കൊച്ചി: തെന്നിന്ത്യൻ സൂപ്പർ താരം സൂര്യയെ നായകനാക്കി ആർ.ജെ. ബാലാജി സംവിധാനം ചെയ്ത ഏറ്റവും പുതിയ തമിഴ് ചിത്രം ‘കറുപ്പ്’ തിയേറ്ററുകളിൽ വിജയകരമായി പ്രദർശനം തുടരുകയാണ് (Swasika Vijay Karuppu movie salary). മലയാളത്തിൽ നിന്ന് ഇന്ദ്രൻസ്, സ്വാസിക, ശിവദ, അനഘ, ഉണ്ണിമായ, അജു വർഗ്ഗീസ് തുടങ്ങിയ വൻ താരനിരയാണ് ഈ ചിത്രത്തിൽ അണിനിരന്നിരിക്കുന്നത്. ഇപ്പോഴിതാ ചിത്രത്തിലെ താരങ്ങളുടെ പ്രതിഫലവുമായി ബന്ധപ്പെട്ട് സോഷ്യൽ മീഡിയയിൽ പ്രചരിക്കുന്ന ഒരു വ്യാജ പോസ്റ്റിന് നടി സ്വാസിക നൽകിയ രസകരമായ മറുപടിയാണ് സിനിമാ ഗ്രൂപ്പുകളിൽ വൈറലാകുന്നത്.
സിനിമയിലെ പ്രധാന താരങ്ങൾക്ക് ലഭിച്ച പ്രതിഫലം എന്ന പേരിൽ ഇൻസ്റ്റഗ്രാമിൽ ഒരു പോസ്റ്റ് പ്രത്യക്ഷപ്പെട്ടിരുന്നു. സൂര്യ (നായകൻ): 45 കോടി രൂപ, തൃഷ (നായിക): 5 കോടി രൂപ, ആർ.ജെ. ബാലാജി (സംവിധായകൻ): 4 കോടി രൂപ, സ്വാസിക: 40 ലക്ഷം രൂപ എന്നിങ്ങനെ ആയിരുന്നു കണക്കുകൾ.
ഈ പോസ്റ്റ് ശ്രദ്ധയിൽപ്പെട്ടതോടെയാണ് തനിക്ക് അത്രയൊന്നും പ്രതിഫലം ലഭിച്ചിട്ടില്ലെന്ന സത്യം തുറന്നുപറഞ്ഞ് താരം തന്നെ നേരിട്ട് കമന്റ് ബോക്സിൽ എത്തിയത്. ”അയ്യോ എനിക്കൊന്നും ഈ പ്രതിഫലം കിട്ടിയിട്ടില്ലേ…” എന്നാണ് പോസ്റ്റിന് താഴെ ചിരിക്കുന്ന ഇമോജികളോടെ സ്വാസിക കുറിച്ചത്. താരത്തിന്റെ ഈ സത്യസന്ധവും രസകരവുമായ മറുപടിക്ക് താഴെ ആരാധകരുടെ കമന്റ് പ്രവാഹമാണ്. “സ്വാസിക ചേച്ചിക്ക് കിട്ടേണ്ട പണം ആര് അടിച്ചുമാറ്റി?”, “വ്യാജ വാർത്തകൾ ഉണ്ടാക്കുന്നവർക്ക് ഇതിലും നല്ല മറുപടി സ്വപ്നങ്ങളിൽ മാത്രം” എന്നിങ്ങനെ പോകുന്നു ആരാധകരുടെ പ്രതികരണങ്ങൾ.
ആക്ഷനും ഫാന്റസിക്കും ഒപ്പം കോടതി മുറിയിലെ തർക്കങ്ങളും പറയുന്ന ഒരു മാസ്സ് എന്റർടൈനറാണ് ‘കറുപ്പ്’. ‘ആറ്’ എന്ന ഹിറ്റ് ചിത്രത്തിന് ശേഷം നീണ്ട 20 വർഷങ്ങൾക്ക് ശേഷമാണ് സൂര്യയും തൃഷയും ഈ ചിത്രത്തിലൂടെ വീണ്ടും ഒന്നിക്കുന്നത്. ചിത്രത്തിൽ വക്കീൽ വേഷത്തിലാണ് സൂര്യ എത്തുന്നത്. വലിയ ഹൈപ്പോടെ തിയേറ്ററുകളിലെത്തിയ ചിത്രത്തിന് മികച്ച പ്രതികരണമാണ് പ്രേക്ഷകരിൽ നിന്നും ലഭിച്ചുകൊണ്ടിരിക്കുന്നത്.
Story Summary : Malayalam actress Swasika Vijay reacted with humor to a viral Instagram post claiming the star salaries for Suriya’s latest Tamil movie ‘Karuppu’. Commenting on the post which claimed she received ₹40 lakhs, she clarified that she did not receive any such amount. Directed by RJ Balaji, the film marks the reunion of Suriya and Trisha after 20 years.
