ന്യൂഡൽഹി: നീറ്റ് പരീക്ഷാ നടത്തിപ്പിലെ വൻ ക്രമക്കേടുകൾക്കെതിരെ നിയമനടപടികൾ ശക്തമാകുന്നു. മെഡിക്കൽ സംഘടനയായ ‘ഫെയ്മ’ സുപ്രീം കോടതിയിൽ ഹർജി നൽകി. നാഷണൽ ടെസ്റ്റിംഗ് ഏജൻസിയുടെ (NTA) വിശ്വാസ്യത നഷ്ടപ്പെട്ട സാഹചര്യത്തിൽ, കോടതിയുടെ നേരിട്ടുള്ള മേൽനോട്ടത്തിൽ വീണ്ടും പരീക്ഷ നടത്തണമെന്നും, പരീക്ഷാ നടത്തിപ്പിനായി കൂടുതൽ സുതാര്യമായ മറ്റൊരു സംവിധാനം വേണമെന്നുമാണ് ഫെയ്മയുടെ പ്രധാന ആവശ്യം.(NEET UG 2026, FAIMA Moves Supreme Court as CBI Extends NEET Paper Leak Probe)
ചോദ്യപേപ്പർ ചോർച്ചയുമായി ബന്ധപ്പെട്ട് സിബിഐ അന്വേഷണം കേരളമടക്കം 10 സംസ്ഥാനങ്ങളിലേക്ക് വ്യാപിപ്പിച്ചു. രാജസ്ഥാൻ പോലീസ് കണ്ടെത്തിയ 200-ഓളം വിദ്യാർത്ഥികളുടെ വിവരങ്ങൾ സിബിഐക്ക് കൈമാറിയിട്ടുണ്ട്, ഇതിൽ കേരളത്തിലെ രണ്ട് ജില്ലകളിൽ നിന്നുള്ള വിദ്യാർത്ഥികളും ഉൾപ്പെടുന്നു. കേരളത്തിൽ പഠിക്കുന്ന ചുരു സ്വദേശിയായ ഒരു മെഡിക്കൽ വിദ്യാർത്ഥിക്ക് ഈ സംഘവുമായി ബന്ധമുണ്ടെന്നാണ് പ്രാഥമിക നിഗമനം.
പരീക്ഷാ കേന്ദ്രങ്ങളിലേക്ക് ചോദ്യപേപ്പർ എത്തിക്കുന്നതിനിടെ ചോർത്തുന്ന പതിവ് രീതിയിൽ നിന്ന് മാറി, നാസിക്കിലെ പ്രിന്റിംഗ് പ്രസ്സിൽ നിന്ന് നേരിട്ടാണ് ഇത്തവണ ചോർച്ച നടന്നത്. പ്രിന്റിംഗ് പ്രസ്സിൽ നിന്ന് ചോദ്യപേപ്പർ കൈക്കലാക്കിയ മെഡിക്കൽ വിദ്യാർത്ഥി ശുഭം കർനിയാർ ഇത് ഹരിയാനയിലെ ഒരു ഡോക്ടർക്ക് കൈമാറുകയും, അവിടെനിന്ന് സിക്കറിലെ സൂത്രധാരന്മാരായ മനീഷ് യാദവിലേക്കും രാകേഷ് കുമാറിലേക്കും എത്തുകയുമായിരുന്നു.
ലഭിച്ച ചോദ്യപേപ്പർ ‘മാതൃക ചോദ്യപേപ്പർ’ എന്ന പേരിൽ ടെലഗ്രാം, വാട്സ്ആപ്പ് ചാനലുകൾ വഴി 25,000 മുതൽ 2 ലക്ഷം രൂപ വരെ ഈടാക്കി വിറ്റഴിച്ചു. ‘പ്രൈവറ്റ് മാഫിയ’ എന്ന ടെലഗ്രാം ചാനലും ഇതിനായി ഉപയോഗിച്ചതായി സംശയമുണ്ട്. മാതൃക ചോദ്യപേപ്പറിലെ ബയോളജി ചോദ്യങ്ങളിൽ 90 എണ്ണവും, കെമിസ്ട്രിയിലെ 45-ൽ 35 ചോദ്യങ്ങളും യഥാർത്ഥ ചോദ്യപേപ്പറിലെ ചോദ്യങ്ങളുമായി ഒന്നായിരുന്നു എന്ന് അന്വേഷണത്തിൽ കണ്ടെത്തിയിട്ടുണ്ട്. നിലവിൽ സിബിഐ നാല് പ്രത്യേക സംഘങ്ങളെ നിയോഗിച്ച് അന്വേഷണം ഊർജ്ജിതമാക്കിയിരിക്കുകയാണ്.
Story Summary
The medical organization FAIMA has moved the Supreme Court seeking a fresh, court-monitored NEET UG examination, citing the failure of the NTA. Simultaneously, the CBI has expanded its probe into the question paper leak across 10 states, including Kerala, uncovering a sophisticated racket where original questions were sold online as ‘model papers.’
