ന്യൂഡൽഹി: ഇന്ത്യൻ ഗുസ്തി താരം വിനേഷ് ഫോഗട്ടിന് ഗുസ്തി ഫെഡറേഷൻ (WFI) ആഭ്യന്തര മത്സരങ്ങളിൽ വിലക്കേർപ്പെടുത്തി (Vinesh Phogat Ban WFI). 15 പേജുള്ള കാരണം കാണിക്കൽ നോട്ടീസാണ് ഫെഡറേഷൻ ശനിയാഴ്ച (മെയ് 9, 2026) താരത്തിന് നൽകിയത്. ഇതോടെ നാളെ ഉത്തർപ്രദേശിലെ ഗോണ്ടയിൽ ആരംഭിക്കാനിരുന്ന നാഷണൽ ഓപ്പൺ റാങ്കിംഗ് ടൂർണമെന്റിൽ വിനേഷിന് പങ്കെടുക്കാനാവില്ല.
വിനേഷിന്റെ പെരുമാറ്റം ദേശീയ തലത്തിൽ നാണക്കേടുണ്ടാക്കിയെന്നും ഇന്ത്യൻ ഗുസ്തിയുടെ സൽപ്പേരിന് കളങ്കമുണ്ടാക്കിയെന്നും നോട്ടീസിൽ ആരോപിക്കുന്നു.2025 ഡിസംബറിൽ ഉത്തേജക പരിശോധനയ്ക്ക് (Dope test) ഹാജരാകാതിരുന്നത് ഉൾപ്പെടെയുള്ള കാര്യങ്ങളിൽ വിശദീകരണം തേടിയിട്ടുണ്ട്.
വിരമിക്കൽ പ്രഖ്യാപിച്ച ശേഷം തിരികെ വരുമ്പോൾ പാലിക്കേണ്ട ആറ് മാസത്തെ നിർബന്ധിത നോട്ടീസ് പിരീഡ് (Notice period) പൂർത്തിയാക്കിയില്ലെന്ന് ഫെഡറേഷൻ ചൂണ്ടിക്കാട്ടുന്നു. 2025 ഡിസംബർ 12-ന് നൽകിയ കത്ത് പ്രകാരം ഈ കാലാവധി 2026 ജൂൺ 26-നേ അവസാനിക്കൂ.
2024 പാരിസ് ഒളിമ്പിക്സിൽ ഭാരക്കൂടുതൽ മൂലം അയോഗ്യയാക്കപ്പെട്ടത് ഉൾപ്പെടെയുള്ള നാല് പ്രധാന കാര്യങ്ങളിൽ 14 ദിവസത്തിനകം മറുപടി നൽകാൻ താരത്തോട് ആവശ്യപ്പെട്ടിട്ടുണ്ട്. ഈ വിലക്കോടെ ഏഷ്യൻ ഗെയിംസ് സെലക്ഷൻ ട്രയൽസിലും വിനേഷിന് പങ്കെടുക്കാൻ കഴിയില്ല. 2024 പാരിസ് ഒളിമ്പിക്സിന് ശേഷം വിരമിക്കൽ പ്രഖ്യാപിച്ച വിനേഷ് അടുത്തിടെയാണ് രാഷ്ട്രീയ പ്രവർത്തനങ്ങൾക്കും പ്രസവത്തിനും ശേഷം വീണ്ടും ഗോദയിലേക്ക് തിരിച്ചെത്താൻ തയ്യാറെടുത്തിരുന്നത്.
Story Summary: The Wrestling Federation of India (WFI) issued a 15-page show-cause notice to Vinesh Phogat on May 9, 2026, accusing her of indiscipline and anti-doping violations. She has been declared ineligible for domestic competitions until June 26, 2026, primarily due to failing the mandatory six-month notice period required for returning from retirement. This ban bars her from the National Open Ranking Tournament in Gonda and potentially the 2026 Asian Games trials.
