ചെന്നൈ: തമിഴ്നാട് രാഷ്ട്രീയത്തിൽ നിർണായക വഴിത്തിരിവ് സമ്മാനിച്ച് 59 വർഷത്തെ നീണ്ട ഇടവേളയ്ക്ക് ശേഷം കോൺഗ്രസ് പ്രതിനിധികൾ മന്ത്രിസഭയിലേക്ക് (Tamil Nadu cabinet expansion). എം.എൽ.എമാരായ പി. വിശ്വനാഥൻ, രാജേഷ് കുമാർ എന്നിവർ നാളെ മന്ത്രിമാരായി സത്യപ്രതിജ്ഞ ചെയ്ത് അധികാരമേൽക്കും. മേലൂർ മണ്ഡലത്തിൽ നിന്ന് ജനവിധി തേടിയ പി. വിശ്വനാഥൻ, തമിഴ്നാട്ടിൽ ജനറൽ സീറ്റിൽ മത്സരിച്ച് വിജയിച്ച ഏക ദളിത് സ്ഥാനാർഥിയാണ്. കിള്ളിയൂർ മണ്ഡലത്തെ പ്രതിനിധീകരിക്കുന്ന രാജേഷ് കുമാർ നിലവിൽ കോൺഗ്രസിന്റെ നിയമസഭാ കക്ഷി നേതാവാണ്.
മന്ത്രിസഭാ വികസനത്തിലൂടെ പുതിയ സർക്കാരിൽ ഇരുപതിലധികം മന്ത്രിമാരുണ്ടാകുമെന്നാണ് പുറത്തുവരുന്ന സൂചനകൾ. സഖ്യകക്ഷികളായ വി.സി.കെ.യും (VCK) മുസ്ലിം ലീഗും വൈകാതെ തന്നെ മന്ത്രിസഭയുടെ ഭാഗമാകുമെന്ന് ഭരണകക്ഷിയായ ടി.വി.കെ. (TVK) പ്രത്യാശ പ്രകടിപ്പിച്ചു. നാളെ രാവിലെ 10 മണിക്ക് ചെന്നൈ രാജ്ഭവനിൽ നടക്കുന്ന പ്രൗഢഗംഭീരമായ ചടങ്ങിൽ ഗവർണറുടെ ചുമതലയുള്ള ആർ. വി. ആർലേക്കർ പുതിയ മന്ത്രിമാർക്ക് സത്യവാചകം ചൊല്ലിക്കൊടുക്കും.
കോൺഗ്രസ് മന്ത്രിമാർക്കുള്ള വകുപ്പുകൾ സംബന്ധിച്ച് ഇപ്പോഴും ചർച്ചകൾ പുരോഗമിക്കുകയാണ്. കൃഷി, ഉന്നത വിദ്യാഭ്യാസം, റവന്യൂ തുടങ്ങിയ സുപ്രധാന വകുപ്പുകളിൽ ഇതുവരെ അന്തിമ തീരുമാനമായിട്ടില്ല. വരാനിരിക്കുന്ന തദ്ദേശ സ്വയംഭരണ തെരഞ്ഞെടുപ്പിൽ സഖ്യം കൂടുതൽ ശക്തമാക്കാൻ കോൺഗ്രസിനെ ഭരണത്തിൽ പങ്കാളികളാക്കിയതിലൂടെ സാധിക്കുമെന്നാണ് ടി.വി.കെ. നേതൃത്വത്തിന്റെ വിലയിരുത്തൽ.
അതേസമയം , അണ്ണാഡിഎംകെയിലെ (AIADMK) വിമത വിഭാഗത്തെ ഇപ്പോൾ മന്ത്രിസഭയിൽ ഉൾപ്പെടുത്തേണ്ടതില്ലെന്ന് മുഖ്യമന്ത്രി വിജയ് തീരുമാനിച്ചതായാണ് റിപ്പോർട്ടുകൾ. സഖ്യകക്ഷികളായ വി.സി.കെ.യും സി.പി.എമ്മും (CPM) ഇതിനെ ശക്തമായി എതിർത്ത സാഹചര്യത്തിലാണ് മുഖ്യമന്ത്രിയുടെ ഈ പിന്മാറ്റം. അണ്ണാഡിഎംകെ വിമത അംഗങ്ങളെ മന്ത്രിസഭയിലെടുത്താൽ സർക്കാരിനുള്ള പിന്തുണ പിൻവലിക്കുമെന്ന് സി.പി.എം. മുന്നറിയിപ്പ് നൽകിയിരുന്നു.
Story Summary (English): In a historic political development in Tamil Nadu, Congress is set to join the state cabinet after a gap of 59 years. Congress MLAs P. Viswanathan and Rajesh Kumar will take oath as ministers tomorrow at Raj Bhavan. Viswanathan, who won from Melur, is the only Dalit candidate to win from a general seat, while Killiyoor MLA Rajesh Kumar is the Congress legislative party leader. The TVK-led government’s cabinet expansion comes ahead of local body polls. Meanwhile, Chief Minister Vijay reportedly dropped plans to include AIADMK rebels following strong opposition from coalition allies VCK and CPM.
