തിരുവനന്തപുരം: മെയ് 18 തിങ്കളാഴ്ച നടക്കുന്ന യു.ഡി.എഫ് സർക്കാരിന്റെ സത്യപ്രതിജ്ഞാ ചടങ്ങുമായി ബന്ധപ്പെട്ട് കർശന നിർദേശങ്ങൾ പുറപ്പെടുവിച്ച് ലോക്ഭവൻ (Kerala Cabinet Swearing In Stage Protocol). സത്യപ്രതിജ്ഞ നടക്കുന്ന പ്രധാന വേദിയിൽ ഗവർണർക്ക് പുറമേ മുഖ്യമന്ത്രിയും നിയുക്ത മന്ത്രിമാരും മാത്രമേ ഉണ്ടാകാൻ പാടുള്ളൂവെന്നാണ് ഔദ്യോഗിക നിർദേശം. മറ്റ് പ്രമുഖരോ രാഷ്ട്രീയ നേതാക്കളോ വേദിയിൽ കയറരുത് എന്നും ഈ നിർദേശപ്രകാരം വേദിയിലെ സീറ്റിംഗ് ക്രമീകരണങ്ങൾ മാറ്റണമെന്നും അധികൃതർ അറിയിച്ചു.
മറ്റെല്ലാ വിശിഷ്ടാതിഥികളും സദസ്സിലായിരിക്കും ഇരിക്കുക. ഇവർക്കായി പ്രത്യേക പവലിയൻ വേദിക്ക് സമീപം ഒരുക്കിയിട്ടുണ്ട്. ഇതിനുപുറമെ, സെൻട്രൽ സ്റ്റേഡിയത്തിന്റെ വശങ്ങളിലുള്ള ഗാലറികളിലും പൊതുജനങ്ങൾക്കായി പ്രത്യേക പന്തലുകൾ സജ്ജീകരിച്ചിട്ടുണ്ട്. തിരക്ക് വർദ്ധിക്കാനുള്ള സാധ്യത കണക്കിലെടുത്ത് പന്തലിന്റെ ശേഷി 12,000-ൽ നിന്ന് 50,000 ആയി ഉയർത്തിയിട്ടുണ്ട്. ചടങ്ങുകൾ തത്സമയം കാണുന്നതിനായി സ്റ്റേഡിയത്തിനകത്ത് വലിയ എൽ.സി.ഡി സ്ക്രീനുകളും സ്ഥാപിക്കും.
അതേസമയം, ചടങ്ങിലേക്ക് ക്ഷണിക്കപ്പെട്ടിരുന്ന തമിഴ്നാട് മുഖ്യമന്ത്രി ജോസഫ് വിജയ് സത്യപ്രതിജ്ഞാ ചടങ്ങിൽ പങ്കെടുക്കില്ലെന്ന് ഔദ്യോഗികമായി അറിയിച്ചിട്ടുണ്ട്. ചടങ്ങിനാവശ്യമായ പ്രവേശന പാസുകളുടെ വിതരണം ഇതിനോടകം പൂർത്തിയായി. വൻ ജനക്കൂട്ടം തലസ്ഥാനത്തേക്ക് എത്തുമെന്നതിനാൽ തിങ്കളാഴ്ച രാവിലെ മുതൽ തിരുവനന്തപുരം നഗരത്തിൽ കർശനമായ ഗതാഗത നിയന്ത്രണങ്ങൾ ഏർപ്പെടുത്തും.
Summary: The Raj Bhavan (Lok Bhavan) has issued strict guidelines for the upcoming UDF government’s swearing-in ceremony at the Central Stadium, directing that only the Governor, the Chief Minister, and the designated Ministers will be permitted on the main stage. Other dignitaries and political leaders will be accommodated in a special pavilion within the audience area. Meanwhile, Tamil Nadu Chief Minister Joseph Vijay has informed that he will not be attending the event. Amid massive crowd expectations, the pavilion capacity has been increased to 50,000, and strict traffic curbs will be enforced in Thiruvananthapuram on Monday.
