റിപ്പോർട്ട്: അൻവർ ഷരിഫ്
മലപ്പുറം: അമ്മ മലയാളം സാഹിത്യവേദിയുടെ രണ്ടാമത് പി. റഷീദ് ഖാൻ സ്മാരക സാഹിത്യ പുരസ്കാരം പ്രമുഖ എഴുത്തുകാരിയും സംവിധായികയുമായ ഫർസാനയ്ക്ക് സമർപ്പിച്ചു. ഫർസാന രചിച്ച ‘കിള’ എന്ന നോവലാണ് ഈ വർഷത്തെ പുരസ്കാരത്തിന് അർഹമായത് (P Rasheed Khan Memorial Literary Award). ഇരുപതിനായിരം രൂപയും പ്രശസ്തി പത്രവും ഫലകവുമടങ്ങുന്നതാണ് അവാർഡ്. തിരുവനന്തപുരം ശ്രീകാര്യം കരുമ്പുക്കോണം മുടിപ്പുര ക്ഷേത്ര ഹാളിൽ വെച്ച് നടന്ന പ്രൗഢഗംഭീരമായ ചടങ്ങിൽ പ്രശസ്ത എഴുത്തുകാരനും പ്രഭാഷകനുമായ പ്രൊഫസർ വി. കാർത്തികേയൻ നായർ പുരസ്കാരം ഫർസാനയ്ക്ക് കൈമാറി.
അമ്മ മലയാളം സാഹിത്യവേദി പ്രസിഡന്റ് മോഹൻ ഡി. കല്ലമ്പള്ളി അദ്ധ്യക്ഷത വഹിച്ച ചടങ്ങിൽ സെക്രട്ടറി ഫൽഗുനൻ വടവുകോട് സ്വാഗതവും അഖിൽ നന്ദിയും രേഖപ്പെടുത്തി. മലപ്പുറം സ്വദേശിയായ ഫർസാന ചെറുകഥാകൃത്ത്, നോവലിസ്റ്റ്, കോളമിസ്റ്റ്, സംവിധായിക എന്നീ നിലകളിൽ സാംസ്കാരിക രംഗത്ത് ഇതിനകം തന്നെ ശ്രദ്ധേയമായ വ്യക്തിമുദ്ര പതിപ്പിച്ചിട്ടുണ്ട്.
ഫർസാനയുടെ ‘എൽമ’ എന്ന നോവലിന് ആദ്യത്തെ ‘മ’ ലിറ്റററി അവാർഡും നൂറനാട് ഹനീഫ് പുരസ്കാരവും ലഭിച്ചിട്ടുണ്ട്. കൂടാതെ ‘ഇസ്തിഗ്ഫാർ’ എന്ന കഥയ്ക്ക് സംസ്കൃതി ശ്രീരാമൻ ചെറുകഥാ പുരസ്കാരവും, ‘വേട്ടാള’ എന്ന കഥാ സമാഹാരത്തിന് എ. മഹ്മൂദ് പുരസ്കാരം, ടി. വി. കെ. കുറുപ്പ് പുരസ്കാരം, വിപഞ്ചിക-കടാതി ഷാജി പുരസ്കാരം, മഹാകവി ടി. ഉബൈദ് പുരസ്കാരം എന്നിവയും ലഭിച്ചിട്ടുണ്ട്. ചാലിയാർ സമരത്തിന് നേതൃത്വം നൽകിയ പ്രമുഖ സാമൂഹിക പ്രവർത്തകൻ കെ. എ. റഹ്മാന്റെ ജീവിതം ആസ്പദമാക്കി ഫർസാന സംവിധാനം ചെയ്ത ‘അദ്രയി’ എന്ന ഡോക്യുമെന്ററി ഐ.ഡി.എസ്.എഫ്.എഫ്.കെ (IDSFFK) ഉൾപ്പെടെ നിരവധി പ്രശസ്തമായ അന്താരാഷ്ട്ര ചലച്ചിത്ര മേളകളിൽ പ്രദർശിപ്പിച്ച് ശ്രദ്ധ നേടിയിട്ടുള്ളതാണ്.
Summary: Writer and director Farzana was honored with the second P. Rasheed Khan Memorial Literary Award by Amma Malayalam Sahithyavedi for her acclaimed novel Kila. The award, which includes a cash prize of twenty thousand rupees, a citation, and a plaque, was presented by noted writer and orator Professor V. Karthikeyan Nair during a ceremony held at Sreekaryam Mudippura Temple Hall in Thiruvananthapuram.
