ചെന്നൈ: തമിഴ്നാടിന്റെ മുഖ്യമന്ത്രിയായി ചുമതലയേറ്റ സി. ജോസഫ് വിജയ് നിയമസഭാംഗമായി സത്യപ്രതിജ്ഞ ചെയ്തു. പ്രോ-ടേം സ്പീക്കർ എം.വി. കരുപ്പയ്യയാണ് സത്യവാചകം ചൊല്ലിക്കൊടുത്തത്. രാവിലെ 9:30-ന് ആരംഭിച്ച നടപടിക്രമങ്ങളിൽ ആദ്യം സഭാംഗമായി സത്യപ്രതിജ്ഞ ചെയ്തത് മുഖ്യമന്ത്രി വിജയ്യാണ്.(Tamil Nadu CM Vijay And MLAs Take Oath In Legislative Assembly)
വിജയ്ക്ക് പിന്നാലെ എൻ. ആനന്ദ്, ആദവ് അർജുന എന്നിവരുൾപ്പെടെ ഒൻപത് മന്ത്രിമാരും എംഎൽഎമാരായി സത്യപ്രതിജ്ഞ ചെയ്തു. രണ്ട് മണ്ഡലങ്ങളിൽ (പെരമ്പൂർ, തിരുച്ചിറപ്പള്ളി ഈസ്റ്റ്) നിന്ന് വിജയിച്ച വിജയ്, തിരുച്ചിറപ്പള്ളി ഈസ്റ്റ് സീറ്റ് രാജിവെച്ചിരുന്നു. ഇനി മുതൽ പെരമ്പൂർ മണ്ഡലത്തെയാകും അദ്ദേഹം സഭയിൽ പ്രതിനിധീകരിക്കുക.
പ്രതിപക്ഷ നിരയിൽ നിന്ന് ഡിഎംകെ നിയമസഭാ കക്ഷി നേതാവും മുൻ ഉപമുഖ്യമന്ത്രിയുമായ ഉദയനിധി സ്റ്റാലിൻ, മുൻ മുഖ്യമന്ത്രിമാരായ എടപ്പാടി കെ. പളനിസാമി (എഐഡിഎംകെ), ഒ. പനീർസെൽവം എന്നിവരും എംഎൽഎമാരായി സത്യപ്രതിജ്ഞ ചെയ്തു. അഗ്രി കൃഷ്ണമൂർത്തി, കെ.പി. അൻപഴകൻ തുടങ്ങിയ പ്രമുഖ നേതാക്കളും ചടങ്ങിൽ പങ്കെടുത്തു. തമിഴ്നാട് രാഷ്ട്രീയത്തിൽ പുതിയൊരു അധികാര കൈമാറ്റത്തിന് സാക്ഷ്യം വഹിച്ച ചടങ്ങിൽ ഭരണ-പ്രതിപക്ഷ ഭേദമന്യേ എല്ലാ പ്രമുഖ നേതാക്കളും സന്നിഹിതരായിരുന്നു.
Story Summary
Tamil Nadu CM C. Joseph Vijay and newly elected MLAs took their oath of office in the state assembly today, administered by Pro-Tem Speaker M.V. Karuppaiah. The ceremony saw the participation of prominent leaders including Udhayanidhi Stalin and Edappadi K. Palaniswami, marking the formal commencement of the new legislative term.
