കൊച്ചി: തന്റെ അറുപത്തിയാറാം ജന്മദിനത്തിൽ ആരാധകർക്ക് ഇരട്ടി മധുരം നൽകി സൂപ്പർതാരം മോഹൻലാൽ തീയേറ്ററിലെത്തി. ദൃശ്യം പരമ്പരയിലെ ഏറ്റവും പുതിയ ചിത്രമായ ‘ദൃശ്യം 3’ ആരാധകർക്കൊപ്പം കാണാനായി കൊച്ചിയിലെ പ്രശസ്തമായ കവിത തീയേറ്ററിലാണ് താരം എത്തിയത്. ഭാര്യ സുചിത്രയും മോഹൻലാലിനൊപ്പം സിനിമ കാണാൻ എത്തിയിരുന്നു.(Mohanlal Watches Drishyam 3 With Fans At Kochi Theater On His Birthday)
മഞ്ഞ ഷർട്ട് ധരിച്ച് തീയേറ്ററിലേക്ക് എത്തിയ പ്രിയതാരത്തെ ആരാധകർ ആവേശത്തോടെയാണ് വരവേറ്റത്. ലാലേട്ടന് ജന്മദിനാശംസകൾ നേർന്നുകൊണ്ടുള്ള പോസ്റ്ററുകളുമായി ആരാധകർ തടിച്ചുകൂടിയിരുന്നു. ‘ഹാപ്പി ബർത്ത് ഡേ ലാലേട്ടാ’ എന്നും ഇവയിലുണ്ടായിരുന്നു. നേരത്തെ ചിത്രത്തിന്റെ പ്രൊമോഷൻ ചടങ്ങുകൾക്കിടെ താൻ സിനിമ കാണാൻ നേരിട്ടെത്തുമെന്ന് മോഹൻലാൽ ഉറപ്പുനൽകിയിരുന്നു.
ജോർജുകുട്ടിയുടെ മൂന്നാം വരവ് എങ്ങനെയുണ്ടാകും എന്നറിയാനുള്ള കടുത്ത ആകാംക്ഷയിലാണ് പ്രേക്ഷകർ തീയേറ്ററുകളിലേക്ക് ഒഴുകിയെത്തുന്നത്. 2013-ൽ റിലീസ് ചെയ്ത ആദ്യ ഭാഗത്തിന് ശേഷം ഇന്നും തീയേറ്ററുകളിൽ ദൃശ്യം തരംഗം തുടരുകയാണ്. മോഹൻലാലിനൊപ്പം മീന, എസ്തർ അനിൽ, അൻസിബ ഹസ്സൻ, സിദ്ദിഖ്, ആശ ശരത് എന്നിവരും ഈ മൂന്നാം ഭാഗത്തിലും തങ്ങളുടെ കഥാപാത്രങ്ങളായി സ്ക്രീനിൽ തിളങ്ങുന്നുണ്ട്.
Story Summary
On his 66th birthday, superstar Mohanlal, accompanied by his wife Suchitra, visited Kavitha Theater in Kochi to watch the newly released ‘Drishyam 3’ along with his fans. Fans gathered in massive numbers with birthday posters to welcome the actor, celebrating both his special day and the highly anticipated return of his iconic character, Georgekutty.
