ഗാസ സിറ്റി: ഉപരോധം നേരിടുന്ന ഗാസയിലേക്ക് മാനുഷിക സഹായങ്ങളുമായി പുറപ്പെട്ട കപ്പലുകൾ അന്താരാഷ്ട്ര സമുദ്രപരിധിയിൽ വെച്ച് ഇസ്രായേൽ സൈന്യം തടയുകയും സമാധാന പ്രവർത്തകരെ തടവിലാക്കുകയും ചെയ്തതിൽ പ്രതിഷേധിച്ച് 87 പേർ ജയിലിൽ നിരാഹാര സമരം ആരംഭിച്ചു (Gaza Aid Flotilla Intercepted Hunger Strik). ‘ഗ്ലോബൽ സുമൂദ് ഫ്ലോട്ടില്ല’ (Global Sumud Flotilla) എന്ന സന്നദ്ധ കൂട്ടായ്മയുടെ നേതൃത്വത്തിൽ ഗാസയിലെ ജനങ്ങൾക്ക് അവശ്യവസ്തുക്കൾ എത്തിക്കാൻ പുറപ്പെട്ട കപ്പലുകളിലെ അവസാനത്തെ ബോട്ട് ആയ ‘ലിന അൽ നബുൽസി’ കൂടി ചൊവ്വാഴ്ച രാത്രി ഇസ്രായേൽ കസ്റ്റഡിയിലെടുത്തതിന് പിന്നാലെയാണ് സമരം പ്രഖ്യാപിച്ചത്. തങ്ങളെ നിയമവിരുദ്ധമായി തടവിലാക്കിയതിനെതിരെയും ഇസ്രായേൽ ജയിലുകളിൽ കഴിയുന്ന ഒൻപതിനായിരത്തിലധികം വരുന്ന ഫലസ്തീൻ തടവുകാർക്ക് ഐക്യദാർഢ്യം പ്രഖ്യാപിച്ചുമാണ് നിരാഹാരമെന്ന് സംഘാടകർ വ്യക്തമാക്കി.
കഴിഞ്ഞ ആഴ്ച തുർക്കിയിലെ മാർമറിസ് തുറമുഖ നഗരത്തിൽ നിന്നാണ് ഗാസയിലെ ഇസ്രായേൽ ഉപരോധം ലംഘിക്കുക എന്ന ലക്ഷ്യത്തോടെ അമ്പതിലധികം കപ്പലുകൾ യാത്ര തിരിച്ചത്. സൈപ്രസ് തീരത്തിന് സമീപം അന്താരാഷ്ട്ര കടൽ അതിർത്തിയിൽ വെച്ച് ഇസ്രായേൽ സൈന്യം കപ്പലുകൾ വളയുകയും റബ്ബർ ബുള്ളറ്റുകൾ ഉപയോഗിച്ച് ആക്രമണം നടത്തുകയുമായിരുന്നു. കപ്പലുകളിലുണ്ടായിരുന്ന 430 ഓളം വരുന്ന മുഴുവൻ സമാധാന പ്രവർത്തകരെയും ഇസ്രായേൽ സൈനിക കപ്പലുകളിലേക്ക് മാറ്റിയിട്ടുണ്ടെന്നും ഇവരെ കോൺസുലർ പ്രതിനിധികളെ കാണാൻ അനുവദിക്കുമെന്നും ഇസ്രായേൽ വിദേശകാര്യ മന്ത്രാലയം സ്ഥിരീകരിച്ചു. തടവിലാക്കപ്പെട്ടവരിൽ ഒൻപത് ഇന്തോനേഷ്യൻ പൗരന്മാരും അയർലൻഡ് പ്രസിഡന്റ് കാതറിൻ കോണോളിയുടെ സഹോദരി ഡോ. മാർഗരറ്റ് കോണോളി ഉൾപ്പെടെ 15 ഐറിഷ് പൗരന്മാരും ഉൾപ്പെടുന്നു. തുർക്കി, സ്പെയിൻ, ജോർദാൻ, പാകിസ്ഥാൻ, ബംഗ്ലാദേശ്, ഇന്തോനേഷ്യ തുടങ്ങിയ രാജ്യങ്ങൾ ഇസ്രായേലിന്റെ ഈ നടപടി അന്താരാഷ്ട്ര നിയമങ്ങളുടെ ലംഘനമാണെന്ന് കുറ്റപ്പെടുത്തി രംഗത്തെത്തിയിട്ടുണ്ട്.
Summary: At least 87 activists detained by Israeli forces from a Gaza-bound humanitarian aid flotilla have launched a hunger strike in protest of their illegal abduction and in solidarity with Palestinian prisoners. The strike began after Israeli forces intercepted the “Lina al-Nabulsi,” the final boat among more than 50 vessels that sailed from Turkiye to break the naval blockade of the Gaza Strip.
