എൻജമീന: കിഴക്കൻ ഛാഡിലെ ഇഗോട്ടെ ഗ്രാമത്തിൽ ശനിയാഴ്ച ആരംഭിച്ച സംഘർഷത്തിൽ 42 പേർ കൊല്ലപ്പെട്ടതായി സർക്കാർ സ്ഥിരീകരിച്ചു (Chad Ethnic Violence,). ഉപപ്രധാനമന്ത്രി ലിമാൻ മഹമത്ത് പ്രദേശം സന്ദർശിച്ച ശേഷമാണ് മരണസംഖ്യ പുറത്തുവിട്ടത്. രണ്ട് കുടുംബങ്ങൾ തമ്മിൽ വെള്ളത്തിനായി തുടങ്ങിയ ചെറിയ തർക്കം പിന്നീട് വംശീയമായ പ്രതികാര ആക്രമണങ്ങളായി മാറുകയായിരുന്നു.
അക്രമം പടർന്നതോടെ സൈന്യം ഇടപെടുകയും പ്രദേശം സുരക്ഷാ സേനയുടെ നിയന്ത്രണത്തിലാക്കുകയും ചെയ്തു. പരിക്കേറ്റ പത്തോളം പേർ ചികിൽസയിലാണ്. ഗോത്രത്തലവന്മാരുടെ നേതൃത്വത്തിൽ സമാധാന ചർച്ചകൾ ആരംഭിച്ചിട്ടുണ്ട്. നിലവിൽ സ്ഥിതിഗതികൾ ശാന്തമാണെന്ന് അധികൃതർ അറിയിച്ചു.
ഛാഡിൽ കൃഷിഭൂമിക്കും ജലസ്രോതസ്സുകൾക്കുമായി ഗോത്രങ്ങൾ തമ്മിലുള്ള ഏറ്റുമുട്ടൽ പതിവാണ്. അയൽരാജ്യമായ സുഡാനിലെ ആഭ്യന്തര യുദ്ധത്തെത്തുടർന്ന് ലക്ഷക്കണക്കിന് അഭയാർഥികൾ ഈ മേഖലയിലേക്ക് എത്തിയത് വിഭവങ്ങൾക്കായുള്ള തർക്കം വർദ്ധിപ്പിച്ചു. സുഡാനിൽ നിന്നുള്ള സായുധർ അതിർത്തി കടക്കുന്നത് തടയാൻ കഴിഞ്ഞ ഫെബ്രുവരിയിൽ ഛാഡ് അതിർത്തികൾ അടച്ചിരുന്നു. വിഭവങ്ങളുടെ പരിമിതിയും അഭയാർത്ഥി പ്രവാഹവും അതിർത്തി ഗ്രാമങ്ങളിൽ വലിയ മാനുഷിക പ്രതിസന്ധിയാണ് സൃഷ്ടിക്കുന്നത്.
Story Summary: A dispute over water between two families in eastern Chad escalated into ethnic violence, leaving 42 people dead. The conflict broke out in the Wadi Fira province near the Sudan border. Deputy Prime Minister Liman Mahamat confirmed the death toll and stated that the military had intervened to restore order. Competition for limited resources has intensified in the region due to the influx of refugees fleeing the civil war in neighboring Sudan.
