ന്യൂഡൽഹി: ഏഷ്യൻ ഗെയിംസിനുള്ള ഇന്ത്യൻ ഗുസ്തി ടീമിലിടം നേടാനുള്ള യോഗ്യതാ മത്സരങ്ങളിൽ (ട്രയൽസ്) തകർപ്പൻ വിജയത്തോടെ തുടക്കം കുറിച്ച് ഇന്ത്യയുടെ സൂപ്പർ താരം വിനേഷ് ഫോഗട്ട്. ശനിയാഴ്ച നടന്ന തന്റെ ആദ്യ പോരാട്ടത്തിൽ എതിരാളിയായ ജ്യോതിയെ 7-1 എന്ന സ്കോറിനാണ് വിനേഷ് തറപറ്റിച്ചത് (Vinesh Phogat Asian Games Selection). മത്സരത്തിന്റെ തുടക്കത്തിൽ തികഞ്ഞ ജാഗ്രത പുലർത്തിയ വിനേഷ്, പിന്നീട് ഡബിൾ ലെഗ് അറ്റാക്കുകളിലൂടെയും മികച്ച ടാക്റ്റിക്സുകളിലൂടെയും കളം നിറഞ്ഞു കളിക്കുകയായിരുന്നു. മത്സരത്തിന്റെ രണ്ടാം പകുതിയിൽ പൂർണ്ണ നിയന്ത്രണം ഏറ്റെടുത്ത വിനേഷ് തുടർച്ചയായ കൗണ്ടർ അറ്റാക്കുകളിലൂടെ സ്കോർ ഉയർത്തി വ്യക്തമായ ആധിപത്യം ഉറപ്പിച്ചു. അടുത്ത റൗണ്ടിൽ നിഷുവാണ് വിനേഷിന്റെ എതിരാളി. ഇതേ വിഭാഗത്തിലെ മറ്റൊരു മത്സരത്തിൽ വെറും 34 സെക്കൻഡുകൾക്കുള്ളിൽ എതിരാളിയെ പരാജയപ്പെടുത്തി യുവതാരം അന്തിം പംഗലും മിന്നും തുടക്കം കുറിച്ചിട്ടുണ്ട്. ടൂർണമെന്റിന്റെ ഫൈനലിൽ വിനേഷും അന്തിമും തമ്മിൽ നേർക്കുനേർ വരാനാണ് നിലവിൽ സാധ്യത കൽപ്പിക്കപ്പെടുന്നത്.
അതേസമയം, മത്സരത്തിന് തൊട്ടുമുൻപ് ഭാരവിഭാഗവുമായി ബന്ധപ്പെട്ട് ഗുസ്തി ഫെഡറേഷൻ എടുത്ത നിലപാടുകൾ കടുത്ത നാടകീയ രംഗങ്ങൾക്ക് കാരണമായി. വിനേഷിനെ 50 കിലോഗ്രാം വിഭാഗത്തിൽ മാത്രമേ മത്സരിപ്പിക്കൂ എന്നായിരുന്നു ഫെഡറേഷന്റെ ആദ്യ തീരുമാനം; എന്നാൽ തനിക്ക് താല്പര്യമുള്ള 53 കിലോഗ്രാം വിഭാഗത്തിൽ മത്സരിക്കാൻ അനുവദിക്കണമെന്ന് വിനേഷ് ശക്തമായി ആവശ്യപ്പെടുകയും തന്നോട് വിവേചനം കാണിക്കുകയാണെന്ന് ആരോപിക്കുകയും ചെയ്തു. തർക്കം രൂക്ഷമായതോടെ ഡബ്ല്യു.എഫ്.ഐ പ്രസിഡന്റ് സഞ്ജയ് സിംഗ് ഇടപെടുകയും വിനേഷിന് 53 കിലോഗ്രാം വിഭാഗത്തിൽ ഭാരപരിശോധന നടത്താൻ അനുമതി നൽകുകയുമായിരുന്നു.
ഇതിനുപുറമെ, വിനേഷ് ഫോഗട്ടിനെ ‘ഐക്കണിക് പ്ലെയർ’ ആയി പരിഗണിച്ച് ട്രയൽസിൽ പങ്കെടുക്കാൻ അനുവദിക്കണമെന്ന് ഡൽഹി ഹൈക്കോടതിയും നേരത്തെ ഫെഡറേഷന് നിർദ്ദേശം നൽകിയിരുന്നു. ഏഷ്യൻ ഗെയിംസിൽ ഇന്ത്യയെ പ്രതിനിധീകരിക്കാൻ താൻ ഇനിയും കുറഞ്ഞത് രണ്ട് വർഷമെങ്കിലും സജീവമായി രംഗത്തുണ്ടാകുമെന്ന് മത്സരത്തിന് മുന്നോടിയായി വിനേഷ് മാധ്യമങ്ങളോട് വ്യക്തമാക്കി.
Summary: Indian wrestler Vinesh Phogat made a stupendous start in the Asian Games selection trials by defeating Jyoti 7-1 in the 53kg category. The victory followed a dramatic morning weigh-in where the Wrestling Federation of India reversed its decision to restrict her to the 50kg division after strong objections from the wrestler. Following the intervention of WFI President Sanjay Singh and previous Delhi High Court directives, Vinesh successfully entered her preferred weight class and advanced to the next round.
