മൂന്നാർ: സിനിമയിലെ താരജാഡകൾ ഒന്നുമില്ലാതെ മൂന്നാർ തലയാർ എസ്റ്റേറ്റിലെ തോട്ടം തൊഴിലാളികൾക്ക് സർപ്രൈസ് നൽകി തെന്നിന്ത്യയുടെ പ്രിയ താരം ചിയാൻ വിക്രം (Chiyaan Vikram Munnar family visit). മൂന്നാറിലെ തേയിലത്തോട്ടത്തിലൂടെ അപ്രതീക്ഷിതമായി നടക്കാനിറങ്ങിയ വിക്രമിനെ കണ്ട് തൊഴിലാളികൾ അത്ഭുതപ്പെടുകയായിരുന്നു. തൊഴിലാളികളോട് അതീവ സൗഹൃദത്തോടെ സംസാരിക്കുകയും അവർക്കൊപ്പം പാട്ടുപാടുകയും ചെയ്ത വിക്രമിന്റെ വീഡിയോ ഇപ്പോൾ സോഷ്യൽ മീഡിയയിൽ വൻ തരംഗമാവുകയാണ്.
തങ്ങളുടെ മുന്നിൽ നിൽക്കുന്നത് സൂപ്പർ താരം വിക്രമാണെന്ന് മനസ്സിലായതോടെ തൊഴിലാളികൾ വലിയ ആവേശത്തിലായി. ‘ഒരു ഫോട്ടോ എടുത്തോട്ടെ’ എന്ന് സ്നേഹത്തോടെ ചോദിച്ച തൊഴിലാളികളോട് തമാശരൂപേണ, “ഫോട്ടോ ഒന്നും എടുക്കാൻ പറ്റില്ല” എന്ന് വിക്രം പറയുന്നതും വീഡിയോയിലുണ്ട്. തൊട്ടുപിന്നാലെ ഒട്ടും മടി കൂടാതെ തൊഴിലാളികളെ ചേർത്തുപിടിച്ച് താരം ഫോട്ടോയ്ക്ക് പോസ് ചെയ്യുകയായിരുന്നു.
തനിക്ക് ഏറെ പ്രിയപ്പെട്ട മൂന്നാർ യാത്രയെക്കുറിച്ച് ‘ഒരു നടത്തത്തിന് പോയി, ഒരുപാട് ഓർമകളുമായി തിരിച്ചുവന്നു’ എന്ന മനോഹരമായ ക്യാപ്ഷനോടെയാണ് വിക്രം തന്റെ ഇൻസ്റ്റഗ്രാം പേജിൽ വീഡിയോ പങ്കുവെച്ചത്.
View this post on Instagram
വിക്രമിന്റെ എക്കാലത്തെയും മികച്ച ബ്ലോക്ക്ബസ്റ്റർ ചിത്രമായ ‘അന്യൻ’ തങ്ങൾക്ക് ഒത്തിരി ഇഷ്ടമാണെന്ന് തൊഴിലാളികൾ താരത്തോട് പറയുകയുണ്ടായി. തുടർന്ന് സിനിമയിലെ സൂപ്പർഹിറ്റ് ഗാനമായ ‘അണ്ടൻകാക്ക കൊണ്ടക്കാരി’ എന്ന പാട്ട് തൊഴിലാളികൾ പാടാൻ തുടങ്ങിയതോടെ വിക്രമും അവർക്കൊപ്പം ചേർന്ന് പാടുകയായിരുന്നു. തോട്ടത്തിലെ കുട്ടികളോടും മുതിർന്നവരോടുമെല്ലാം ഏറെ സമയം സംസാരിച്ച ശേഷമാണ് താരം അവിടെ നിന്നും മടങ്ങിയത്.
വീഡിയോ വൈറലായതോടെ വിക്രമിന്റെ എളിമയെയും താരജാഡകളില്ലാത്ത പെരുമാറ്റത്തെയും പ്രശംസിച്ച് നിരവധി ആരാധകരാണ് കമന്റുകളുമായി രംഗത്തെത്തുന്നത്. എത്ര വലിയ ഉയരങ്ങളിൽ എത്തിയാലും വിക്രമിന്റെ സ്വഭാവത്തിന് ഒരു മാറ്റവുമുണ്ടാകില്ലെന്ന് ആരാധകർ കുറിക്കുന്നു. നിലവിൽ പാ രഞ്ജിത്ത് സംവിധാനം ചെയ്യുന്ന ‘തങ്കലാൻ’ എന്ന ചിത്രത്തിന്റെ റിലീസ് തിരക്കുകളിലാണ് താരം.
Story Summary: South Indian superstar Chiyaan Vikram surprised plantation workers at the Taliyar Estate in Munnar during a casual morning walk. A heartwarming video shared by the actor shows him joking with the workers, taking photos with their children, and singing the hit song ‘Andangkaaka’ from his blockbuster movie Anniyan along with them.
