ന്യൂഡൽഹി: ഓസ്ട്രേലിയൻ ക്രിക്കറ്റ് താരങ്ങൾ പ്രതിഫല തർക്കത്തെത്തുടർന്ന് ബിഗ് ബാഷ് ലീഗ് ഉപേക്ഷിച്ച് ദക്ഷിണാഫ്രിക്കൻ ലീഗായ SA20-ലേക്ക് മാറുന്നു എന്ന വാർത്തകൾ നിഷേധിച്ച് ഓസീസ് ക്യാപ്റ്റൻ പാറ്റ് കമ്മിൻസ് (Pat Cummins BBL). തന്റെ സോഷ്യൽ മീഡിയ പ്ലാറ്റ്ഫോമിലൂടെയാണ് കമ്മിൻസ് ഈ റിപ്പോർട്ടുകൾ തെറ്റാണെന്ന് വ്യക്തമാക്കിയത്. നിലവിൽ ഐപിഎൽ 2026-ൽ സൺറൈസേഴ്സ് ഹൈദരാബാദിന്റെ ക്യാപ്റ്റനായി കളിക്കുകയാണ് അദ്ദേഹം.
ബിഗ് ബാഷ് ലീഗിൽ കളിക്കാൻ ഏകദേശം 10 ലക്ഷം ഓസ്ട്രേലിയൻ ഡോളർ (ഏകദേശം 7 കോടി രൂപ) പ്രതിഫലം വേണമെന്ന് സീനിയർ താരങ്ങൾ ആവശ്യപ്പെട്ടതായും, ഇത് ലഭിക്കാത്ത പക്ഷം അവർ ലീഗ് ബഹിഷ്കരിക്കുമെന്നും ഓസ്ട്രേലിയൻ മാധ്യമങ്ങളിൽ റിപ്പോർട്ടുകൾ വന്നിരുന്നു. പാറ്റ് കമ്മിൻസാണ് ഈ നീക്കങ്ങൾക്ക് നേതൃത്വം നൽകുന്നത് എന്നായിരുന്നു ‘ദി ഏജ്’ പത്രം റിപ്പോർട്ട് ചെയ്തത്.
തനിക്കെതിരെ വന്ന വാർത്തകൾ പൂർണ്ണമായും കെട്ടിച്ചമച്ചതാണെന്ന് കമ്മിൻസ് എക്സിൽ കുറിച്ചു. SA20 ലീഗിലെ എൻഒസി (NOC), ‘ദി ഹണ്ട്രഡ്’ ലീഗിലെ വാഗ്ദാനങ്ങൾ എന്നിവയെക്കുറിച്ച് വന്ന റിപ്പോർട്ടുകൾ അടിസ്ഥാനരഹിതമാണെന്ന് അദ്ദേഹം വ്യക്തമാക്കി. ക്രിക്കറ്റ് ഓസ്ട്രേലിയയുമായി തർക്കമുണ്ടെന്ന വാർത്തകളെയും അദ്ദേഹം തള്ളിക്കളഞ്ഞു. അതിനിടെ, ഇംഗ്ലണ്ട് മുൻ താരം ആൻഡ്രൂ ഫ്ലിന്റോഫ് ബിഗ് ബാഷ് ലീഗ് ടീമായ സിഡ്നി തണ്ടറിന്റെ മുഖ്യ പരിശീലകനായി ചുമതലയേൽക്കുമെന്ന് റിപ്പോർട്ടുകളുണ്ട്. ട്രെവർ ബെയ്ലിസിന് പകരക്കാരനായാണ് ഫ്ലിന്റോഫ് എത്തുന്നത്. ഇംഗ്ലണ്ട് ലയൺസിന്റെ പരിശീലകനായി പ്രവർത്തിച്ചുവരുന്ന ഫ്ലിന്റോഫിന്റെ ആദ്യ വിദേശ ഫ്രാഞ്ചൈസി പരിശീലക ചുമതലയായിരിക്കും ഇത്.
Summary: Australian captain Pat Cummins has dismissed reports claiming he and other senior players were considering skipping the Big Bash League (BBL) for the SA20 league over payment disputes. Taking to social media, Cummins called the reports “made up.” Meanwhile, former England star Andrew Flintoff is set to be appointed as the head coach of the BBL franchise Sydney Thunder, replacing Trevor Bayliss.
