കൊല്ലം/കാസർഗോഡ്: നിയമസഭാ തിരഞ്ഞെടുപ്പിന്റെ വോട്ടെണ്ണൽ നടക്കാനിരിക്കെ സംഘർഷ സാധ്യതകൾ ഒഴിവാക്കാൻ കൊല്ലം, കാസർഗോഡ് ജില്ലകളിൽ പടക്ക വിൽപ്പനയ്ക്കും ഉപയോഗത്തിനും കർശന നിയന്ത്രണം ഏർപ്പെടുത്തി (Firecracker Ban Kerala). തിങ്കളാഴ്ച ജില്ലകളിലെ പടക്കക്കടകൾ അടച്ചിടാൻ കളക്ടർമാർ ഉത്തരവിട്ടു. നേരത്തെ കണ്ണൂർ, കോഴിക്കോട് ജില്ലകളിലും സമാനമായ നിയന്ത്രണങ്ങൾ പ്രഖ്യാപിച്ചിരുന്നു.
വിജയാഘോഷങ്ങൾ നടത്തുന്നതിന് തടസ്സമില്ലെങ്കിലും പടക്കങ്ങൾ ഉപയോഗിച്ചുള്ള ആഘോഷങ്ങൾ അതിരുവിട്ടാൽ കർശന നടപടിയുണ്ടാകുമെന്ന് അധികൃതർ മുന്നറിയിപ്പ് നൽകി. മുൻകരുതൽ നടപടിയുടെ ഭാഗമായാണ് പടക്കക്കടകൾക്ക് പൂട്ടുവീഴുന്നത്. കോഴിക്കോട് ജില്ലയിൽ പടക്ക നിരോധനത്തിന് പുറമെ നിരോധനാജ്ഞയും പ്രഖ്യാപിച്ചിട്ടുണ്ട്.
ക്രമസമാധാന നില ഉറപ്പുവരുത്തുന്നതിനും അനാവശ്യമായി ആളുകൾ തടിച്ചുകൂടുന്നത് ഒഴിവാക്കാനുമാണ് ഈ നടപടികൾ. വോട്ടെണ്ണൽ കേന്ദ്രങ്ങളിലും പരിസരങ്ങളിലും പോലീസ് സുരക്ഷയും കർശനമാക്കിയിട്ടുണ്ട്. ആഘോഷങ്ങൾ സമാധാനപരമായിരിക്കണമെന്നും നിയമലംഘനം നടത്തുന്നവർക്കെതിരെ കർശന നിയമനടപടികൾ സ്വീകരിക്കുമെന്നും ജില്ലാ ഭരണകൂടങ്ങൾ അറിയിച്ചു.
Story Summary: District Collectors have banned the sale and use of firecrackers in Kollam and Kasaragod on the vote-counting day to maintain law and order. While victory celebrations are permitted, strict action will be taken if they exceed limits, following similar restrictions in Kannur and Kozhikode.
