ചെന്നൈ: തനിക്കെതിരെ പരോക്ഷമായി ‘ഇഡ്ഡലി നടി’ എന്ന വിവാദ പരാമർശം നടത്തിയ നിർമ്മാതാവ് രവി മോഹനെതിരെ കടുത്ത ഭാഷയിൽ പ്രതികരിച്ച് നടി ഖുശ്ബു സുന്ദർ (Khushbu Sundar counter attack Ravi Mohan). വിശ്വാസവഞ്ചന കാണിക്കുന്നവർ അത് തങ്ങളുടെ രക്തത്തിലുള്ളതാണെന്ന് വീണ്ടും തെളിയിക്കുകയാണെന്നും, മറ്റുള്ളവരുടെ ജീവിതത്തിൽ മുറിവേൽപ്പിക്കുന്നവർ അതിന്റെ കടുത്ത പ്രത്യാഘാതങ്ങൾ ഭാവിയിൽ നേരിടേണ്ടി വരുമെന്നും ഖുശ്ബു സോഷ്യൽ മീഡിയയിൽ പങ്കുവെച്ച കുറിപ്പിലൂടെ മുന്നറിയിപ്പ് നൽകി.
തന്റെ വ്യക്തിജീവിതവുമായി ബന്ധപ്പെട്ട കാര്യങ്ങൾ സംസാരിക്കാൻ വിളിച്ചുചേർത്ത വാർത്താസമ്മേളനത്തിലാണ് രവി മോഹൻ ഖുശ്ബുവിനെ ലക്ഷ്യമിട്ട് വിവാദ പ്രസ്താവന നടത്തിയത്.
ബൈബിൾ വചനങ്ങൾ ഉദ്ധരിച്ചായിരുന്നു ഖുശ്ബുവിന്റെ ശക്തമായ പ്രതികരണം:
“ബൈബിൾ വചനങ്ങളിൽ വിശ്വസിക്കുന്നു എന്ന് പറയുന്നവർ ഒരു കാര്യം മനസ്സിലാക്കണം, നിങ്ങളുടേതല്ലാത്ത ഒന്നും കൈക്കലാക്കരുത്. ഒരാൾ വിശ്വാസവഞ്ചന കാണിക്കുന്നതിലും മോഷ്ടിക്കുന്നതിലും അത്ഭുതപ്പെടാനൊന്നുമില്ല. ചതിക്കുക എന്നത് തങ്ങളുടെ രക്തത്തിൽ ഉള്ളതാണെന്ന് അവർ വീണ്ടും തെളിയിക്കുകയാണ്. വഞ്ചനയുടെ ലോകമാണ് അവർക്ക് ഏറ്റവും സുഖകരമായ ഇടം.”
“തന്റെ യഥാർത്ഥ സ്വഭാവം പുറത്തെടുത്ത്, താൻ ഏത് നിലവാരത്തിൽ നിന്നാണ് വരുന്നതെന്ന് ലോകത്തിന് കാണിച്ചുതന്ന ആ ഒരു മനുഷ്യത്വവഹീനനെ കുറ്റപ്പെടുത്തിയിട്ട് ഒരു കാര്യവുമില്ല. എന്നാൽ, അണിയറയിൽ ഒളിച്ചിരുന്ന് ഇങ്ങനെയുള്ളവർക്ക് വിഷം തുപ്പാൻ വേദി ഒരുക്കി നൽകിയ ആളെയാണ് ഞാൻ കുറ്റപ്പെടുത്തുന്നത്.”
മുറിവുകൾ നിലനിൽക്കും: നിങ്ങളുടെ തീരുമാനങ്ങൾക്ക് അതിന്റേതായ പ്രത്യാഘാതങ്ങൾ ഉണ്ടാകുമെന്നും നിങ്ങൾ ഏൽപ്പിക്കുന്ന മുറിവുകൾ ഒരു ആയുസ്സുടനീളം നിലനിൽക്കുമെന്നും ഓർക്കുക. ഹൃദയവിശുദ്ധിയും ശുദ്ധമായ ചിന്തകളുമുള്ളവർ ദൈവത്തോട് ചേർന്നുനിൽക്കുമെന്നാണ് ബൈബിൾ പറയുന്നതെന്നും ഖുശ്ബു കുറിച്ചു.
രവി മോഹൻ നടത്തിയ വാർത്താസമ്മേളനമാണ് നിലവിലെ വിവാദങ്ങൾക്ക് ആധാരം. തന്റെ കുടുംബം തകർത്തതിന് പിന്നിൽ മൂന്നക്ഷരമുള്ള ഒരു ‘ഇഡ്ഡലി നടി’ ആണെന്നും, ഫെമിനിസത്തിന്റെ മറവിൽ ഒളിച്ചിരിക്കുന്ന ഇവർ മുൻപും പല പ്രമുഖ നടന്മാരുടെയും ദാമ്പത്യം തകർത്തിട്ടുണ്ടെന്നും അദ്ദേഹം ആരോപിച്ചിരുന്നു. തമിഴ്നാട്ടിൽ ഖുശ്ബുവിന്റെ പേരിൽ പണ്ട് ‘ഖുശ്ബു ഇഡ്ഡലി’ പ്രശസ്തമായിരുന്നതിനെ മുൻനിർത്തിയാണ് ഇയാൾ ‘ഇഡ്ഡലി നടി’ എന്ന് പരോക്ഷമായി അധിക്ഷേപിച്ചത്.
രവി മോഹന്റെ മുൻഭാര്യ ആർതിയുമായി വളരെ അടുത്ത സൗഹൃദം പുലർത്തുന്ന വ്യക്തിയാണ് ഖുശ്ബു. ആർതിയുമായുള്ള വേർപിരിയലിന് പിന്നിൽ ഖുശ്ബുവാണെന്ന രീതിയിൽ രവി മോഹൻ സംസാരിച്ചതാണ് നടിയെ ചൊടിപ്പിച്ചത്. കോളിവുഡിൽ ഈ വാക്പോര് ഇപ്പോൾ വലിയ ചർച്ചയായി മാറിയിരിക്കുകയാണ്.
Story Summary (English): Actress Khushbu Sundar has hit back at producer Ravi Mohan following his derogatory ‘Idli actress’ remarks targeted at her. In an emotional social media post, Khushbu stated that betrayal is in some people’s blood and warned that those who wound others will face the consequences. The controversy erupted after Ravi Mohan, during a press meet, indirectly blamed a “three-lettered Idli actress” for ruining his married life. Notably, Khushbu is a close friend of Ravi Mohan’s ex-wife, Aarti.
