമണത്തിൽ കൊല്ലപ്പെടുന്നത്. സോണിയാ ഗാന്ധി, പ്രിയങ്കാ ഗാന്ധി വാദ്ര, കോൺഗ്രസ് അധ്യക്ഷൻ മല്ലികാർജുൻ ഖാർഗെ, എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ തുടങ്ങിയ പ്രമുഖ നേതാക്കളും വീർ ഭൂമിയിലെത്തി ആദരമർപ്പിച്ചു.
രാജീവ് ഗാന്ധിയുടെ വിഖ്യാതമായ വാക്കുകൾ ഉദ്ധരിച്ചാണ് മല്ലികാർജുൻ ഖാർഗെ അദ്ദേഹത്തെ അനുസ്മരിച്ചത്: “ഇന്ത്യ ഒരു പുരാതന രാജ്യമാണ്, എന്നാൽ ഒരു യുവ രാഷ്ട്രമാണ്. ശക്തവും സ്വതന്ത്രവും സ്വയംപര്യാപ്തവുമായ, ലോകരാഷ്ട്രങ്ങളുടെ മുൻനിരയിൽ മാനവികതയെ സേവിക്കുന്ന ഒരു ഇന്ത്യയാണ് ഞാൻ സ്വപ്നം കാണുന്നത്.” ഭാരതരത്ന രാജീവ് ഗാന്ധിയുടെ രക്തസാക്ഷിത്വ ദിനത്തിൽ രാജ്യം അദ്ദേഹത്തിന് ആദരവ് അർപ്പിക്കുന്നതായി ഖാർഗെ കൂട്ടിച്ചേർത്തു. പ്രധാനമന്ത്രി നരേന്ദ്ര മോദിയും മുൻ പ്രധാനമന്ത്രിക്ക് ആദരാഞ്ജലികൾ അർപ്പിച്ചു. “മുൻ പ്രധാനമന്ത്രി ശ്രീ രാജീവ് ഗാന്ധി ജിയുടെ ചരമവാർഷികത്തിൽ അദ്ദേഹത്തിന് പ്രണാമം അർപ്പിക്കുന്നു,” പ്രധാനമന്ത്രി എക്സിൽ കുറിച്ചു.
Story Summary
On the 35th death anniversary of former Prime Minister Rajiv Gandhi, his son Rahul Gandhi paid a moving tribute at Veer Bhumi, vowing to fulfill his father’s dream of a strong and prosperous India. Top Congress leaders, including Sonia Gandhi and Mallikarjun Kharge, along with Prime Minister Narendra Modi, also paid rich tributes to the late leader who was assassinated on May 21, 1991.
