തിരുവനന്തപുരം: നിയമസഭാ തിരഞ്ഞെടുപ്പിലെ കനത്ത പരാജയത്തിന് പിന്നാലെ, നിലവിലെ തിരിച്ചടികളെ അതിജീവിച്ച് എൽ ഡി എഫ് കൂടുതൽ കരുത്തോടെ രാഷ്ട്രീയമായി തിരിച്ചുവരുമെന്ന് സി.പി.എം സംസ്ഥാന സെക്രട്ടറി എം. വി. ഗോവിന്ദൻ. ഇ. കെ. നായനാരുടെ ഓർമ്മദിനവുമായി ബന്ധപ്പെട്ട് എഴുതിയ ലേഖനത്തിലാണ് തിരഞ്ഞെടുപ്പ് പരാജയത്തിന്റെ പശ്ചാത്തലത്തിലുള്ള പാർട്ടി സെക്രട്ടറിയുടെ നിർണായക വിലയിരുത്തലുകൾ.(M V Govindan Article Over CPM Election Defeat And UDF BJP Alliance Allegations)
സംസ്ഥാനത്തെ അതിദാരിദ്ര്യമുക്തമാക്കാനും ആഗോളവത്കരണ നയങ്ങളുടെ ഭാഗമായി പിന്നാക്കം പോയ 30 ശതമാനത്തോളം വരുന്ന ജനവിഭാഗങ്ങളെ മുൻനിരയിലേക്ക് കൊണ്ടുവരാനും എൽ.ഡി.എഫ് സർക്കാരിന് സാധിച്ചിരുന്നു. തുടർഭരണത്തിലൂടെ കേരളത്തിൽ വലിയ വികസനക്കുതിപ്പ് ഉണ്ടാക്കിയിട്ടും എന്തുകൊണ്ടാണ് ജനങ്ങൾ തിരഞ്ഞെടുപ്പിൽ ഇടതുമുന്നണിയെ കൈവിട്ടതെന്ന കാര്യത്തിൽ പാർട്ടിക്ക് ഉള്ളിൽ കടുത്ത പരിശോധനയും സ്വയംവിമർശനവും നടക്കുന്ന ഘട്ടമാണിതെന്നും അദ്ദേഹം വ്യക്തമാക്കി.
തിരഞ്ഞെടുപ്പിൽ യു.ഡി.എഫ് നേടിയ വിജയത്തിന് പിന്നിൽ ബി.ജെ.പി അടക്കമുള്ള വർഗ്ഗീയ ശക്തികളുമായുള്ള അവിശുദ്ധ കൂട്ടുകെട്ടാണെന്ന് എം. വി. ഗോവിന്ദൻ ആരോപിച്ചു. ബി.ജെ.പി വിജയിച്ച മണ്ഡലങ്ങളിൽ യു.ഡി.എഫ് മൂന്നാം സ്ഥാനത്തേക്ക് പിന്തള്ളപ്പെട്ടത് ഈ വോട്ട് കച്ചവടത്തിന് തെളിവാണെന്ന് അദ്ദേഹം ചൂണ്ടിക്കാട്ടി. കേരളം പോലുള്ള ഒരു മതേതര സംസ്ഥാനത്ത് വർഗ്ഗീയ ശക്തികൾ തലപൊക്കുന്നത് വരാനിരിക്കുന്ന വലിയ വിപത്തിന്റെ സൂചനയാണെന്നും ഇതിനെതിരെ ജാഗ്രതയോടെ മുന്നോട്ട് പോകണമെന്നും ലേഖനത്തിൽ പറയുന്നു.
ഇടതുപക്ഷത്തിന് മുൻപും വലിയ തിരിച്ചടികൾ ഉണ്ടായിട്ടുണ്ടെന്നും എന്നാൽ അതിനെയെല്ലാം ജനങ്ങളെ ചേർത്തുപിടിച്ച് പാർട്ടി അതിജീവിച്ചിട്ടുണ്ടെന്നും അദ്ദേഹം ഓർമ്മിപ്പിച്ചു. അടിയന്തരാവസ്ഥയ്ക്ക് ശേഷം നടന്ന തിരഞ്ഞെടുപ്പിൽ സി.പി.എമ്മിന് കേവലം 17 സീറ്റുകൾ മാത്രമാണ് ഉണ്ടായിരുന്നത്. പിന്നീട് 2001-ൽ എൽ.ഡി.എഫ് 40 സീറ്റുകളിലേക്ക് ഒതുങ്ങിപ്പോയ ചരിത്രവുമുണ്ട്. എന്നാൽ തൊട്ടടുത്ത തിരഞ്ഞെടുപ്പുകളിൽ 99 സീറ്റുകളിലേക്ക് വരെ വൻ തിരിച്ചുവരവ് നടത്താൻ കഴിഞ്ഞ രാഷ്ട്രീയ പാരമ്പര്യമാണ് കമ്മ്യൂണിസ്റ്റ് പാർട്ടിക്കുള്ളത്. നിലവിലെ പോരായ്മകൾ കൃത്യമായി പരിശോധിച്ച് തിരുത്തി മുന്നോട്ട് പോകാൻ ഇ. കെ. നായനാരുടെ ഓർമ്മകൾ ഇടതുപക്ഷത്തിന് കരുത്ത് പകരുമെന്നും എം. വി. ഗോവിന്ദൻ കൂട്ടിച്ചേർത്തു.
Story Summary
CPM State Secretary M V Govindan stated in a article on E K Nayanar’s death anniversary that LDF will bounce back stronger from the recent election defeat. He alleged that UDF won multiple seats through an unholy alliance with the BJP, while affirming that the CPM is undergoing a thorough introspection to rectify its flaws based on historical comebacks.
