കൊൽക്കത്ത: വാശിയേറിയ പ്രചാരണങ്ങൾക്കൊടുവിൽ പശ്ചിമ ബംഗാൾ നിയമസഭാ തെരഞ്ഞെടുപ്പിന്റെ രണ്ടാംഘട്ട പരസ്യപ്രചാരണത്തിന് തിരശീല വീണു (West Bengal Election 2026). നാളത്തെ നിശബ്ദ പ്രചാരണത്തിന് ശേഷം മറ്റന്നാൾ (ബുധനാഴ്ച) വോട്ടെടുപ്പ് നടക്കും. ബി.ജെ.പിയും തൃണമൂൽ കോൺഗ്രസും നേരിട്ട് ഏറ്റുമുട്ടുന്ന മണ്ഡലങ്ങളിൽ അവസാന നിമിഷം വരെ പ്രമുഖ നേതാക്കൾ സജീവമായിരുന്നു. തൃണമൂലിനായി മുഖ്യമന്ത്രി മമത ബാനർജി പദയാത്രകളിലൂടെയും ജനസഭകളിലൂടെയും ആവേശം സൃഷ്ടിച്ചപ്പോൾ, ബി.ജെ.പിക്കായി പ്രധാനമന്ത്രി നരേന്ദ്ര മോദി നേരിട്ടെത്തി പ്രചാരണത്തിന് നേതൃത്വം നൽകി.
തൃണമൂലിന് ബംഗാളിന്റെ വികസനത്തെക്കുറിച്ച് കാഴ്ചപ്പാടില്ലെന്ന് ബി.ജെ.പി ആരോപിച്ചു. എന്നാൽ ബി.ജെ.പിയും ടി.എം.സിയും ബംഗാളിന് ഒരുപോലെ ഭീഷണിയാണെന്ന നിലപാടിലാണ് കോൺഗ്രസ്-സി.പി.എം സഖ്യം.
പ്രചാരണത്തിന്റെ അവസാന ദിനങ്ങളിലും സംസ്ഥാനത്തിന്റെ വിവിധ ഭാഗങ്ങളിൽ സംഘർഷം റിപ്പോർട്ട് ചെയ്തു. ഹൂഗ്ലിയിൽ തൃണമൂൽ എം.പി മിതാലി ബാഗിന്റെ കാർ തകർക്കപ്പെട്ടു. ആക്രമണത്തിന് പിന്നിൽ ബി.ജെ.പിയാണെന്ന് തൃണമൂൽ ആരോപിച്ചു. വിവിധ ജില്ലകളിൽ പോലീസ് നടത്തിയ റെയ്ഡിൽ വൻതോതിൽ ബോംബുകളും പിടിച്ചെടുത്തു.
ഏപ്രിൽ 23-ന് നടന്ന ആദ്യഘട്ട വോട്ടെടുപ്പിൽ 91.78 ശതമാനം പോളിംഗ് രേഖപ്പെടുത്തിയിരുന്നു. എസ്.ഐ.ആറിൽ (SIR) നിന്ന് 91 ലക്ഷം പേർ പുറത്താക്കപ്പെട്ടതിനെത്തുടർന്ന്, ഇതര സംസ്ഥാനങ്ങളിൽ ജോലി ചെയ്യുന്ന തൊഴിലാളികൾ കൂട്ടത്തോടെ വോട്ട് ചെയ്യാൻ എത്തിയതാണ് പോളിംഗ് ശതമാനം ഉയരാൻ കാരണമായത്. രണ്ടാംഘട്ടത്തിലും സമാനമായ പോളിംഗ് ഉണ്ടാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
Story Summary: The public campaign for the second phase of the West Bengal Assembly elections concluded, with 142 constituencies set to vote on April 29. PM Narendra Modi and CM Mamata Banerjee led high-voltage campaigns for the BJP and TMC, respectively. The first phase recorded a high turnout of 91.78%, largely driven by migrant workers returning to vote after 91 lakh people were excluded from the SIR. Amid the intense rivalry, incidents of violence and the recovery of bombs were reported in several districts.
