തിരുവനന്തപുരം: സംസ്ഥാനത്ത് ഭരണത്തുടർച്ചയുണ്ടാകുമെന്ന എൽഡിഎഫിന്റെ പ്രതീക്ഷകൾക്ക് മങ്ങലേൽപ്പിച്ച് എക്സിറ്റ് പോൾ ഫലങ്ങൾ പുറത്തുവന്നു. വിവിധ ഏജൻസികൾ നടത്തിയ സർവേകളിൽ ഭൂരിഭാഗവും യുഡിഎഫ് അധികാരത്തിലെത്തുമെന്നാണ് പ്രവചിക്കുന്നത്. ചില സർവേകൾ ബിജെപി നയിക്കുന്ന എൻഡിഎ മുന്നണി ഇത്തവണ നിയമസഭയിൽ അക്കൗണ്ട് തുറക്കുമെന്നും മികച്ച പ്രകടനം കാഴ്ചവെക്കുമെന്നും സൂചിപ്പിക്കുന്നു.(Kerala to UDF? Exit polls predict clean sweep, setback for LDF)
വിവിധ ഏജൻസികൾ പുറത്തുവിട്ട സീറ്റ് നിലയിൽ യു ഡി എഫിനാണ് മുന്നേറ്റം. യുഡിഎഫ് 90 മുതൽ 92 വരെ സീറ്റുകൾ നേടി വൻ വിജയം കൈവരിക്കുമെന്നും എൽഡിഎഫ് 45-46 സീറ്റുകളിലേക്ക് ചുരുങ്ങുമെന്നും പൊളിറ്റിക്കൽ ലാബ് സർവേ പ്രവചിക്കുന്നു. എൻഡിഎയ്ക്ക് രണ്ട് സീറ്റുകളാണ് ഇവർ നൽകുന്നത്.
യുഡിഎഫ് 78 മുതൽ 90 വരെ സീറ്റുകൾ നേടുമ്പോൾ, എൽഡിഎഫിന് 49 മുതൽ 62 സീറ്റുകൾ വരെ ലഭിച്ചേക്കാമെന്ന് ആക്സിസ് മൈ ഇന്ത്യ പറയുന്നു. എൻഡിഎ 0-3 സീറ്റുകൾ നേടുമെന്നും സർവേ പറയുന്നു. യുഡിഎഫിന് 72 മുതൽ 84 വരെയും എൽഡിഎഫിന് 52 മുതൽ 61 വരെയും സീറ്റുകളാണ് ടൈംസ് നൗ ജെവിസി പ്രവചിക്കുന്നത്. എൻഡിഎ 3 മുതൽ 7 വരെ സീറ്റുകൾ നേടിയേക്കാം. യുഡിഎഫ് 70 മുതൽ 80 വരെയും എൽഡിഎഫ് 58 മുതൽ 68 വരെയും സീറ്റുകൾ നേടുമെന്ന് പ്രവചിക്കുന്ന സിഎൻഎൻ ന്യൂസ് 18 വോട്ട് വൈബ് എൻഡിഎയ്ക്ക് നാല് സീറ്റുകൾ വരെ ലഭിക്കുമെന്ന് കരുതുന്നു.
യുഡിഎഫിന് 72 മുതൽ 80 വരെയും എൽഡിഎഫിന് 58 മുതൽ 64 വരെയും സീറ്റുകളാണ് ചാണക്യ സ്ട്രാറ്റജീസ് നൽകുന്നത്. എൻഡിഎയ്ക്ക് ഒന്ന് മുതൽ മൂന്ന് വരെ സീറ്റുകൾ ലഭിച്ചേക്കാം. യുഡിഎഫ് 75 മുതൽ 80 വരെ സീറ്റുകൾ നേടുമെന്ന് പ്രവചിക്കുമ്പോൾ എൽഡിഎഫിന് 55 മുതൽ 65 വരെ സീറ്റുകളാണ് പീപ്പിൾസ് പൾസ് നൽകുന്നത്. എൻഡിഎയ്ക്ക് മൂന്ന് സീറ്റുകൾ വരെ ലഭിച്ചേക്കാം.
യുഡിഎഫിന് 71 മുതൽ 79 വരെയും എൽഡിഎഫിന് 62 മുതൽ 69 വരെയും സീറ്റുകൾ ലഭിക്കുമെന്ന് പി മാർക്ക് പ്രവചിക്കുന്നു. എൻഡിഎയ്ക്ക് നാല് സീറ്റുകൾ വരെ ലഭിച്ചേക്കാം. യുഡിഎഫിന് 66 മുതൽ 76 വരെയും എൽഡിഎഫിന് 58 മുതൽ 68 വരെയും സീറ്റുകൾ പീപ്പിൾസ് ഇൻസൈറ്റ് പ്രവചിക്കുമ്പോൾ, എൻഡിഎ 10 മുതൽ 14 സീറ്റുകൾ വരെ നേടി വലിയ മുന്നേറ്റമുണ്ടാക്കുമെന്ന് അവകാശപ്പെടുന്നു. യുഡിഎഫ് 70 മുതൽ 75 വരെയും എൽഡിഎഫ് 60 മുതൽ 65 വരെയും സീറ്റുകൾ നേടുമെന്നാണ് മാട്രിസ് പ്രവചിക്കുന്നത്. എൻഡിഎയ്ക്ക് 3 മുതൽ 5 വരെ സീറ്റുകൾ ലഭിക്കാം. യുഡിഎഫ് 65 മുതൽ 80 വരെയും എൽഡിഎഫ് 55 മുതൽ 65 വരെയും സീറ്റുകൾ നേടുമെന്ന് ജേർണോ മിറർ പ്രവചിക്കുന്നു. എൻഡിഎയ്ക്ക് അഞ്ച് സീറ്റുകൾ വരെയാണ് നൽകുന്നത്.
ഭൂരിഭാഗം സർവേകളും യുഡിഎഫിന് 70-ന് മുകളിൽ സീറ്റുകൾ നൽകി ഭരണമാറ്റം പ്രവചിക്കുന്നുണ്ട്. ഭരണത്തുടർച്ച ലക്ഷ്യമിട്ട എൽഡിഎഫിന് തിരിച്ചടിയുണ്ടാകുമെന്നും മിക്ക പ്രവചനങ്ങളും സൂചിപ്പിക്കുന്നു. അതേസമയം, എൻഡിഎ ഇത്തവണ നിയമസഭയിൽ നിർണ്ണായകമായ സാന്നിധ്യമാകുമെന്ന സൂചനയും ചില സർവേകൾ നൽകുന്നുണ്ട്. എക്സിറ്റ് പോൾ ഫലങ്ങൾ യുഡിഎഫ് കേന്ദ്രങ്ങളിൽ വലിയ ആവേശം സൃഷ്ടിച്ചിട്ടുണ്ടെങ്കിലും യഥാർത്ഥ ചിത്രം വോട്ടെണ്ണൽ ദിനത്തിൽ മാത്രമേ വ്യക്തമാകൂ.
